Morgan: Cymru'n benderfynol o brofi pobl yn anghywir

Mae capten Cymru Jac Morgan yn dweud eu bod nhw'n benderfynol o brofi pobl yn anghywir ym Mhencampwriaeth y Chwe Gwlad eleni, gan ddechrau drwy drechu Ffrainc yn y Stade de France nos Wener.

Y gêm ym Mharis ydy gêm agoriadol y gystadleuaeth eleni.

Ffrainc yw'r ffefrynnau am y bencampwriaeth yn ôl nifer, ond does 'na fawr neb yn cynnig llawer o obaith i Gymru, a hwythau ar eu rhediad gwaethaf erioed o ganlyniadau.

Mae tîm Warren Gatland wedi colli 12 gêm brawf yn olynol, gyda'u buddugoliaeth ddiwethaf yn dod yn erbyn Georgia yng Nghwpan y Byd 2023.