...wel, mae'r gynhadledd ei hun wedi gorffen ers bron i awr, ond dyna ddiwedd yr ymateb am rŵan hefyd.

Am hyd yn oed mwy o ymateb, ac am y newyddion diweddaraf, ewch i hafan Cymru Fyw. Dyma'r prif benawdau a ddaeth o'r gynhadledd heddiw:

• Llywodraeth Cymru yn bwriadu cynnig brechlyn Covid i bob oedolyn erbyn diwedd mis Gorffennaf;
• Nifer yr achosion yng Nghymru bellach ar eu hisaf ers diwedd Medi'r llynedd;
• Grwpiau blaenoriaethu ar gyfer y brechlyn bellach yn cynnwys gofalwyr di-dâl a phobl gydag anawsterau dysgu neu salwch meddwl difrifol;
• Mae mwy na 878,500 o bobl yng Nghymru wedi cael dos cyntaf o frechlyn Covid hyd yma.

Ac ar hynny, hwyl fawr iawn i chi, a diolch am ddilyn.

Ceidwadwyr Cymreig

Dywedodd Janet Finch-Saunders - yr Aelod o'r Senedd dros y Ceidwadwyr yn Aberconwy - fod y newyddion y byddai pob oedolyn yng Nghymru yn cael cynnig y brechlyn coronafeirws erbyn diwedd mis Gorffennaf yn newid "enfawr".

Ond dywedodd wrth i fwy o bobl gael eu brechu "felly hefyd y bydd y disgwyliadau hynny'n tyfu".

Roedd hefyd yn "siomedig iawn" bod Vaughan Gething wedi bod yn "amwys" yn y gynhadledd newyddion am ymweliadau â chartrefi gofal.

"Mae pobl wedi dioddef yn fawr o ganlyniad i beidio â gweld eu hanwyliaid sy’n agored iawn i niwed yn y cartrefi gofal hynny," meddai wrth BBC Cymru.

"Mae Lloegr eisoes wedi gwneud y cyhoeddiadau ynghylch caniatáu ymweliadau ym mis Mawrth."

Plaid Cymru

Dywedodd Delyth Jewell, AS Plaid Cymru Dwyrain De Cymru, ei bod yn croesawu cyhoeddiad y gweinidog iechyd y byddai canllawiau yn cael eu cyhoeddi ynglŷn â blaenoriaethu'r brechlyn ar gyfer pobl gydag anawsterau dysgu neu salwch meddwl difrifol, a gofalwyr di-dâl.

"Gallai hyn wneud gwahaniaeth mawr," meddai, "mae hwn yn ddiwrnod cyffrous i'r holl ymgyrchwyr sydd wedi bod yn brwydro mor galed am newid yn y polisi.

"Pe bai ni'n edrych ar nifer trigolion cartrefi gofal gydag anawsterau dysgu rydym yn sôn am o bosib 3,500 o bobl - byddai hynny tua 10% o frechiadau sy'n cael eu rhoi mewn diwrnod yng Nghymru," meddai.

Dywedodd ei bod wedi bod yn ymgyrchu dros y newid am nifer o wythnosau ac yn cwestiynu "pan nad oedd modd rhoi’r sicrwydd i deuluoedd bythefnos yn ôl".

Dylai pobl gydag asthma a chlefydau eraill yr ysgyfaint fod yn flaenoriaeth yng nghymal nesaf y rhaglen frechu rhag Covid-19, yn ôl partneriaeth sy'n cynrychioli dioddefwyr.

Mae cleifion sydd â'r symptomau mwyaf difrifol wedi'u cynnwys o fewn y grwpiau blaenoriaeth ond mae'r Sefydliad Ysgyfaint Prydeinig ac Asthma UK yn poeni bod y gweddill yn syrthio trwy fylchau'r rhaglen frechu.

Maen nhw'n pwyso ar bedair llywodraeth y DU i sicrhau fod pob dioddefwr asthma yn cael ei cynnwys yng ngrwpiau blaenoriaeth 4 neu 6 y rhaglen.

Dywed Llywodraeth Cymru fod pobl â symptomau difrifol o'r fogfa yn cael blaenoriaeth gan fod mwy o berygl iddyn nhw petaen nhw'n dal y feirws.

Ffynhonnell y llun, Getty Images

Llywodraeth Cymru

Wrth ymateb i gwestiwn ynglŷn â chartrefi gofal, dywedodd Mr Gething yn y gynhadledd nad oedd yn gallu dweud pryd fydd pobl yn gallu dechrau ymweld ag anwyliaid unwaith eto.

Fe wnaeth Mr Gething gyfeirio at y "niwed aruthrol" sy'n cael ei achosi pan mae'r feirws yn ymledu i gartrefi gofal.

"Ni allaf ragdybio'r nifer o ddyddiau nac wythnosau pan fydd y cyngor yma yn newid, ond dyw hyn ddim yn fater o'r brechlyn yn unig, mae angen ystyried y llwyddiant wrth rwystro'r feirws ledled y wlad.

"Y lleiaf yw lefel y feirws, y mwyaf tebygol y byddwn yn gweld newidiadau i'r rheolau ynglŷn ag ymweld."

Dywedodd hyd yn oed pe bai yna benderfyniad i ailddechrau ymweliadau, byddai hynny yn y pendraw yn benderfyniad i'r cartref unigol.

Ychwanegodd fod Llywodraeth Cymru wedi buddsoddi mewn cynllun profion cyflym ar gyfer cartrefi gofal er mwyn gwneud y broses o ymweld yn fwy diogel.

Ffynhonnell y llun, Getty Images

Llywodraeth Cymru

Beth oedd ymateb Vaughan Gething i gwestiwn am y 'map ffordd'?

Wel, dywedodd nad ydy penderfyniad Llywodraeth y DU i ailagor ysgolion i bob plentyn yn Lloegr ar yr un pryd yn unol â chyngor meddygol a gwyddonol.

"Nid yw’r cyngor gan y prif swyddogion meddygol a chyngor tystiolaeth wyddonol yn ddim gwahanol yn y DU mewn gwirionedd," meddai.

"Yr hyn y mae Lloegr wedi dewis ei wneud serch hynny yw symud i ffwrdd o'r cyngor o gael dull mwy graddol o ailagor ysgolion, a chael rhyw 'big bang' o ailagor i bawb ar yr 8fed o Fawrth."

Dywedodd Mr Gething hefyd mai ei ddewis o hyd oedd cymryd agwedd ar y cyd gyda gweddill y DU tuag at leddfu cyfyngiadau cymaint â phosib.

Ond honnodd na gafodd Llywodraeth Cymru wybod am fanylion map ffordd y Prif Weinidog, Boris Johnson ar gyfer Lloegr tan y diwrnod y cawson nhw eu cyhoeddi.

Ffynhonnell y llun, Getty Images

Llywodraeth Cymru

Dywed Gweinidog Iechyd Cymru ei fod yn disgwyl i fwy o ganllawiau gael eu cyhoeddi gan y JCVI yn ystod y dyddiau nesaf ynglŷn â blaenoriaethu brechiadau ar gyfer pobl dan 50 oed.

Wrth siarad yn y gynhadledd, dywedodd Vaughan Gething: "Rydyn ni wedi gofyn cwestiynau fel y mae llywodraethau eraill yn y DU ynghylch a ddylid blaenoriaethu o fewn [y grŵp yna].

"Pan ddaw'r cyngor, fe gewch chi ymateb uniongyrchol gan y llywodraeth o fewn cyfnod byr," meddai.

Llywodraeth Cymru

Fe fydd cyllideb Llywodraeth Cymru, fydd yn cael ei gyhoeddi cyn hir, yn ystyried y pwysau ychwanegol sydd wedi ei roi ar gyflwr iechyd meddwl pobl o ganlyniad i'r pandemig, meddai'r gweinidog iechyd.

Dywedodd Mr Gething fod cynnydd sylweddol wedi bod yn yr arian sydd eisoes yn cael ei roi i gefnogi gwasanaethau iechyd meddwl yng Nghymru, gan addo y byddai hyn yn parhau yn y flwyddyn ariannol nesaf.

"Wrth i ni roi mwy o arian i'r gwasanaethau yma...fe fydd yn rhaid i'r arian rydym yn cynllunio ei roi i'r gyllideb ar gyfer y flwyddyn nesa gymryd i ystyriaeth y cynnydd mewn gofynion o ran iechyd meddwl," meddai.

Ychwanegodd fod cyfnod y pandemig wedi gweld cynnydd mawr yn y modd mae gwasanaethau ar gyfer cyflwr iechyd ac iechyd meddwl pobl yn cael ei ddarparu.

Golygai hyn, meddai, y byddwn "â dulliau llawer gwell o ran darparu ystod o wasanaethau yn y dyfodol".

Mae mwy na 878,500 o bobl yng Nghymru wedi cael dos cyntaf o frechlyn Covid, tra bod bron i 60,000 bellach wedi cael y cwrs llawn.

Yn y ffigyrau diweddaraf ar gyfer dydd Mawrth cafodd 8,853 ddos ​​gyntaf; a derbyniodd 9,550 eu hail ddos - y mwyaf mewn diwrnod hyd yma.

Mae data Iechyd Cyhoeddus Cymru yn dangos bod 27.9% o'r boblogaeth wedi cael dos cyntaf ac 1.88% wedi cael brechiad llawn.

Mae 60,801 o bobl yn y grwpiau blaenoriaeth uchaf (1 i 4) heb gael neu heb gymryd dos cyntaf o hyd.

Bellach mae cyfanswm o 878,506 o bobl wedi cael eu dos cyntaf o'r brechlyn. Mae 59,279 arall wedi cael y brechlyn llawn.

Llywodraeth Cymru

Dywedodd Mr Gething y byddai Llywodraeth Cymru heddiw yn cyhoeddi canllawiau fydd yn ceisio cynyddu niferoedd grwpiau penodol fydd yn derbyn y brechlyn.

Mae'r grwpiau yn cynnwys gofalwyr di-dâl a phobl gydag anawsterau dysgu neu salwch meddwl difrifol.

Dywedodd Mr Gething fod grŵp yma o bobl yn un mawr "ac fe allai gymryd peth amser i'r gwasanaeth iechyd yng Nghymru gynnig apwyntiadau i bawb".

"Ond plîs byddwch yn ymwybodol fod y gwasanaeth iechyd yn gweithio yn galed ac na fydd yna unrhyw un yn cael ei anghofio."

Ffynhonnell y llun, Shuttershock

Ychwanegodd Mr Gething fod y llywodraeth eisoes wedi adolygu eu cynlluniau ar gyfer "ailagor yr economi a chymdeithas" yng ngoleuni'r rhaglen frechu ond hefyd yn wyneb ymddangosiad amrywiolion newydd.

Dywedodd wrth y gynhadledd eu bod yn astudio cynlluniau Lloegr a'r Alban yn ofalus ac yn adeiladu ar y dystiolaeth diweddara sydd ar gael am y ffordd mae'r feirws yn ymledu.

"Yma yng Nghymru, fe fyddwn o hyd yn cymryd penderfyniad sydd er budd pobl Cymru," meddai.

Mae'r pwyllgor sy'n cynghori llywodraethau'r DU - JCVI - wedi rhoi'r cyngor diweddaraf yn sgil ple gan y DJ Jo Whiley i bobl fel ei chwaer, Frances, gael eu brechu cyn gynted â phosib.

Cynigiwyd y brechlyn i Whiley o flaen ei chwaer, sydd â syndrom genetig prin ac sy'n byw mewn gofal preswyl.

Mae Llywodraeth Cymru wastad wedi mynnu y byddan nhw'n dilyn cyngor JCVI.

Llywodraeth Cymru

Mae'r Gweinidog Iechyd, Vaughan Gething wedi cyhoeddi bod Llywodraeth Cymru yn bwriadu cynnig brechlyn Covid i bob oedolyn erbyn diwedd mis Gorffennaf.

Dywedodd fod hynny yn amodol ar gael cyflenwad mewn da bryd.

Bydd mwy o fanylion ar newidiadau i'r rhaglen frechu yn cael eu cyhoeddi'r wythnos hon, meddai.

Ond dywedodd - eto, yn amodol ar gyflenwad - y byddai pawb yn y grwpiau blaenoriaeth 5 i 9 yn cael cynnig brechiad erbyn canol mis Ebrill.

Mae'r rhain yn cynnwys:

• Pawb rhwng 50 a 69 oed;
• Pawb dros 16 oed sydd â chyflwr iechyd sylfaenol sy'n eu rhoi mewn mwy o berygl o salwch difrifol gyda coronafeirws;
• "Llawer" o ofalwyr di-dâl sy'n darparu gofal i rywun sy'n agored i niwed clinigol i'r feirws.

Llywodraeth Cymru

Dywed Mr Gething fod y llywodraeth am "ehangu profion yn y gweithle a'r gymuned" a chyflymu'r rhaglen frechu.

"Rydyn ni'n gwybod bod tua un o bob tri o bobl sydd â coronafeirws yn dangos dim symptomau ac yn lledaenu'r feirws yn ddiarwybod," meddai.

"Trwy brofi pobl yn y gweithle yn aml gallwn adnabod pobl asymptomatig a'u cysylltiadau yn gyflymach ac, yn hanfodol, helpu i leihau lledaeniad y feirws ofnadwy hwn.

"Mae profion rheolaidd ar gyfer ein gweithlu iechyd a gofal cymdeithasol eisoes wedi cychwyn, ac rydym bellach yn ymestyn hyn i brofi staff sy'n gweithio mewn lleoliadau gofal plant, ysgolion a cholegau addysg bellach.

"Bydd y cynlluniau hyn yn golygu bod dros 250,000 o weithwyr ledled Cymru yn cael mynediad at brofion wythnosol gan ddefnyddio profion sy'n rhoi canlyniadau mewn llai na hanner awr."

Ffynhonnell y llun, Getty Images

Mae'r fframwaith newydd, a gyhoeddwyd heddiw, yn ymestyn y profion cyflym a rheolaidd yma i sefydliadau cyhoeddus a phreifat gyda mwy na 50 o weithwyr, meddai Mr Gething.

O'r wythnos nesaf ymlaen, ychwanegodd, bydd profion cymunedol yn cychwyn mewn rhannau o Ben-y-bont ar Ogwr, Merthyr Tudful a Rhondda Cynon Taf.

Rhybuddiodd y byddai'n bosib i'r ffigyrau achosion godi yn sgil ehangu'r cynllun profi.

Nid yw hynny "o reidrwydd" yn beth drwg, meddai.

Llywodraeth Cymru

Mae'r Gweinidog Iechyd, Vaughan Gething wedi dechrau'r gynhadledd drwy ddweud ei bod yn "bleser" gweld plant yn dychwelyd i'r ysgol yr wythnos hon.

Dywedodd fod y sefyllfa yn parhau i wella yng Nghymru, ac mae nifer yr achosion bellach ar eu hisaf ers diwedd Medi'r llynedd.

Mae yna 76 achos fesul 100,000 o bobl ar gyfartaledd drwy Gymru gyfan ar hyn o bryd, meddai.

"Mae'r achosion yn gostwng yn y rhan fwyaf o lefydd yng Nghymru ac mae'r rhif R rhwng 0.6 a 0.9," meddai.

Ychwanegodd fod mwy na 878,000 o bobl bellach wedi derbyn un dos o'r brechlyn Covid-19.

Mae hefyd modd gwylio'n fyw yma ar iPlayer.

Llywodraeth y DU

Mae Ysgrifennydd Cymru, Simon Hart wedi amddiffyn penderfyniad Boris Johnson y dylai pob disgybl yn Lloegr ddychwelyd i'r ystafell ddosbarth ar 8 Mawrth.

Dywedodd Mr Hart fod y penderfyniad yn "bendant yn cydymffurfio" gyda chyngor gwyddonol.

Mae Gweinidog Iechyd Cymru, Vaughan Gething wedi dweud na fyddai cam o'r fath yn ddiogel.

Mae'n bosib na fydd rhai o ddisgyblion uwchradd Cymru yn dychwelyd i'r ysgol tan ar ôl gwyliau'r Pasg.

Ffynhonnell y llun, Getty Images

Iechyd Cyhoeddus Cymru

Roedd 13 o farwolaethau a 236 o achosion newydd o coronafeirws yng Nghymru, yn ôl y ffigyrau dyddiol diweddaraf.

Mae Iechyd Cyhoeddus Cymru wedi cofnodi cyfanswm o 202,560 o achosion hyd yma, a 5,263 o farwolaethau ers dechrau'r pandemig.

Ond mae'n debygol fod y ffigyrau yma'n uwch mewn gwirionedd.

Mae cyfradd yr achosion wedi gostwng eto i 76 fesul 100,000 o'r boblogaeth.

Mae 878,506 o bobl bellach wedi cael un dos o'r brechlyn, gyda 59,279 wedi derbyn yr ail ddos.

Disgwyl sawl tribiwnlys cyflogaeth wrth i gwmnïau ystyried polisi 'dim brechlyn, dim swydd'.

Mae menyw a gollodd ei gŵr 10 mis ar ôl y tro diwethaf iddyn nhw fedru dal dwylo'i gilydd wedi sôn am y "creulondeb" o beidio caniatáu ymweliadau i gartrefi gofal.

Bu farw gŵr Lynn Parker, Alistair, ychydig cyn y Nadolig mewn cartref gofal yng Nghaerffili.

Dywedodd hi ei fod wedi "rhoi'r gorau iddi" wedi 10 mis o fethu dal llaw ei wraig gan mai hi oedd ei "linell bywyd".

Dywedodd Llywodraeth Cymru eu bod yn ystyried caniatáu mwy o ymweliadau dan do nawr bod y brechlyn yn cael ei ddosbarthu.

Darllenwch ein prif stori yn llawn yma.

Ffynhonnell y llun, Llun teulu

Diolch am ymuno efo ni heddiw ar gyfer cynhadledd Llywodraeth Cymru.

Y Gweinidog Iechyd, Vaughan Gething, fydd yn dod â'r diweddaraf i ni heddiw o 12:15.

Arhoswch efo ni.