Dyn lleol wedi marw mewn gwrthdrawiad yng Nghaerdydd

Mae dyn 39 oed wedi marw wedi gwrthdrawiad ar yr A48 yng Nghaerdydd yn gynnar fore Llun.

Fe ddigwyddodd y gwrthdrawiad o gwmpas 03:15 ar y ffordd ymadael Rhodfa'r Dwyrain tua'r gorllewin o gylchfan Llaneirwg.

Cafodd gyrrwr Audi 6 o ardal Llanrhymni ei gludo i'r ysbyty lle bu farw.

Mae'r heddlu'n credu mai yr Audi oedd yr unig gerbyd yn y gwrthdrawiad, ac mae swyddogion arbenigol yn rhoi cymorth i deulu'r gyrrwr.

Roedd y ffordd ar gau am dros bedair awr wrth i'r heddlu ddechrau'r ymchwiliad i'r achos.

Mae'r llu'n apelio am wybodaeth neu luniau dash cam all fod o gymorth i'r ymchwiliad.