Lisa Gwilym yn derbyn Gwobr Cyfraniad Arbennig gan Y Selar
Dyma'r foment y cafodd y gyflwynwraig Lisa Gwilym ei synnu yn fyw ar BBC Radio Cymru nos Fawrth, wrth gael ei chyflwyno gyda Gwobr Cyfraniad Arbennig gan Y Selar.
Cafodd y fraint ei chyhoeddi fel rhan o Wobrau'r Selar 2022, anrhydeddau blynyddol i ddathlu cerddoriaeth yng Nghymru.
Roedd y gwobrau'n cael eu cyhoeddi ar BBC Radio Cymru gan ddechrau nos Fawrth, a gyda Lisa Gwilym yn cyflwyno'r rhaglen, cafwyd cyhoeddiad annisgwyl ar yr awyr gan drefnydd y gwobrau, Owain Schiavone, mai hi oedd wedi ennill y Wobr Cyfraniad Arbennig.
Mae Lisa yn enw adnabyddus yn y sin gerddoriaeth Gymraeg, ac yn cyflwyno ar Radio Cymru a Radio Cymru 2 ers 20 mlynedd fis nesaf.
Bydd y cyhoeddiadau ar gyfer gweddill y gwobrau, sy'n cael eu rhoi gan dîm golygyddol Y Selar, yn parhau i gael eu cyhoeddi dros y dyddiau nesaf gan orffen ar raglen Tudur Owen ar 24 Chwefror.
Dyma enillwyr y Wobr Cyfraniad Oes yn y gorffennol:
2021 Tecwyn Ifan
2020 Gwenno
2019 Gruff Rhys
2018 Mark a Paul Roberts
2017 Heather Jones
2016 Geraint Jarman
2015 Datblygu