Dyna ddiwedd y Cwestiynau i'r Prif Weinidog.

Diolch am ddilyn - ymunwch â ni eto yr wythnos nesaf.

Bydd y Senedd yn cael ei goleuo unwaith eto yn lliwiau glas a melyn baner Wcráin heno, fel arwydd o undod â hwy.

Da boch chi.

Ffynhonnell y llun, Senedd Cymru

Mae'r Ceidwadwr Darren Millar yn cyhuddo Llywodraeth Cymru o fethu â sicrhau bod gan Gonwy a Sir Ddinbych ystâd GIG sy'n "addas i'r pwrpas".

Dywed Mr Millar, “pan oeddech yn weinidog iechyd yn ôl yn 2013, fe wnaethoch addo i bobl gogledd sir Ddinbych ac, yn wir, gogledd-ddwyrain Conwy, yn fy etholaeth i, y byddai ysbyty cymunedol newydd, a fyddai’n cael ei adeiladu yn y Rhyl... rydym dros naw mlynedd ar ôl eich cyhoeddiad, ac nid oes gennym ysbyty cymunedol yng ngogledd Sir Ddinbych o hyd."

Atebodd y prif weinidog, "Roeddwn yn falch o gymeradwyo'r achos amlinellol strategol a gyflwynwyd gan y bwrdd iechyd pan oeddwn yn weinidog iechyd. Dywedodd y gallai'r cyfleuster newydd gael ei ddarparu ar gost o £22 miliwn. Erbyn i fy nghyd-Aelod Vaughan Gething gymeradwyo yr achos busnes amlinellol yn 2018, roedd y gost wedi codi i £40 miliwn. Mae papurau Bwrdd Iechyd Prifysgol Betsi Cadwaladr sy’n adrodd ar yr achos busnes llawn yn dweud ei fod bellach wedi codi i £64 miliwn, ac roedd hynny ar ddiwedd 2020, felly gallwn fod yn gwbl hyderus ei fod ymhell dros £64 miliwn. Felly, mae cost y cynllun wedi codi mwy na theirgwaith yr amcangyfrif cost gwreiddiol."

Mae'r prif weinidog yn dweud ei bod er budd cyflogwyr, yn ogystal â'r unigolion, i ganiatáu amser i staff fynychu rhaglenni sgrinio'r GIG ledled Cymru.

Mae'n rhoi enghraifft o effeithiolrwydd y rhaglenni hynny.

"Os bydd rhywun â chanser y coluddyn yn cael y canser hwnnw wedi'i ganfod fel sgil-gynnyrch ymyrraeth frys yn eu bywydau oherwydd pethau eraill sydd wedi mynd o'i le, bydd pump o bob 10 o'r bobl hynny yn goroesi. Os bydd eu meddyg teulu yn rhoi'r diagnosis, bydd saith o bob 10 o'r bobl hynny yn goroesi. Os canfyddir canser y coluddyn o ganlyniad i sgrinio, bydd naw o bob 10 o bobl yn goroesi."

Ffynhonnell y llun, Getty Images

Mae arweinydd Plaid Cymru Adam Price yn beirniadu plaid Lafur y DU am ymrwymo i gadw at gynlluniau treth y Ceidwadwyr.

Ac ar bwnc troeon pedol gwleidyddol, dywed Mr Price "dair wythnos yn ôl, dywedodd Keir Starmer na fyddai Llafur yn gwrthdroi'r toriad i gyfradd sylfaenol treth incwm, byddai'n beth anghywir i'w wneud. Nawr, y bore yma, dywedodd canghellor yr wrthblaid fod Llafur yn cefnogi rhoi'r polisi yn y bin. Felly, wrth gefnogi tro pedol y Torïaid, mae Llafur wedi perfformio tro pedol ei hun."

Mae'r prif weinidog yn dweud "bydd y llywodraeth Lafur nesaf yn etifeddu'r trafferthion sydd wedi eu creu yn ystod y tair wythnos ddiwethaf. Mae'r tair wythnos diwethaf wedi newid y cyd-destun y mae'n rhaid gwneud penderfyniadau ynddo".

Mae'r prif weinidog yn dyfynnu enghreifftiau lle mae'n dweud y byddai Llafur yn wahanol, megis treth ffawdelw ar gwmnïau ynni.

Mae Andrew RT Davies, arweinydd y Ceidwadwyr Cymreig yn y Senedd, yn cyfeirio at achosion diweddar pan "na allai ambiwlansys droi i fyny i ddigwyddiadau difrifol".

Cyfeiriodd Mr Davies at ddwy enghraifft o arosiadau hir, gan gynnwys stori ar Walesonline am ddyn oedd yn aros ar lawr am 15 awr.

Darllenodd ddyfyniadau gan ferch y dyn yn cyhuddo Cymru o gael gwasanaeth iechyd fel "gwlad trydydd byd" ac y byddai Aneurin Bevan, y gweinidog Llafur a oruchwyliodd y gwaith o greu'r GIG, yn troi yn ei fedd.

Mewn ymateb, cyhuddwyd Mr Davies gan Mr Drakeford o fod yn "rhannol gyfrifol am y llanast rydyn ni ynddo" oherwydd ei fod wedi cefnogi Liz Truss ar gyfer arweinyddiaeth y Ceidwadwyr.

Mae'r prif weinidog yn cydnabod bod "y system dan bwysau aruthrol" ond mae'n rhybuddio y bydd "toriadau i'r gwasanaeth iechyd" gan y Ceidwadwyr yn cynyddu'r pwysau hwnnw.

Dywedodd Mr Drakeford ei bod yn "syfrdanol eich bod yn meddwl y gallwch ddod yma'r prynhawn yma gyda'r llanast y mae eich plaid wedi'i wneud, i gyllidebau'r wlad hon, i enw da'r wlad hon ledled y byd".

Gan droi tudalennau ei nodiadau briffio yn ddig, dywedodd wrth Mr Davies: "Rydych chi'n meddwl y gallwch chi droi i fyny yma'r prynhawn yma a hawlio rhyw fath o dir uchel moesol? Pa fath o fyd ydych chi'n perthyn iddo?"

Mae yna olygfeydd hynod wrth i’r prif weinidog ac Andrew RT Davies weiddi’n ddig ar ei gilydd, gyda’r Llywydd Elin Jones yn galw arnynt i ymdawelu.

Mae'r prif weinidog yn beirniadu "syniadau sydd wedi methu" y Prif Weinidog Liz Truss.

Mae'n dweud mai un enghraifft o'r "arbrawf a fethwyd" yw "yma yng Nghymru, yr adeg hon y flwyddyn nesaf, bydd y person cyffredin â morgais yn talu £2,300 yn fwy mewn blwyddyn nag y byddent pe bai cyfraddau llog yn aros lle'r oedden nhw yn y chwarter presennol".

Mae’n tynnu sylw at y ffaith bod y Sefydliad Astudiaethau Cyllid (IFS) yr wythnos diwethaf yn dweud y byddai toriad o 15 y cant mewn gwariant cyhoeddus. Dywed y byddai "hyn nid ar ôl degawd o dwf, ond ar ôl degawd o lymder. Ni all neb gymryd arno y gall pobl yng Nghymru gael eu cysgodi rhag hynny."

Mae'r gweinidog cyllid Rebecca Evans wedi delio â chwe phrif ysgrifennydd i’r Trysorlys, meddai wrth y Senedd.

Mae'r Llywydd Elin Jones yn cynnal balot i benderfynu pa Aelodau a gaiff gyflwyno cwestiynau i’r Prif Weinidog ac i Weinidogion Cymru. Caiff pob Aelod gynnwys ei enw yn y balot.

Mae'r Ceidwadwr Janet Finch-Saunders yn galw ar y prif weinidog i "gyflymu'r broses o gyflwyno deddfwriaeth ar ddiogelwch adeiladau yng Nghymru".

Mae’r Prif Weinidog Mark Drakeford yn dweud bod y gwaith o ddiwygio rheoliadau diogelwch adeiladau eisoes wedi dechrau, ac mae’n nodi’r broses ddeddfwriaethol.

Mae'n dweud bod gan ei lywodraeth ymgynghoriad, dolen allanol ar hyn o bryd sy'n canolbwyntio ar y rheolau a'r safonau y bydd yn disgwyl i Gyrff Rheoli Adeiladu yn y sector cyhoeddus a phreifat gydymffurfio â nhw.

Mae hefyd yn dweud bod nifer o ddarpariaethau sy’n berthnasol i Gymru wedi’u cynnwys yn Neddf Diogelwch Adeiladu 2022 y DU.

Wedi i dân yn fflatiau Tŵr Grenfell yng ngorllewin Llundain ladd 72 o bobl yn 2017, fe ddaeth i'r amlwg bod cannoedd o flociau eraill o fflatiau ar draws y DU â diffygion difrifol gan gynnwys cladin fflamadwy.

Ffynhonnell y llun, PA Media

Prynhawn da, croeso i'n darllediad byw o seithfed sesiwn ar hugain y Cwestiynau i'r Prif Weinidog yn 2022.

Cynhelir y cyfarfod llawn ar ffurf hybrid, gyda rhai aelodau yn Siambr y Senedd ac eraill yn ymuno drwy gyswllt fideo.