Dyna ddiwedd y Cwestiynau i'r Prif Weinidog.

Diolch am ddilyn - ymunwch â ni eto yr wythnos nesaf.

Bydd y Senedd yn cael ei goleuo unwaith eto yn lliwiau glas a melyn baner Wcráin heno, fel arwydd o undod â hwy.

Da boch chi.

Ffynhonnell y llun, Senedd Cymru

Ar ôl i Fferm Gilestone ym Mhowys gael ei phrynu'n ddadleuol gan Lywodraeth Cymru am £4.5m, mae'r Ceidwadwr James Evans yn dweud y byddai'n "lle perffaith ar gyfer coleg amaethyddol".

Dywed Lesley Griffiths fod "fferm Gilestone yn cael ei rheoli'n briodol ar hyn o bryd er mwyn sicrhau bod yr ased yn cael ei gynnal tra bod trafodaethau ar ddyfodol hirdymor y safle yn dod i ben".

Mae Mr Evans o'r farn bod "De Powys angen coleg amaethyddol" ac yn galw am i'r tir gael ei "ddefnyddio ar gyfer ffermio ac i helpu'r cenedlaethau nesaf o ffermwyr ifanc".

Ffynhonnell y llun, Dyn Gwyrdd

Ar ddatganiad hydref Llywodraeth y DU, dywed Lesley Griffiths "ni fydd y cyllid ychwanegol y mae Llywodraeth Cymru wedi cael - £1.2 biliwn dros y ddwy flynedd nesaf - yn llenwi'r bylchau mawr yn ein cyllideb", ond mae'n ychwanegu y bydd Llywodraeth Cymru yn anelu at "warchod y mwyaf bregus".

Dywed y Ceidwadwr Darren Millar bod "gan Lywodraeth Cymru ei chyllideb fwyaf erioed ar hyn o bryd. Mae'n gyllideb sydd wedi torri record, ac mae'n mynd i godi dros y ddwy flynedd nesaf."

Mae arweinydd Plaid Cymru Adam Price yn cyfeirio at newyddion am drafodaethau newydd i geisio osgoi streic gan staff y GIG yn yr Alban, ac yn gofyn pam nad yw Llywodraeth Cymru yn dilyn esiampl Llywodraeth yr Alban.

Mae'r Trefnydd yn ateb “mae ein setliad ariannol presennol yn brin o lawer iawn o’r hyn sydd ei angen mewn gwirionedd i gwrdd â’r heriau sylweddol iawn sy’n wynebu ein gwasanaethau cyhoeddus a gweithwyr ledled Cymru”.

Mae Mr Price hefyd yn codi achos cyn-gapten tîm pêl-droed Cymru, Laura McAllister, sydd wedi disgrifio cael cais i dynnu ei het bwced "wal enfys" wrth iddi fynd i mewn i stadiwm Cwpan y Byd yn Qatar.

Dywed Lesley Griffiths fod gweithredu yn erbyn y defnydd o ddelweddau'r enfys yng Nghwpan y Byd wedi bod yn "warthus". Mae hi'n dweud ei bod hi'n adnabod rhywun y gofynnwyd iddyn nhw dynnu gareiau enfys allan o'u hesgidiau.

Ychwanegodd, “Mae’n gwbl annerbyniol, ac rwy’n gwybod ein bod wedi bod mewn deialog gyda’r llysgenhadaeth yn Doha, yn ceisio cael rhywfaint o eglurhad brys nad yw hetiau bwced enfys, careiau neu grysau-T yn cael eu gwahardd o stadia, ac rwy’n gobeithio'n fawr iawn na welwn ni hynny eto."

Mae Andrew RT Davies, arweinydd y Ceidwadwyr Cymreig yn y Senedd, yn cyfeirio at yr ymchwiliad i honiadau o gasineb at fenywod, hiliaeth, homoffobia a thwyll yn Heddlu Gwent.

Dywed "nid oes gennyf unrhyw hyder yn uwch arweinyddiaeth Heddlu Gwent, boed hynny ar lefel swyddogion neu ar lefel comisiynydd heddlu a throseddu. Mae'r datgeliadau hyn yn erchyll a dweud y lleiaf."

Atebodd y Trefnydd Lesley Griffiths nad oedd plismona wedi'i ddatganoli i Gymru ac felly yn gyfrifoldeb i Lywodraeth y DU, "ond wrth gwrs rydym yn gweithio'n agos iawn gyda'n partneriaid plismona yma yng Nghymru".

Ond ychwanegodd bod y Gweinidog Cyfiawnder Cymdeithasol Jane Hutt wedi cyfarfod y prif gwnstabl a chomisiynydd heddlu a throseddu Gwent "i drafod yr honiadau ac wedi cael sicrwydd bod Heddlu Gwent yn cymryd yr honiadau hyn o ddifrif".

Ymddeolodd Ricky Jones o Heddlu Gwent yn 2017. Bu farw drwy hunanladdiad ar Bont Tywysog Cymru yn 2020.

Yn ôl ei wraig a'i ferch roedd e'n rheoli ac yn cam-drin adref.

Mae'r negeseuon a ddarganfuwyd ar ffôn Mr Jones wedi ennyn yr ymchwiliad i gasineb at fenywod, hiliaeth, homoffobia a thwyll yn Heddlu Gwent.

Ffynhonnell y llun, LLUN TEULU

Pan ofynnwyd iddi gan y Ceidwadwr Laura Anne Jones "a wnaiff Llywodraeth Cymru roi arian i ysgolion yng Nghymru a fydd yn cyfateb i'r arian ychwanegol y mae Llywodraeth y DU yn ei roi i ysgolion yn Lloegr?", mae'r Trefnydd yn ateb "fel y dangosir gan ddadansoddiad diweddar gan y Trysorlys, roedd gwariant y pen ar addysg yng Nghymru 17 y cant yn uwch nag yn Lloegr yn 2021-22. Byddwn yn darparu rhagor o fanylion yn ein cyllideb ddrafft ar gyfer 2023-24."

Ffynhonnell y llun, PA Media

Mae'r AS Llafur dros Orllewin Casnewydd, Jayne Bryant, yn gofyn "pa asesiad y mae'r prif weinidog wedi'i wneud o effaith penderfyniad Llywodraeth y DU i rwystro Nexperia BV rhag caffael Newport Wafer Fab?"

Mae'r Trefnydd yn ateb "mae Llywodraeth Cymru yn croesawu'r ffaith bod y cyhoeddiad wedi'i wneud o'r diwedd, sydd wedi rhoi rhywfaint o eglurder."

Ychwanegodd, "fel llywodraeth nid oes gennym yr arbenigedd i asesu'r materion diogelwch sydd yn y fantol".

Mae hi hefyd yn dweud bod "Casnewydd yn ymfalchïo mewn clwstwr lled-ddargludyddion o bwys byd-eang, ac mae gan Lywodraeth y DU gyfrifoldeb i sicrhau nad yw'n cael ei ddal yn ôl o ganlyniad i hyn."

Mae'n rhaid i gwmni Nexperia werthu 86% o'u siâr yn ffatri Newport Wafer Fab oherwydd pryderon am ddiogelwch cenedlaethol, medd Llywodraeth y DU.

Cafodd cwmni Newport Wafer Fab ei brynu'n llawn gan y cwmni technoleg o'r Iseldiroedd, Nexperia, ym mis Gorffennaf 2021.

Ond cafodd adolygiad o'r pryniant ei orchymyn gan weinidogion ar sail diogelwch cenedlaethol - hynny gan bod prif berchnogion Nexperia yn dod o China.

Mae'r diwydiant lled-ddargludyddion y DU yn cael ei ystyried yn un o bwysigrwydd strategol, ac roedd yna bryderon y gallai'r dechnoleg yng Nghasnewydd fynd i ddwylo China drwy Nexperia.

Cwmni Wingtech sydd yn berchen ar Nexperia, cwmni sydd wedi'i restru yn Shanghai ac a gredir o fod yn cael cefnogaeth gan Blaid Gomiwnyddol China.

Mae Nexperia yn bwriadu herio'r gorchymyn.

Ffynhonnell y llun, Newport Wafer Fab

Pan atebodd y Trefnydd gwestiynau ar ran y prif weinidog ar 27 Medi, atebodd 10 cwestiwn mewn 45 munud. “Da iawn” ymatebodd y Llywydd Elin Jones, a awgrymodd fod y Trefnydd yn rhoi “tiwtorial i’r Cabinet ar sut i roi atebion cryno mewn cwestiynau llafar”.

Prynhawn da, croeso i'n darllediad byw o'r Cwestiynau i'r Prif Weinidog.

Cynhelir y cyfarfod llawn ar ffurf hybrid, gyda rhai aelodau yn Siambr y Senedd ac eraill yn ymuno drwy gyswllt fideo.

Mae'r Trefnydd Lesley Griffiths yn ateb cwestiynau ar ran y prif weinidog, sydd ar ei ffordd adref o Qatar.

Ffynhonnell y llun, Senedd