O'r archif: The Beatles yn dod i Fangor
Yr wythnos hon daeth cyhoeddiad ynglŷn â pha bedwar actor sy'n mynd i bortreadu John, Paul, George a Ringo mewn pedair ffilm sy'n mynd i gael eu cynhyrchu dros y blynyddoedd nesa am y Beatles.
Fe fydd seren Gladiator 2 a Normal People, Paul Mescal yn portreadu Paul McCartney. Seren Saltburn, Barry Keoghan fydd yn chwarae Ringo Starr.
Harris Dickinson fydd John Lennon a fydd George Harrison yn cael ei bortreadu gan Joseph Quinn.
Bydd y pedair ffilm wahanol yn canolbwyntio ar aelod gwahanol o'r band, ac mae disgwyl iddyn nhw gael eu rhyddhau yn agos i'w gilydd yn 2028.
Y cerddor a ffan mawr o'r Beatles Elis Derby oedd ar raglen Dros Frecwast, BBC Radio Cymru bore 'ma yn ymateb i'r cyhoeddiad.
"Dwi wastad wedi dweud na fyswn i eisiau gweld biopic Beatles achos fod cymaint o bethau fysa wedi gallu digwydd mewn ffilm dwy awr," meddai.
"Dwi'n meddwl fod o'n beth cŵl fod nhw'n trio rhywbeth newydd a gwneud ffilm yr un i'r pedwar aelod, o leiaf wedyn mae o'n rhoi amser i stori'r pedwar anadlu."
Steve McQueen fydd yn cyfarwyddo'r ffilmiau ac roedd hynny yn plesio Elis.
"Dwi'n meddwl mai hwn fydd y Mount Rushmore o'r biopics ynde achos eu bod nhw'n fand mor fawr a mor ddifyr," meddai.
Er i'r pedwar aelod gael eu magu dros y ffin yn Lerpwl fe aethon nhw ar ymweliad enwog iawn â Bangor fis Awst 1967.
Roedden nhw newydd ryddhau eu hwythfed albwm sef Sgt Pepper's Lonely Hearts Club Band cyn teithio i ogledd Cymru ar gyfer seminar o fyfyrdod gyda mudiad ysbrydol Maharishi Mahesh Yogi.
Ond mae'r trip yn enwog am reswm arall gan mai dyma ble glywodd y pedwar am farwolaeth sydyn eu rheolwr Brian Epstein.