Mike Phillips yn 'hyderus iawn' o Gamp Lawn arall

Mae cyn-fewnwr Cymru, Mike Phillips yn "hyderus iawn" fod gan y garfan bresennol y profiad sydd ei angen i sicrhau Camp Lawn arall y penwythnos yma.

Bydd y crysau cochion yn herio Ffrainc ym Mharis nos Sadwrn gan geisio sicrhau cwblhau'r orchest am yr eildro mewn tair blynedd.

Hyd yn oed os nad yw Cymru'n ennill mae ganddyn nhw dal obaith o gipio'r Bencampwriaeth eleni, gan fod gan Ffrainc un gêm yn weddill.

Ond sicrhau pum buddugoliaeth allan o bump yw'r nod - gyda Phillips, a lwyddodd i wneud hynny ddwywaith yn ei yrfa, yn teimlo bod y momentwm gan Gymru.