A dyna ni. Cynhadledd gymharol fer heddiw. Fe fyddwn ni'n ôl efo chi ar gyfer yr un nesaf ddydd Gwener.

Tan hynny, byddwch yn saff, a diolch am ddilyn.

Ceidwadwyr Cymreig

Dywed Janet Finch-Saunders o'r Ceidwadwyr Cymreig fod tensiynau "yn aruthrol" mewn llawer o gartrefi gyda rhieni a'u plant yn profi problemau iechyd meddwl o ganlyniad i'r pandemig.

"Mae plant yn profi anawsterau iechyd meddwl oherwydd eu bod yn colli eu ffrindiau yn yr ysgol, maen nhw'n colli eu teulu, ond hefyd mae'r rhieni eu hunain yn cael trafferth eu hunain, yn ceisio gweithio wrth ddysgu adref," meddai.

"Rwy’n credu ei bod yn deg dweud bod y tensiynau sydd wedi bod yn rhedeg ledled cartrefi wedi bod yn aruthrol."

Dywedodd ei bod yn falch y byddai plant iau yn dychwelyd i’r ysgol yr wythnos nesaf ond dywedodd y dylai Llywodraeth Cymru gael "cynllun absoliwt, amlinelliad clir iawn" ar gyfer rhieni a phlant hŷn ar gyfer y ffordd ymlaen ar gyfer dychwelyd i'r ysgol.

Llywodraeth Cymru

Dywed Eluned Morgan bod Llywodraeth Cymru'n awyddus iawn i weld plant yn dychwelyd i'r ysgol mor fuan â phosib.

Ychwanegodd bod pob diwrnod maen nhw'n parhau i fod i ffwrdd o'r ystafell ddosbarth yn "ddiwrnod o wastraff".

Mynnodd bod rhieni wedi gwneud "gwaith gwych" yn y cyfamser, ond bod elfen gymdeithasol yr ysgol a'r cymorth i ddisgyblion o gefndiroedd difreintiedig yn rhywbeth nad oedd modd ei efelychu.

Mae disgwyl rhagor o fanylion yn y gynhadledd i'r wasg ddydd Gwener am y cynllun i ailagor ysgolion yn llawn.

Ffynhonnell y llun, Getty Images

Llywodraeth Cymru

Dywed Llywodraeth Cymru y byddan nhw'n gwneud "yr hyn sy'n iawn i Gymru" o ran llacio cyfyngiadau.

Daeth sylwadau Eluned Morgan ar ôl i Brif Weinidog y DU, Boris Johnson, ddweud bod sgyrsiau’n parhau rhwng Llywodraethau Cymru a’r DU ynglŷn â dod allan o'r clo gyda'i gilydd.

"Ar adegau, mae [Llywodraeth y DU] yn hapus i gysylltu â ni yn eithaf dwys ac ar adegau eraill dydyn nhw ddim yn siarad â ni am fisoedd," meddai Ms Morgan.

"Mewn byd delfrydol, hoffem fod yn dod allan o'r cyfnod clo gyda'n gilydd, ond ar ddiwedd y dydd byddwn yn gwneud yr hyn sy'n iawn i ni yng Nghymru, a bydd hynny'n dibynnu ar gyfraddau'r haint a pha mor gyflym gallwn gyflwyno'r brechlyn, ac rydym yn gwneud yn anhygoel o dda yng Nghymru."

Aeth y Gweinidog ymlaen i ddweud y byddai'r penderfyniadau nesaf yn cael eu cyhoeddi ddydd Gwener ar ddiwedd yr adolygiad 21 diwrnod cyfredol.

Llywodraeth Cymru

Wrth ateb rhai o gwestiynau'r wasg, mae Eluned Morgan yn dweud y byddai Cymru yn llacio'r cyfnod clo ar yr un pryd â gweddill y DU "mewn sefyllfa ddelfrydol".

Ond pwysleisiodd na fyddan nhw'n "rhuthro" i ailagor y diwydiant twristiaeth erbyn dyddiad penodol fel penwythnos y Pasg.

"Rydyn ni yn Llywodraeth Cymru wedi bod yn benderfynol o sicrhau ein bod ni'n dilyn y dystiolaeth, dilyn y wyddoniaeth a dilyn y data," meddai.

"Dydy hynny ddim wastad wedi bod yn wir yn rhannau eraill y DU."

Ychwanegodd y byddai'n dda petai'r diwydiant twristiaeth yn medru ailagor mewn pryd i groesawu ymwelwyr o Lloegr, ond y byddai Cymru'n gwneud y "peth iawn i ni" er mwyn osgoi cynnydd arall mewn achosion.

Iechyd Cyhoeddus Cymru

Cafwyd 292 o brofion positif mewn cartrefi gofal yng Nghymru yn ystod yr wythnos ddiweddaraf - yr isaf a gofnodwyd ers dechrau mis Hydref.

Mae profi preswylwyr oedrannus mewn cartrefi gofal yn parhau, er gwaethaf y rhaglen frechu, oherwydd bod cynghorwyr gwyddonol yn credu y byddai'n rhy gynnar i roi'r gorau iddi.

Ledled Cymru, profwyd 31,872 o drigolion a staff yn ystod yr wythnos yn dechrau 8 Chwefror, fel rhan o’r drefn brofi wythnosol, yn ôl Iechyd Cyhoeddus Cymru.

O'r rheiny, profwyd 3,895 o breswylwyr cartrefi gofal ac roedd 110 (2.8%) yn bositif mewn canlyniadau o labordai'r GIG.

Hefyd, profodd 70 o weithwyr cartrefi gofal yn bositif, gyda mwy na 98% o'r profion yn negyddol.

Llywodraeth Cymru

Wrth droi at y celfyddydau, mae Ms Morgan yn cydnabod bod y flwyddyn ddiwethaf wedi bod "ymhlith yr anoddaf erioed" i'r sector.

Mae'r llywodraeth wedi rhoi £63m tuag at gefnogi'r diwydiant, meddai, gan grybwyll mentrau fel Ymddiriedolaeth Nant Gwrtheyrn sydd wedi manteisio.

Mae hi hefyd wedi dweud y bydd yr Urdd yn derbyn £1.3m ychwanegol "i helpu’r mudiad unigryw yma i ail adeiladu".

Bydd hynny'n helpu'r mudiad i ddiogelu a chreu hyd at 60 o swyddi newydd, a 300 o brentisiaethau newydd dros y dair blynedd nesaf.

Mae'r mudiad wedi dweud eu bod nhw wedi colli £14m o incwm yn ystod 2020, ac yn wynebu dyled o £3.5m.

Dywed yr Urdd mai dyma'r "cyfnod mwyaf heriol yn ei 98 mlynedd o hanes" gyda dros 160 aelod staff wedi gadael allan o gyfanswm o 328.

Llywodraeth Cymru

Gyda'r plant ifancaf yn dechrau dychwelyd i'r ysgol o wythnos nesaf ymlaen, mae Eluned Morgan yn dweud y bydd mwy yn medru gwneud hynny hefyd dros yr wythnosau nesaf "wrth i'r sefyllfa iechyd cyhoeddus wella".

Ond mae'n cydnabod fod dysgu o adref wedi bod yn her i lawer, gan gynnwys i rieni.

Oherwydd hynny, meddai, bydd Llywodraeth Cymru'n buddsoddi £15m yn rhagor mewn technoleg addysg dros y flwyddyn nesaf i wella cysylltedd ysgolion a'u disgyblion.

Llywodraeth Cymru

Mae Ms Morgan yn mynd ymlaen i drafod effaith y pandemig ar blant a’r sector greadigol, dau grŵp sydd "wedi dioddef mewn ffordd hynod yn ystod y flwyddyn ddiwethaf".

Mewn arolwg diweddar o dros 20,000 o blant, cafodd sawl peth eu hamlygu sydd wedi effeithio ar bobl ifanc Cymru a'u gwneud nhw'n "rhwystredig a blin" am effaith y pandemig.

Yn eu plith roedd:

• methu ffrindiau a theulu a methu allan ar brofiadau;
• pryder plant yn eu harddegau am arholiadau a'u dyfodol;
• bron i draean o bobl ifanc 17 ac 18 oed yn dweud eu bod yn bryderus y rhan fwyaf o'r amser;
• cyfraddau unigrwydd yn uchel.

Llywodraeth Cymru

Mae Eluned Morgan yn dechrau'r gynhadledd heddiw drwy grybwyll y ffigyrau brechu diweddaraf yng Nghymru.

Bellach mae dros 807,000 o bobl - bron i un o bob tri oedolyn yng Nghymru - wedi cael eu dos cyntaf.

Dywedodd Ms Morgan fod cynnydd o 80% wedi bod hefyd yn y nifer gafodd eu hail ddos ddoe.

Mae modd gwylio hefyd ar S4C drwy'r iPlayer.

Iechyd Cyhoeddus Cymru

Cafodd 374 o achosion newydd a 30 yn rhagor o farwolaethau eu cofnodi gan Iechyd Cyhoeddus Cymru yn y ffigyrau dyddiol diweddaraf.

Mae'n golygu fod nifer yr achosion positif yng Nghymru ers dechrau'r pandemig wedi mynd heibio i 200,000 - ar 200,166.

Yn y cyfamser, mae 807,351 o bobl bellach wedi cael un dos o'r brechlyn Covid - bron i un ymhob tri oedolyn.

Mae 12,988 wedi cael dau ddos - cynnydd o bron i 80% yn y 24 awr ddiwethaf, medd Llywodraeth Cymru.

Mae cyfradd yr achosion positif dros saith diwrnod wedi gostwng eto i 86 fesul 100,000 o'r boblogaeth.

Mae hunan-ynysu wedi costio cannoedd o bunnoedd mewn cyflogau i bobl sydd ddim yn gallu hawlio cymorth ariannol, yn ôl ymchwil gan y BBC.

Daw wrth i Lywodraeth Cymru gyhoeddi y bydd y cynllun grant hunan-ynysu o £500 yn cael ei ehangu fel bod mwy o bobl yn gymwys i'w hawlio.

Roedd incwm teuluol Tracy Moore o Dreffynnon wedi gostwng £700 yn y mis diwethaf, a dywedodd wrth raglen Wales Live bod rhywbeth o'i le ar y system gymorth.

Mae'r llywodraeth yn credu y bydd y newidiadau yn caniatáu i 170,000 yn rhagor o bobl fod yn gymwys i gael y grant.

Ffynhonnell y llun, Tracy Moore

Ymateb Dr Dylan Jones o Ysgol Gwyddorau Meddygol Prifysgol Bangor i'r amrywiolyn Covid-19 diweddaraf.

Mae gwyddonwyr wedi dod o hyd i amrywiolyn newydd arall o'r coronafeirws yn y DU sy'n newid mewn ffyrdd all fod yn destun pryder.

Mae'r amrywiolyn B.1.525 yn ymddangos yn debyg i amrywiolyn De Affrica, a arweiniodd at brofion ar garreg y drws mewn rhai ardaloedd.

Hyd yma mae ymchwilwyr ym Mhrifysgol Caeredin wedi canfod 38 o achosion - dau yng Nghymru a 36 yn Lloegr - mewn samplau sy'n dyddio'n ôl i fis Rhagfyr.

Dywedodd Iechyd Cyhoeddus Cymru bod gan y ddau achos o Gymru gysylltiad â theithio i Nigeria.

Diolch am ymuno efo ni heddiw ar gyfer cynhadledd Llywodraeth Cymru.

Eluned Morgan, Gweinidog Iechyd Meddwl, Llesiant a'r Gymraeg, fydd yn arwain heddiw.

Arhoswch efo ni.