Crysau Gareth Edwards; gobeithio torri record byd

Ar ddiwedd gemau rygbi neu bêl-droed mae'n draddodiad i gyfnewid crysau gyda'r gwrthwynebwyr. Ac os yw'r crysau yna'n deillio o gêm gofiadwy fe allent fod werth miloedd o bunnoedd yn y dyfodol.

Un o'r ceisiau enwocaf yn hanes rygbi'r undeb yw cais Syr Gareth Edwards yn erbyn y Barbariaid ar Barc Yr Arfau, Caerdydd, yn 1973. Fe gadwodd Syr Gareth y crys o'r diwrnod hwnnw, ac ar Ddydd Gwener, 24 Chwefror, bydd y crys a llawer o rai eraill yn mynd i ocsiwn. Mae'n disgwyl i'r crys Barbariaid gael ei werthu am hyd at £200,000.

Gareth Edwards yn chwarae yn y crys enwog.

Ben Rogers Jones o gwmni arwerthwyr Rogers Jones sy'n gyfrifol am yr ociswn.

"I mi'n bersonol, mae arwerthu crysau eiconig Syr Gareth yn dod â chymysgedd o emosiynau yn ei sgil. Cyffro wrth gwrs, ychydig o nerfusrwydd, ymdeimlad o gyfrifoldeb a balchder aruthrol bod y teulu wedi ein penodi ni i ddod â chofroddion mor bwysig i'r farchnad.

"Gobeithio y gallwn sicrhau canlyniad record byd i'r teulu Edwards a gobeithio hefyd y bydd crys y Barbariaid 1973 yn aros yng Nghymru, yn ddelfrydol mewn amgueddfa."

Ben Rogers Jones o gwmni arwerthiant Rogers Jones gyda Syr Gareth Edwards a'r crys eiconig a wisgodd yn erbyn Seland Newydd ar 27 Ionawr, 1973.

Yn ogystal â chrys y Barbariaid, mae nifer o grysau eraill ar werth. Dyma rhai o grysau eraill y casgliad:

Crys Cymru a wisgwyd gan Gareth Edwards yng nghanol yr 1970au. Mae disgwyl iddo gael ei werthu am hyd at £10,000.

Yn 1967 fe deithiodd y Crysau Duon o amgylch Prydain, a'r agosaf y daethant i golli gêm oedd yn erbyn tîm Dwyrain Cymru; 3-3 oedd y sgôr terfynol. Ar y dde, crys Clwb Caerdydd a wisgodd Gareth Edwards yn ystod tymor 1976/77. Mae disgwyl i'r crysau yma gael ei gwerthu am £1,000-£2,000 yr un.

Crys Gareth Edwards o daith Y Llewod, 1974. Dyma'r ail grys mwyaf gwerthfawr yn y casgliad ac mae disgwyl iddo gael ei werthu am bris rhwng £20,000 a £25,000.

Ar y chwith mae crys tîm 'Cymru a Lloegr' o 1970 a chwaraeodd yn erbyn 'Yr Alban ac Iwerddon'. Cafodd y gêm ei drefnu i nodi can mlwyddiant Undeb Rygbi Lloegr. Yn 1974 fe chwaraeodd y ddau dîm eu gilydd unwaith eto, i nodi can mlwyddiant Undeb Rygbi Iwerddon.

Crysau dau o'r chwaraewyr gorau i Gareth Edwards wynebu; mewnwr y Crysau Duon yn 1969, Sid Going, a crys y cefnwr Andy Irvine o 1973. Gall gwerthiant crys Sid Going fynd at £12,000.

Crys mewnwr Awstralia, John Hipwell, o 1969 a chrys Semesa Sikivou o Ffiji, hefyd o 1969.

Crys dau fewnwr arall a wynebodd Gareth Edwards; Adolfo Etchegary o'r Ariannin (1976) a chrys Jerome Gallion o 1978.

Crys De Affrica Dawie De Villiers o 1968, a chrys yn anfarwol Syr Colin Meads pan chwaraeodd dros Barbariaid Seland Newydd yn 1973. Mae Meads yn arwr cenedlaethol yn Seland Newydd ac fe all y crys yma fynd am £5,000.