Symud cwmni i America yn sgil diffyg cefnogaeth i ferched

Mae Lauren Bell wedi bod yn rhedeg ei busnes Cosi Care am saith mlynedd

Mae entrepreneur o Gymru yn symud ei chwmni i America oherwydd y rhwystrau a'r diffyg cefnogaeth mae'n eu hwynebu fel menyw, meddai.

Enillodd Lauren Bell fuddsoddiad i dyfu ei busnes ar ôl cymryd rhan mewn cystadleuaeth o flaen panel o feirniaid a chynulleidfa yn nhalaith Efrog Newydd.

Yn ôl Lauren mae "lot o ragfarn yn y broses o godi buddsoddiad" ym Mhrydain ac mae "pawb ar y top sy'n ysgrifennu'r sieciau yn ddynion".

Dywedodd llywodraethau Cymru a'r DU eu bod nhw wedi ymrwymo i gefnogi mentergarwch ymhlith menywod.

Mae'r Scratch Star ymhlith sawl teclyn mae Lauren Bell wedi eu cynllunio

Cyn sefydlu ei chwmni, Cosi Care, dyluniodd Lauren, 33, declyn meddygol o'r enw Scratch Star tra'n y coleg i helpu ei brawd Rhys ymdopi ag ecsema difrifol.

"O'n i wir wedi ceisio creu'r Scratch Star yn y Deyrnas Unedig," meddai Lauren sydd o ardal Abertawe.

"Yn anffodus, mae'n siom mawr, achos odd y syniad wedi cychwyn yng Nghymru, ond doedd y buddsoddiad ddim yma i allu cefnogi ni i wir dyfu'r busnes ac yn enwedig i ehangu dramor," ychwanegodd.

"Ma lot o ragfarn yn y broses o godi buddsoddiad, yn anffodus ma' pawb ar y top sy'n ysgrifennu'r sieciau yn ddynion."

Dywedodd bod "potiau bach" o fuddsoddiad ar gael ar y cychwyn ond ei bod "mor heriol i gael y sieciau mawr" ac roedd yn anodd perswadio pobl i'w chymryd o ddifrif.

Ar ôl rhedeg y cwmni am saith mlynedd dywedodd Lauren ei bod wedi cymryd pedair blynedd cyn iddi allu cymryd cyflog o'i busnes.

Symud yr holl weithwyr

Ond mae Lauren nawr yn gobeithio, ar ôl sicrhau buddsoddiad o $1.6 miliwn yng nghystadleuaeth fusnes 43North yn Buffalo, Efrog Newydd, y bydd modd iddi wireddu ei breuddwyd.

Ar ôl astudio peirianneg a dylunio technoleg yn y brifysgol dywedodd Lauren bod astudio pynciau STEM yn hanfodol, pynciau sydd hefyd yn cynnwys gwyddoniaeth a mathemateg.

Gyda 40,000 o gynhyrchion Cosi Care wedi'u gwerthu a chadwyn gyflenwi hybrid yn y Deyrnas Unedig ac yn rhyngwladol, dywedodd Lauren bod y cwmni gwerth £20m.

Ond ar ôl ennill y buddsoddiad diweddar, mae'n symud ei chwmni ar draws y Môr Iwerydd.

"Rwy'n symud ein holl weithwyr yno. Rwy'n cynhyrchu yn America ac yn symud popeth draw i America, sy'n drueni mawr, oherwydd fe wnes i geisio'i wneud yn y DU, ond nid oedd yr un raddfa o gefnogaeth yma."

Mae Dr Siwan Mitchelmore o Brifysgol Bangor yn arbenigo mewn mentergarwch ac yn ei hôl hi mae menywod yn wynebu "anfanteision systematig".

Mae hyn yn enwedig wrth geisio sicrhau cyllid, meddai, ac mae'n argyhoeddedig bod yn rhaid i fenywod weithio'n galetach i sicrhau hygrededd.

"Mae mynediad at rwydweithiau, mynediad at fodelau rôl sydd o fewn eu sectorau ac hefyd modelau rôl sydd â'r gwahanol bwyntiau yn nhyfiant busnes yn bwysig," ychwanegodd.

Yn ôl Dr Mitchelmore mae angen sicrhau bod mwy o ferched yn dewis astudio pynciau STEM a sicrhau bod diddordeb o oed ifanc.

"Mewn addysg yn gyffredinol mae'n rhaid gwneud y pynciau yma'n fwy deniadol i ferched. Pam bod hyn yn bwysig? Rhain yw'r busnesau lle mae'r twf uchaf a rhain ydy'r sectorau sy'n atynnu'r mwya o fudd," meddai.

Mae Rhian Parry yn dweud ei bod yn gorfod profi ei hun yn gyson

Rhian Parry yw rheolwr gyfarwyddwr Workplace Worksafe, cwmni o Ruthun sy'n arbenigo mewn dillad ac offer iechyd a diogelwch ar gyfer y gweithle.

Mae hi hefyd yn dyfeisio ac yn dylunio cynnyrch ar gyfer ffermydd gwynt.

Er ei bod yn dathlu 20 mlynedd o fusnes, mae Rhian yn teimlo rhwystredigaeth ac yn teimlo ei bod yn gorfod profi ei hun yn gyson.

"Pobl yn cymryd chi'n serious fel business woman dwi'n meddwl yw un o'r problemau," meddai.

"Ma cymaint o bobl mewn busnes, menywod mewn busnes sydd angen investment, a dydyn nhw ddim yn gwybod lle i fynd, dydyn nhw ddim yn ticio'r bocs, mae preconception o be ti'n edrych fel.

"Dwi'n mynd i fewn i ystafell a ma' pobl yn mynd 'dyw Rhian ddim yn typical business woman' ond 'dan ni dal yn gwneud gwaith da," ychwanegodd.

Dywedodd Rhian bod sicrhau buddsoddiad yn heriol a bod y system yn gallu bod yn gymhleth gyda'r holl ffurflenni sydd angen eu llenwi.

Anfanteision sylweddol

Yn ôl adroddiad gafodd ei gyhoeddi fis diwethaf gan bwyllgor Menywod a Chydraddoldeb Tŷ'r Cyffredin, mae gwragedd sy'n rhedeg cwmnïau yn wynebu anfanteision sylweddol o ran cael mynediad at gyllid, rhwydweithiau buddsoddi a systemau cymorth.

Er bod nifer o brosiectau wedi'u sefydlu i fynd i'r afael â'r mater, effaith gyfyngedig sydd wedi bod, meddai'r grŵp trawsbleidiol o aelodau seneddol.

Dywedodd llefarydd ar ran Llywodraeth Prydain eu bod yn "rhoi menywod wrth wraidd eu hagenda i sicrhau mai'r Deyrnas Unedig yw'r lle gorau i wragedd arwain busnesau drwy fynd i'r afael â rhwystrau a chynnig cyfleoedd".

Ychwanegodd y llefarydd bod tasglu wedi sicrhau dros £500m o fuddsoddiad ar gyfer busnesau dan arweiniad menywod dros y flwyddyn ddiwethaf.

Dywedodd Llywodraeth Cymru bod Busnes Cymru wedi cefnogi 2,301 o fusnesau newydd dan arweiniad menywod ers mis Mai 2021, sef "56% o'r holl fusnesau newydd sy'n cael eu cefnogi".

"Mae Banc Datblygu Cymru yn cefnogi entrepreneuriaid benywaidd trwy lawer o brosiectau," ychwanegodd.