Rhybuddion melyn ac oren am law trwm i Gymru dydd Llun
Mae'r rhybuddion mewn grym trwy gydol dydd Llun
- Cyhoeddwyd
Mae'r Swyddfa Dywydd wedi cyhoeddi rhybudd melyn a rhybudd oren am law trwm ar gyfer rhannau helaeth o Gymru.
Mae'r rhybudd melyn mewn grym ar gyfer rhannau o bob sir yn y gogledd a'r canolbarth, heb law am Sir y Fflint a Wrecsam, o 00:00 dydd Llun tan 03:00 dydd Mawrth.
Mae'r rhybudd oren mewn grym ar gyfer rhannau o bob sir yn y de trwy gydol dydd Llun.
Yn ôl y Swyddfa Dywydd, mae disgwyl i hyd at 40mm o law ddisgyn yn eang ar draws y de, a hyd at 80mm mewn rhai ardaloedd.
Yn y gogledd a'r canolbarth, mae disgwyl i hyd at 30mm o law ddisgyn, a hyd at 80mm mewn rhai ardaloedd.
Gallai hyn achosi toriadau pŵer a darfu ar wasanaethau trenau a bysiau yn ogystal ag effeithio ar drafnidiaeth ar y ffyrdd.
Fe allai'r tywydd achosi llifogydd mewn mannau gan achosi difrod i rai adeiladau.
Daw y rhybuddion diweddaraf yn dilyn llifogydd difrifol yn y de-orllewin a Sir Fynwy yn ddiweddar.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.