Cefnogwyr Cymru'n morio Yma o Hyd ym Montenegro
Bydd carfan pêl-droed dynion Cymru yn herio Montenegro oddi cartref nos Lun, gan obeithio adeiladu ar y gêm gyfartal yn erbyn Twrci.
Roedd parti i gefnogwyr Cymru ar y traeth yn nhref Budva ddydd Sul, ble roedd anthem answyddogol y cefnogwyr - Yma o Hyd gan Dafydd Iwan - yn cael ei morio.
Ond nid pawb sydd wedi gallu cyrraedd Montenegro, gyda rhai yn dal i ddisgwyl wedi i'w hediad gael ei ganslo.
Roedd cefnogwyr yn bwriadu teithio o Faes Awyr Caerdydd i Podgorica yn syth ar ôl y gêm rhwng Cymru a Thwrci nos Wener, ond bu'n rhaid i gwmni teithio Wonky Sheep - partner teithio swyddogol Cymdeithas Bêl-droed Cymru - adael i gefnogwyr wybod na fyddai modd hedfan am fod yr awyren wedi taro aderyn.
Fe benderfynodd rhai cefnogwyr drefnu teithiau i Montenegro o feysydd awyr eraill, ond roedd eraill wedi penderfynu aros yn y gobaith y byddai modd Wonky Sheep drefnu hediad arall.
Hyd at nos Sul, doedd dim awgrym fod hediad arall wedi gadael Caerdydd am Montenegro.