Aloha i'r Eisteddfod gan griw o Hawaii

Mae criw teledu o Hawaii wedi bod ar faes yr Eisteddfod Genedlaethol ddydd Mercher er mwyn dysgu mwy am sut mae'r Gymraeg yn iaith fyw y tu allan i'r ystafell ddosbarth.

Dywedodd Keli'i Wilson, sy'n gyflwynydd i sianel Oiwi TV, mai'r nod oedd dangos i bobl yn eu gwlad nhw bod modd i ieithoedd lleiafrifol ffynnu.

Bu'r criw yn siarad ag Eisteddfotwyr ar y maes yn Llanrwst yn ystod y dydd, gan gynnwys cyfarfod y pedwar ddaeth i'r brig yng nghystadleuaeth Dysgwr y Flwyddyn.