Dyna ddiwedd y Cwestiynau i'r Prif Weinidog.

Diolch am ddilyn - ymunwch â ni eto yr wythnos nesaf.

Bydd y Senedd yn cael ei goleuo unwaith eto yn lliwiau glas a melyn baner Wcráin heno, fel arwydd o undod â hwy.

Da boch chi.

Ffynhonnell y llun, Senedd Cymru

Mae Lesley Griffiths yn mynegi siom ynghylch y "cythrwfl o'r hyn a wnaeth y gyllideb fach ddydd Gwener diwethaf", gan ychwanegu "mae'n anhygoel yr anhrefn sydd wedi'i achosi gan Liz Truss, dim ond ychydig ddyddiau ar ôl symud i Rif 10."

Plymiodd y bunt yn erbyn y ddoler ddydd Llun ar ôl sylwadau dros y penwythnos gan y Canghellor Kwasi Kwarteng yn addo mwy o doriadau treth, ar ben cyllideb fach ddydd Gwener pan gyhoeddodd y toriadau treth mwyaf ers 50 mlynedd.

Dros nos, sefydlogodd y bunt ar $1.08 ar ôl cyrraedd y lefel isaf erioed o $1.03 ddydd Llun.

"Dwi'n meddwl ei bod hi'n anffodus iawn nad yw'r prif weinidog [Liz Truss] wedi codi'r ffôn i'r prif weinidog," meddai'r Trefnydd Lesley Griffiths.

"Does ganddi hi ddim byd i'w ofni; mae'n berson rhwydd iawn i ddelio ag ef."

Ffynhonnell y llun, Getty Images

O ran rôl Llywodraeth Cymru yn ymchwiliad Covid-19 y DU, nid yw Lesley Griffiths yn derbyn honiad Rhun ap Iorwerth y bydd diffyg craffu heb ymchwiliad i Gymru yn unig.

Mae hi’n dweud bod “gan Lywodraeth Cymru rôl uniongyrchol wrth osod y cylch gorchwyl ar gyfer ymchwiliad Covid-19 y DU. Nawr bod yr ymchwiliad wedi’i sefydlu’n ffurfiol, bydd Llywodraeth Cymru yn rhoi tystiolaeth sylweddol iddo, er mwyn galluogi’r camau a gymerwyd yng Nghymru i gael eu craffu’n iawn.”

Ffynhonnell y llun, Getty Images

Mae arweinydd Plaid Cymru Adam Price yn galw ar Lywodraeth Cymru i rewi rhenti dros y gaeaf a fyddai, meddai, yn amddiffyn miloedd o bobl rhag costau tai cynyddol.

Mae’n esbonio, “Mae Llywodraeth yr Alban hefyd wedi cyhoeddi rhewi rhenti o leiaf tan ddiwedd mis Mawrth y flwyddyn nesaf. Mae Sadiq Khan, fel Maer Llundain, wedi gofyn am y pŵer i gyflwyno rhewi rhenti yno. Mae’r pŵer hwnnw gennym eisoes yng Nghymru, a chan na fydd rhent tai cymdeithasol yn cynyddu beth bynnag tan 1 Ebrill, ni fydd rhewi rhenti dros y gaeaf yn costio ceiniog i Lywodraeth Cymru; mae’n canolbwyntio ar y sector preifat.”

Mae'r Trefnydd Lesley Griffiths yn rhybuddio "ei bod hi'n bwysig nad ydych chi wedyn yn cael landlordiaid yn cymryd tai i'w rhentu oddi ar y farchnad yn sydyn, a chael y canlyniadau anfwriadol hynny."

Ychwanegodd fod Llywodraeth Cymru wedi buddsoddi mewn cymorth costau byw wedi’i dargedu a rhaglenni cyffredinol sy’n rhoi arian yn ôl ym mhocedi pobl.

Mae Andrew RT Davies, arweinydd y Ceidwadwyr Cymreig yn y Senedd, yn codi mater amseroedd aros, yn enwedig ym mwrdd iechyd Betsi Cadwaladr.

Dywed Mr Davies, "yr wythnos diwethaf cawsom yr amseroedd aros ar gyfer y GIG yng Nghymru. Yn y gogledd, y chi yw'r gweinidog sy'n uniongyrchol gyfrifol amdano, mae 15,000 o bobl yn aros dwy flynedd neu fwy am driniaeth. A wnewch chi ymddiheuro i'r 15,000 o bobl sy'n aros mor hir ar y GIG yng Nghymru?"

Mae'n gofyn i'r gweinidog dair gwaith i ymddiheuro am yr amseroedd aros, ac yn y trydydd ateb mae Lesley Griffiths yn dweud "mae'n ddrwg gennym fod pobl yn gorfod aros am amser hir".

Mae hi'n dweud bod "rhestrau aros ar draws y DU", gan ychwanegu "ein bod ni'n benderfynol o fynd i'r afael â'r ôl-groniad".

Roedd bwrdd iechyd Betsi Cadwaladr o dan fesurau arbennig, o dan reolaeth uniongyrchol Llywodraeth Cymru, o haf 2015 tan fis Tachwedd 2020.

Mae methiannau pellach wedi'u nodi ers hynny ac o drwch blewyn mae wedi osgoi cael ei roi yn ôl i fesurau arbennig ers hynny.

Mae ysbytai'r bwrdd iechyd yn cynnwys Ysbyty Glan Clwyd ym Modelwyddan, Ysbyty Maelor Wrecsam ac Ysbyty Gwynedd ym Mangor.

Ym mis Mehefin, fe gyhoeddodd y Gweinidog Iechyd Eluned Morgan fod Ysbyty Glan Clwyd, yn enwedig ei wasanaethau fasgwlaidd a'i ofal brys, wedi cael ei roi mewn "ymyrraeth wedi'i thargedu".

Dyma'r ail lefel uchaf o oruchwyliaeth gan Lywodraeth Cymru.

Mae’r Ceidwadwr Joel James yn honni “ein bod ni mewn argyfwng gydag addysg gwyddoniaeth yng Nghymru oherwydd y diffyg athrawon mewn ffiseg a chemeg. Erbyn hyn mae gan Gymru gyn lleied o athrawon ffiseg fel nad oes digon i bob ysgol uwchradd yng Nghymru gael un, sy'n golygu bod y wyddoniaeth hon bron yn cael ei haddysgu'n bennaf gan athrawon nad oes ganddynt unrhyw gymwysterau yn y maes pwnc."

Ychwanegodd y "gallai'r sefyllfa hon gael ei disgrifio fel embaras cenedlaethol i Gymru".

Mae'r Trefnydd Lesley Griffiths yn ateb, "Nid wyf yn cydnabod y darlun yr ydych yn ei bortreadu. Yn sicr nid wyf yn meddwl bod athrawon ffiseg a'r gair 'argyfwng' yn mynd gyda'i gilydd ac yn sicr nid wyf yn meddwl bod y Gweinidog dros Addysg a'r Gymraeg yn cytuno gyda chi chwaith."

Fodd bynnag, mae'n cydnabod bod recriwtio "myfyrwyr sy'n astudio i addysgu ffiseg yn parhau i fod yn is na'r sefyllfa a ddymunir".

Ffynhonnell y llun, Science Photo Library

Prynhawn da, croeso i'n darllediad byw o bedwerydd sesiwn ar hugain y Cwestiynau i'r Prif Weinidog yn 2022.

Mae'r Trefnydd Lesley Griffiths yn ateb cwestiynau ar ran y Prif Weinidog Mark Drakeford.

Esboniodd llefarydd ar ran Llywodraeth Cymru bod y prif weinidog "yn ymweld â’r Alban heddiw i gwrdd â Phrif Weinidog yr Alban. Bydd hefyd yn ymweld â phrosiectau yno sydd yn helpu pobl wrth i gostau byw godi."

Cynhelir y cyfarfod llawn ar ffurf hybrid, gyda rhai aelodau yn Siambr y Senedd ac eraill yn ymuno drwy gyswllt fideo.