Allen yn gobeithio am rôl flaenllaw yng ngemau Cymru

Mae Joe Allen yn dweud ei fod yn gobeithio chwarae rhan flaenllaw yn y gemau yn erbyn Twrci a Gwlad yr Iâ yng Nghynghrair y Cenhedloedd dros yr wythnos nesaf.

Ar ôl ymddeol o bêl-droed rhyngwladol ar ôl Cwpan y Byd 2022, fe ddychwelodd i’r garfan fis diwethaf ar gyfer y gemau yn erbyn Gwlad yr Iâ a Montenegro ar ôl newid ei feddwl.

Fe ddaeth ymlaen fel eilydd yn erbyn Montenegro, a gan ei fod wedi chwarae’n fwy rheolaidd i’w glwb Abertawe yn ddiweddar, mae’n teimlo’n barod i gyfrannu mwy y tro hwn.

Mae angen i Gymru osgoi colli yn Nhwrci nos Sadwrn os am unrhyw obaith o orffen ar frig eu grŵp, ac ennill dyrchafiad yn ôl i brif haen y gystadleuaeth.