Cyhuddo dyn, 64, o wisgo lifrai milwrol heb ganiatâd ar Sul y Cofio

Cafodd dyn ei weld yn gwisgo lifrai un o'r rhengoedd uchaf yn y Llynges Frenhinol yn ystod y gwasanaeth yn Llandudno

Mae dyn 64 oed wedi cael ei gyhuddo yn dilyn honiadau fod rhywun wedi dynwared swyddog o'r llynges mewn digwyddiad Sul y Cofio dros y penwythnos.

Cafodd Jonathan Carley o Harlech ei arestio yn ei gartref ddydd Gwener ar amheuaeth o wisgo lifrai milwrol heb ganiatâd.

Daw ar ôl i luniau gael eu rhannu yn y wasg ac ar-lein o ddyn yn gwisgo lifrai'r llynges a medalau mewn digwyddiad Sul y Cofio yn Llandudno ar 9 Tachwedd.

Mae disgwyl i Mr Carley ymddangos yn Llys Ynadon Caernarfon ganol Rhagfyr.

Dywedodd y prif arolygydd Trystan Bevan o Heddlu'r Gogledd: "Rydyn ni'n deall fod y digwyddiad yma wedi achosi pryder ymhlith y cyhoedd, yn enwedig o ystyried ei fod wedi digwydd ar Sul y Cofio.

"Wrth ymateb i adroddiadau a dderbyniwyd gan Heddlu'r Gogledd, mae swyddogion wedi ymateb yn gyflym ac wedi arestio a chyhuddo unigolyn.

"Rydyn ni'n annog y cyhoedd i osgoi rhannu sïon ar-lein ac i beidio â rhannu unrhyw gynnwys gallai effeithio ar y broses gyfreithiol."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.