Dyna ddiwedd y Cwestiynau i'r Prif Weinidog.

Ymunwch â ni eto yr wythnos nesaf.

Oherwydd argyfwng Israel-Gaza, mae'r goleuadau yn y Senedd yn parhau i gael eu pylu bob nos.

Dywedodd y Llywydd Elin Jones ei fod er mwyn “adlewyrchu’r teimlad bod ymosodiadau o’r fath yn cynrychioli cyfnod tywyll arall i ddynoliaeth yn y Dwyrain Canol.

"Mae’n destun tristwch mawr i sefydliad democrataidd fel ein un ni.

"Yn ogystal ag adlewyrchu’r tristwch, bydd y tywyllwch hefyd yn ddatganiad o undod â phawb sy’n dioddef o ganlyniad i’r ymosodiadau.”

Gan gydnabod pwysau ar bractisau meddygon teulu, mae'r prif weinidog yn dweud mai meddygon teulu fel penaethiaid tîm clinigol ehangach yw dyfodol gofal sylfaenol.

Meddai, "yn y ffordd honno, rwy’n meddwl bod dyfodol cryf a llwyddiannus iawn i ofal sylfaenol yng Nghymru—ac yng Nghymru, rydym wedi arwain y datblygiad hwnnw, sydd bellach yn cael ei ailadrodd mewn rhannau eraill o’r Deyrnas Unedig.”

Mae'r tîm ehangach, meddai, yn cynnwys ffisiotherapyddion, fferyllwyr, uwch ymarferwyr fel parafeddygon, a nyrsys practis.

Mae'r Ceidwadwr Tom Giffard yn beirniadu "treth dwristiaeth wenwynig" Llywodraeth Cymru a "pholisïau gwrth-dwristiaeth niweidiol" eraill.

Mae'r prif weinidog yn ateb drwy ganolbwyntio ar fuddsoddiadau yn Y Mwmbwls, Bae Abertawe, fel enghraifft o gefnogaeth y llywodraeth i'r diwydiant.

Mae’n tynnu sylw at “y £2 filiwn sydd wedi’i ddarparu i greu llety a bwyty o ansawdd uchel yn Y Mwmbwls ei hun, gan greu rhyw 29 o swyddi; buddsoddiad pellach o £70,000 yn yr hen gronfa busnesau micro a bach ar gyfer datblygu gwesty pum seren gerllaw; £2.7 miliwn ar gyfer creu canolfan ymwelwyr a distyllu wisgi Cymreig ym Morfa Hafod yn Abertawe.

"Pethau ymarferol yw’r rhain; mae’r rhain yn fuddsoddiadau gwirioneddol; dyma sut yr ydych yn dangos eich cefnogaeth i’r diwydiant twristiaeth yng Nghymru."

Ffynhonnell y llun, Getty Images

Mae arweinydd Plaid Cymru, Rhun ap Iorwerth yn dweud, "allwn ni ddim gwneud heb ein sector amaeth ni, o ran bwyd, yr amgylchedd, ein cymunedau gwledig, ein hiaith ac yn y blaen. Mae Cymru wledig ac amaeth angen llywodraeth ar eu hochr nhw.

"Mae'r cyhoedd yn cytuno â mi: 82 y cant o bobl yn dweud wrth arolwg YouGov eu bod nhw'n cefnogi rhoi cymorth ariannol i ffermwyr gynhyrchu bwyd; 72 y cant yn dweud bod cefnogi ffermwyr Cymru yn ddefnydd da o arian cyhoeddus."

Mae'n galw am "sicrwydd na fydd y gyllideb ddrafft yn effeithio'n andwyol ar amaethyddiaeth".

Atebodd Mr Drakeford, "allai ddim dweud hynny am unrhyw agwedd ar y gwaith y mae'r llywodraeth yn ei wneud".

Eglura, “rydym £1.3 biliwn yn brin o’r hyn sydd ei angen arnom y flwyddyn nesaf; hynny yw effaith chwyddiant a methiant llywodraeth y DU i gynnal gwir werth y gyllideb y dywedasant yr oedd ei hangen arnom pan osododd yr adolygiad cynhwysfawr o wariant ein cyllidebau am dair blynedd."

Mae Andrew RT Davies, arweinydd y Ceidwadwyr Cymreig yn y Senedd, yn codi pryderon am wasanaethau mamolaeth yn ardal Bwrdd Iechyd Prifysgol Bae Abertawe.

Mae’n cyfeirio at honiadau gan deulu Gethin Channon, sy’n dair oed, fod pryderon difrifol am ei ofal mamolaeth, a nodwyd gan un o brif ymchwilwyr meddygol y DU, wedi cael eu “cuddio” gan y bwrdd iechyd.

Ganed Gethin Channon â niwed sylweddol i’r ymennydd ar ôl cymhlethdodau yn ystod ei eni yn Ysbyty Singleton yn 2019.

Mae Mr Davies yn gofyn, "a yw'r bwrdd iechyd wedi cyrraedd lefelau staffio gofynnol y GIG yn y gwasanaethau mamolaeth, ac os nad ydyn nhw, a yw gwasanaethau mamolaeth yn Abertawe'n ddiogel?"

Atebodd y Prif Weinidog Mark Drakeford, "Rwy'n credu bod gwasanaethau mamolaeth ym Mae Abertawe yn cael eu goruchwylio'n rheolaidd iawn gan y rhai sydd â'r cyfrifoldeb hwnnw.

"Nid oes amheuaeth—nid wyf yn awgrymu fel arall—y bu rhai digwyddiadau anodd yn y gwasanaethau a ddarperir.

"Ond mae'r trefniadau a roddwyd ar waith o ganlyniad i'r gwaith a wnaed ym Mwrdd Iechyd Prifysgol Cwm Taf Morgannwg dros y blynyddoedd diwethaf, mae'r gwersi hynny wedi'u trosglwyddo i'r gwasanaeth ym Mae Abertawe."

Mae Heledd Fychan o Blaid Cymru yn gofyn pa gynnydd sydd wedi'i wneud i weithredu'r 29 argymhelliad a wnaed gan grŵp arbenigol Llywodraeth Cymru ar yr argyfwng costau byw, dolen allanol.

Lluniodd Llywodraeth Cymru y grŵp o 18 o arbenigwyr i gynghori ar effaith yr argyfwng costau byw ar bobl yng Nghymru a'r camau y dylid eu cymryd i leihau yr effaith.

Ymatebodd y Prif Weinidog Mark Drakeford, "dyma rai o’r meysydd lle mae cynnydd wedi cael ei wneud—tai a digartrefedd, sicrhau’r incwm gorau i bobl, a lleihau cost y diwrnod ysgol.

"Ond, gadewch i ni fod yn glir: does dim cyllid gan Lywodraeth Cymru i gyflawni pob un o’r 29 o argymhellion. Mae dewisiadau anodd yn cael eu gwneud, gyda chymorth adroddiad y grŵp arbenigol."

Dywed Heledd Fychan fod rhai o'r argymhellion â "dim cost yn gysylltiedig â nhw, megis argymhellion 4, 24 a 25 ynglŷn â chasglu a chyhoeddi data, argymhelliad 10 o ran blaenoriaethu teuluoedd incwm isel ar gyfer y rhaglen Bwyd a Hwyl, a rhan gyntaf argymhelliad 23, o ran cymryd rhan mewn marchnata mwy gweithredol ar gyfer MyTravelPass i bobl ifanc 16 i 24 mlwydd oed."

Prynhawn da, croeso i'n darllediad byw o'r Cwestiynau i'r Prif Weinidog, sy'n dechrau am 1.30pm.

Cynhelir y cyfarfod llawn ar ffurf hybrid, gyda rhai aelodau yn Siambr y Senedd ac eraill yn ymuno drwy gyswllt fideo.