CBDC yn ceisio denu buddsoddiad o America i'r Cymru Premier

Cafodd yr hyn sydd bellach yn cael ei adnabod fel y Cymru Premier, ei sefydlu yn 1992

Mae penaethiaid pêl-droed Cymru wedi teithio i'r Unol Daleithiau er mwyn ceisio denu buddsoddiad newydd i'r gynghrair genedlaethol.

Y gobaith yw bod y Cymru Premier yn gallu elwa o'r diddordeb sylweddol yng Nghlwb Pêl-droed Wrecsam a'r cynnydd mewn perchnogaeth Americanaidd yng nghlybiau pêl-droed ym Mhrydain.

Bydd swyddogion Cymdeithas Bêl-droed Cymru (CBDC) yn mynychu cynhadledd fusnes pêl-droed byd-eang ym Miami yr wythnos hon, gyda'r nod o hyrwyddo diddordeb mewn clybiau pêl-droed domestig Cymru.

Bydd digwyddiad Soccerex yn cael ei ddefnyddio i arddangos y cynlluniau i ddatblygu'r Cymru Premier, gan gynnwys y buddsoddiad diweddar o £6m gan y corff llywodraethu.

Ond bydd swyddogion hefyd yn tynnu sylw at y posibilrwydd o fuddsoddiad allanol uniongyrchol yn y clybiau.

Yn ystod y blynyddoedd diwethaf mae clybiau Uwch Gynghrair Lloegr a'r adrannau is dros y ffin wedi profi cynnydd sylweddol mewn perchnogaeth Americanaidd.

O bosib yr esiampl enwocaf oll ydy Wrecsam, welodd yr actorion Ryan Reynolds a Rob McElhenney yn prynu'r clwb yn 2021.

Mae swyddogion CBDC yn credu y gallai clybiau Cymru sydd y tu allan i system Lloegr hefyd fod yn ddeniadol i fuddsoddwyr, yn enwedig gan fod cyfleoedd i gyrraedd cystadlaethau Ewrop am gost gymharol isel.

Er bod Cymru wedi profi llwyddiant ar y llwyfan rhyngwladol, mae'r brif gynghrair ddomestig yn parhau i fod ymhlith y rhai gwanaf a tlotaf yn Ewrop.

Mae'r gynghrair yn y broses o ehangu o 12 clwb i 16 erbyn tymor 2026/27, gyda chyllid newydd ar gael ar gyfer staff llawn amser ym mhob clwb i wella gweinyddiaeth a marchnata.

Ond mae cydnabyddiaeth bod angen mwy o incwm i gryfhau'r carfannau, ac o ganlyniad, sicrhau gwell cystadleuaeth yn y gynghrair.

Y Seintiau Newydd, o dan berchnogaeth Mike Harris, yw'r unig glwb llawn amser ar hyn o bryd.

Maen nhw wedi ennill y gynghrair 11 gwaith yn y 13 blynedd ddiwethaf.

Mae dylanwad buddsoddwyr Americanaidd ar bêl-droed Ewrop yn parhau i gynyddu, gyda Serie A yr Eidal bellach yn cynnwys hyd at naw grŵp perchnogaeth o'r Unol Daleithiau.

Gan fod nifer o fuddsoddwyr wedi'u prisio allan o farchnadoedd chwaraeon yn America, mae swyddogion y CBDC yn gobeithio tynnu sylw at y cyfleoedd o fewn Uwch Gynghrair Cymru, lle gellir cael effaith sylweddol am fuddsoddiad cymharol fach.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.