Gemau Ewrop yn 'her fawr' i Rygbi Caerdydd

Mae capten Rygbi Caerdydd Josh Turnbull yn obeithiol y bydd ei dîm yn gallu cystadlu â chewri Ewrop y tymor hwn ar drothwy eu hymgyrch yng Nghwpan y Pencampwyr.

Mi fydd Caerdydd yn teithio i Ffrainc ar gyfer eu gêm agoriadol yn erbyn Toulouse ddydd Sadwrn, gyda Racing, Caerfaddon a Harlequins hefyd yn eu grŵp.

Mae timau Cymru yn wynebu talcen caled ar ôl i'w cyllidebau leihau'n sylweddol y tymor hwn, sydd wedi rhoi straen ar eu gallu i gystadlu â chlybiau mawr Ewrop.

Caerdydd yw'r unig un o dimau Cymru sydd yn y brif gystadleuaeth Ewropeaidd eleni gyda'r Dreigiau, Y Gweilch a'r Scarlets yn cystadlu yn y Cwpan Her.