Y golled gartref waethaf erioed i Gymru yn erbyn De Affrica

Cafodd tîm rygbi Cymru eu trechu'n gyfforddus yn erbyn De Affrica ddydd Sadwrn, yn eu gêm olaf yng Nghyfres yr Hydref.

0-73 oedd y sgôr terfynol yn Stadiwm Principality - y golled fwyaf erioed i Gymru yng Nghaerdydd.

Roedd yn rhaid i hyfforddwr Cymru, Steve Tandy, wneud 12 newid i'r tîm gan fod y gêm yn digwydd y tu allan i'r ffenestr swyddogol ar gyfer gemau rhyngwladol.

Yn y gemau eraill yng Nghyfres yr Hydref eleni, mae Cymru wedi colli yn erbyn yr Ariannin, 18-52, wedi curo Japan o bwynt gyda chic yn y munud olaf i ennill 24-23, ac wedi colli yn erbyn Seland Newydd, 26-52.

Aeth yr ymwelwyr, oedd yn ffefrynnau pendant i ennill, ar y blaen wedi naw o funudau gan sgorio dau gais o fewn pedwar munud - y cyntaf gan y prop Gerhard Steenekamp a'r ail gan Ethan Hooker.

Roedd tîm ifanc Steve Tandy yn dilyn cysgodion ar adegau gyda Sacha Feinberg-Mngomezulu, a throsiodd naw gwaith yn y gêm, yn dangos ei ddoniau wrth dorri trwy'r rhengau sawl gwaith.

Fel nifer o dimau eraill, roedd Cymru yn eu gweld hi'n anodd yn erbyn y Springboks yn y sgrym, a daeth trydydd cais y gêm gan Jasper Wiese wedi i Gymru cael eu gwthio'n ôl yn ddwfn iawn yn eu hanner eu hunain.

Roedd Cymru yn eu gweld hi'n anodd cael cyffyrddiad ar y bêl a'n ei chicio i ffwrdd ar bron i bob cyfle.

Tiriodd Morne van der Berg i orffen yr hanner ar ôl i Andre Esterhuizen redeg trwy Joe Hawkins a Dan Edwards cyn cael ei dynnu i lawr ger y pyst.

Cafodd Cymru ddechrau hunllefus i'r ail hanner gyda'r ymwelwyr yn sgorio tri chais mewn naw munud.

Daeth y trydydd yn dilyn rhediad campus gan Canan Moodie a giciodd y bêl heibio chwaraewyr Cymru cyn tirio rhwng y pyst.

Ar ôl ychydig o funudau roedd y sgôr yn 54-0 gydag Andre Esterhuizen tro 'ma yn ceisio ger y cornel chwith yn dilyn pas gan Damian Willemse.

Doedd dim cyfle i anadlu i Gymru ac roedd pethau yn mynd o ddrwg i waeth gyda De Affrica yn rheoli'r gêm yn gyfan gwbl ac yn tirio gyda bron i bob ymosodiad.

Fe ddilynodd ceisiau gan Feinberg-Mngomezulu, Ruan Nortje ac Eben Etzebeth i selio colled waethaf erioed Cymru yn y brifddinas.

Daeth y gêm i ben gyda cherdyn coch i Etzebeth a ymddangosodd i roi ei fawd yn llygad Alex Mann.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.