Davies, Cabango a Moore yn tynnu'n ôl o garfan Cymru

Ni fydd Ben Davies, Kieffer Moore a Ben Cabango ar gael ar gyfer dwy gêm olaf Cymru yng ngrŵp rhagbrofol Cwpan y Byd 2026 oherwydd anafiadau.

Bydd Cymru'n herio Liechtenstein oddi cartref nos Sadwrn, cyn croesawu Gogledd Macedonia nos Fawrth.

Er i'r tri gael eu henwi yn y garfan gan Craig Bellamy yn wreiddiol, maen nhw bellach wedi tynnu'n ôl.

Dyw Davies, amddiffynnwr Tottenham Hotspur, heb chwarae ers cael anaf i'w goes yn y golled yn erbyn Gwlad Belg fis Hydref.

Fe wnaeth Moore, sydd wedi creu argraff i Wrecsam yn ddiweddar, hefyd ddioddef anaf yn ystod eu buddugoliaeth yn erbyn Charlton ddydd Sadwrn.

Mae ymosodwr Caerdydd, Isaak Davies, ac amddiffynnwr Queens Park Rangers, Rhys Norrington-Davies, wedi cael eu galw i'r garfan i gymryd eu lle.

Mae absenoldeb Davies hefyd yn golygu y bydd yn rhaid i Bellamy benderfynu ar gapten ar gyfer y ddwy gêm, gyda'r capten arferol Aaron Ramsey hefyd yn absennol oherwydd anaf.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.