Makaton: Techneg newydd i ddysgu'r Gymraeg i blant
Mae galw wedi bod i gyflwyno system iaith Makaton mewn meithrinfeydd ac ysgolion ar draws Cymru - gydag un ysgol yn dweud ei fod wedi helpu gwella sgiliau Cymraeg eu disgyblion.
Cafodd y dull yma o gyfathrebu ei greu yn yr 1970au ac 80au ac mae'n defnyddio llais, ystumiau dwylo a symbolau, sydd ychydig yn wahanol i ieithoedd arwyddo eraill fel BSL.
Yn Ysgol Llanfawr yng Nghaergybi mae'r plant yn cael gwersi a gweithgareddau wythnosol drwy Makaton.
Dywedodd y pennaeth Gwyn Williams fod y dull wedi talu ar ei ganfed yn barod, gan helpu'r rheiny gyda nam llafaredd yn ogystal â gwella Cymraeg llawer o'r plant.