Tafarn y Glôb: Lluniau chwarter canrif
- Cyhoeddwyd
Fis Awst 2019, mae Gerallt Williams yn nodi chwarter canrif ers dod yn landlord tafarn eiconig y Glôb ym Mangor a thros y 25 mlynedd hwnnw mae wedi cadw cofnod o gymeriadau a golygfeydd y dafarn gyda'i gamera.
"Dwi eisiau atgoffa pobl o'r hyn sydd i'w gael mewn tafarn fach a dweud 'dan ni'n dal yma' - achos unwaith rydyn ni wedi mynd, yna dyna ni," meddai Gerallt.
Cwsmeriaid selog y Glôb yn y nawdegau pan oedd pobl yn cael smocio mewn tafarn - mae'r gwaharddiad yn rhywbeth arall sy'n cadw'r to hŷn draw, meddai Gerallt
Mae ganddo filoedd o luniau wedi eu storio mewn bocsys ac mae nifer yn gweld golau dydd am y tro cyntaf wrth iddo fynd ati i'w cyhoeddi bob yn dipyn ar dudalen Facebook y dafarn, dolen allanol yn ystod 2019.
Mae wedi rhannu rhai ohonyn nhw gyda Cymru Fyw. Ydych chi'n adnabod unrhyw un?
Ymhlith y criw yma mae Carwyn Jones, (Y Dyn Gwyllt ar S4C) a'r cynhyrchydd a chyflwynydd radio Dyl Mei
Yr Elin Fflur ifanc yn ymweld
Mae'r Glôb wedi bod yn gartref i sawl cenhedlaeth o fyfyrwyr Prifysgol Bangor a Choleg y Normal. Dyma griw carioci: "Dwi'n cofio mai Angels gan Robbie Williams roedden nhw'n ei ganu," meddai Gerallt
Beirdd a chantorion. Noson lansio un o lyfrau'r diweddar Iwan Llwyd (ar y chwith)
Daeth tîm pêl-droed Bangor â Chwpan Cymru i'r Glôb ar ôl ei hennill yn 2000
Tîm y Glôb yn dathlu ennill Cwpan y Gynghrair Sul ar Ffordd Farrar, Bangor (Gerallt yw'r trydydd o'r chwith yn y rhes flaen)
Un o nifer o gigs Meic Stevens yn y dafarn
Tîm rygbi Bangor mewn gwisg ffansi ar ddiwedd tymor yn 2013
"Bryniau" yw disgrifiad Gerallt o'r llun yma o Bryn Terfel a Bryn Fôn wedi galw mewn ar ôl recordio rhaglen radio gyda'i gilydd
Rhai o fyfyrwyr Bangor yn 2015
Criw yn chwarae 'golff tafarndai' yn 2015 - Y Glôb oedd un o'r 'tyllau' ar y daith
Yn y ffrâm yn 2016
Criw ar benwythnos 'stag' o Loegr - mae enw'r ardal fel lle ar gyfer gweithgareddau awyr agored yn denu mwy a mwy o bartïon stag
Noson meic agored gyntaf y Glôb
Morio canu gyda Gethin Griffiths ar y gitâr
Meic Stevens yn galw heibio am lasied o win cyn perfformio yn Eisteddfod Môn 2017
Y Welsh Whisperer yn cadw traddodiad gigs bach y dafarn yn fyw yn 2018
Noson godi arian gan dîm rygbi'r brifysgol sy'n cael ei noddi gan dafarn y Glôb
Mae'r newidiadau enfawr ym myd tafarndai bach, gyda llai yn dod drwy'r drws a landlordiaid yn gorfod gweithio'n llawer caletach i ddenu cwsmeriaid, yn un o'r rhesymau pam fod Gerallt eisiau dangos y lluniau.
"Mae pethau wedi newid yn fawr ers imi ddechrau yn 1994," meddai.
"Mae llai yn dod i'r dafarn y dyddiau yma a llai o'r hen gymeriadau rownd y bar - ers talwm mi fyddwn i'n agor y drws am 11am ac mi fydden nhw yno'n disgwyl. Heddiw, does dim pwynt imi agor tan 3pm."
Costau uwch, patrymau cymdeithasu gwahanol a llai o bobl, ar wahân i fyfyrwyr, yn byw ym Mangor Ucha' yw rhai o'r rhesymau, meddai Gerallt.
Gerallt tu ôl i'r bar yn 2018. "Fama 'di'r lle" fel y canodd Maharishi am y dafarn.
"Hefyd, mae 'na Weatherspoons yn y dre sy'n cynnig cwrw yn rhad ac mae hynny wedi arwain at gau'r tafarnau bach."
Mae'r ystafell dywyll lle roedd Gerallt yn datblygu ei luniau yn dal yn yr atig a phopeth yn dal ynddi yn union fel wnaeth ei gadael hi 10 mlynedd yn ôl pan ddaeth ffonau symudol i mewn.
"Dwi'n falch mod i wedi cadw cofnod dros y blynyddoedd," meddai Gerallt, sydd yn gweithio fel ffotograffydd priodasau hefyd pan mae galw, ac amser yn caniatáu.
Hefyd o ddiddordeb:
