Cofio 'dawn a llais melfedaidd' Eddie Butler

Mae pobl o bob cwr o'r byd rygbi a thu hwnt wedi bod yn rhoi teyrngedau i'r cyn-chwaraewr rygbi a sylwebydd, Eddie Butler, yn dilyn ei farwolaeth.

Bu'r sylwebydd Cennydd Davies yn gweithio gydag Eddie Butler yn y BBC.

"Roedd e wastad mor gefnogol, yn cymryd amser dros yr ifanc a barod i rannu ei ddoethineb helaeth gyda ni, ac wastad yn ŵr diymhongar, ffeind a charedig," meddai.

Ychwanegodd: "Roedd yn ŵr gwybodus, hyddysg a dyna pham mae wedi lleisio pob dim dros y gorfforaeth dros y blynyddoedd," meddai.

"Nid yn unig rhaglenni chwaraeon ond rhaglenni hanes, cymaint oedd ei ddawn a chymaint o wybodaeth oedd gyda fe."