Ergyd i obeithion Elfyn Evans o ddod yn bencampwr byd ar ôl pyncjar

Mae Elfyn Evans yn yr wythfed safle yn Rali Saudi Arabia wedi cymal 14
- Cyhoeddwyd
Mae gobeithion Elfyn Evans o gael ei goroni'n bencampwr ralio'r byd am y tro cyntaf yn y fantol wedi iddo gael pyncjar ar drydydd diwrnod Rali Saudi Arabia.
Roedd y Cymro yn arwain Pencampwriaeth y Byd cyn dechrau'r rali olaf - ond dri phwynt yn unig ar y blaen i Sebastian Ogier.
Disgynnodd Evans i'r 10fed safle yn Rali Saudi Arabia wedi'r 11eg cymal o 17 - tri safle a dros ddau funud a hanner y tu ôl i Ogier.
Erbyn diwedd cymal 14 - yr olaf ddydd Gwener - roedd Evans wedi codi i'r wythfed safle ond mae gan Ogier sy'n chweched dal fantais o ddau funud ac 20 eiliad.
Pe bai'r safleoedd yn parhau fel hynny ar ôl y cymal olaf ddydd Sadwrn, byddai Ogier yn ennill y bencampwriaeth o drwch blewyn.
Ond gyda thri chymal yn weddill - a 10 pwynt bonws ar gael ar y diwrnod olaf - mae digon o gyfleoedd gan Evans i ddringo yn ôl i frig y tabl.
"Rhaid trio mynd amdani a gweld be ddaw," meddai Evans cyn y cymalau olaf ddydd Sadwrn
Mewn cyfweliad â BBC Cymru wedi cymal 14, dywedodd Evans fod dydd Gwener wedi bod yn ddiwrnod anodd.
"Wrth gwrs pyncaj bore 'ma i ni, mae lot o rai eraill wedi cael pyncjars pnawn 'ma.
"'Dan ni wedi gallu cadw allan o drwbl pnawn 'ma ond wrth gwrs wedi gorfod arafu'r pace ychydig bach i allu 'neud hynny.
"Mae gyd i chwarae am fory wedyn rhaid just trio mynd amdani a gweld be ddaw ar ddiwedd y penwythnos."
Tabl Rali Saudi Arabia ar ôl cymal 14
Adrien Fourmaux (Ffrainc), Hyundai, 2 awr 43 munud 17.7 eiliad
Martins Sesks (Latfia), Ford, +2.4 eiliad
Thierry Neuville (Gwlad Belg), Hyundai, +5.8 eiliad
Takamoto Katsuta (Japan), Toyota, +43.9 eiliad
Kalle Rovanpera (Y Ffindir), Toyota, +1mun 15.0 eiliad
Sebastien Ogier (Ffrainc), Toyota, +1mun 15.2 eiliad
Sami Pajari (Y Ffindir), Toyota, +1mun 37.2 eiliad
Elfyn Evans (Prydain), Toyota, +3mun 55.0 eiliad
Gregoire Munster (Lwcsembwrg), Ford, +6mun 15.8 eiliad
Oliver Solberg (Sweden), Toyota, +7mun 29.1 eiliad
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
Pynciau cysylltiedig
Straeon perthnasol
- Cyhoeddwyd2 o ddyddiau yn ôl

- Cyhoeddwyd9 Tachwedd
