Ers yr achos cyntaf o Covid-19 yng Nghymru, mae'r effaith ar fywydau pobl wedi cynyddu.

Bydd modd ymarfer corff fwy nag unwaith y dydd wrth i gam nesaf y cyfnod clo ddechrau yng Nghymru.

BBC Cymru Fyw

Dyna ni am heddiw ar y llif byw - fe fyddwn ni yn ol unwaith eto fory gyda'r diweddaraf i chi ar sefyllfa'r pandemig yng Nghymru a thu hwnt.

Tan hynny, mwynhewch eich noson.

Llywodraeth Cymru

Mae Llywodraeth Cymru bellach wedi egluro nad yw pobl yng Nghymru yn cael gwneud cynlluniau i gyfarfod pobl eraill yn gyhoeddus, wedi i'r Prif Weinidog Mark Drakeford awgrymu y gallen nhw.

Mae pobl yn Lloegr bellach yn cael cyfarfod un person arall o du allan i'w cartref eu hunain, ac yn ei gynhadledd i'r wasg yn gynharach fe awgrymodd Mr Drakeford fod hynny eisoes yn wir yng Nghymru.

Ond mae Llywodraeth Cymru bellach wedi cadarnhau fod hynny ond yn wir ar gyfer pobl sy'n gadael y tŷ am reswm teilwng ac yn stopio i sgwrsio gyda rhywun tra'u bod nhw allan.

"Y broblem yw os 'dych chi wedi trefnu i'w cyfarfod," meddai llefarydd wrth BBC Cymru.

"Y gwir ydy na ddylai grwpiau o bobl drefnu cyfarfod."

Dywedodd yr AS Ceidwadol Andrew RT Davies fod sylwadau Mr Drakeford wedi creu "llanast", gan gwestiynu sut fyddai'r rheol yn cael ei phlismona beth bynnag.

Ffynhonnell y llun, Getty Images

Heddlu Dyfed Powys

Mae Heddlu Dyfed Powys yn dweud eu bod wedi rhoi 219 o ddirwyon i bobl dros benwythnos Gŵyl y Banc am dorri cyfyngiadau coronafeirws - 80% ohonynt i bobl oedd yn dod o du hwnt i'r ardal.

Yn eu plith roedd teulu o bump - a'r gyrrwr yn weithiwr iechyd allweddol - oedd wedi teithio gyda'u ci o Sir Warwick gyda'r bwriad o fynd am dro i Lanusyllt yn Sir Benfro.

Fe wnaethon nhw hefyd stopio teulu o Sir Northampton ger Caerfyrddin, ac er i'r rheiny gael cyfarwyddyd i fynd adref, cawsant eu dal eto yn Sir Benfro yn ddiweddarach.

Chwaraeon BBC Cymru

Mae Seland Newydd bellach wedi cyhoeddi y bydd rhai gemau chwaraeon proffesiynol, gan gynnwys rygbi, yn gallu cael eu chwarae eto ymhen ychydig wythnosau.

Gareth Blainey fu'n sgwrsio gyda Dewi Preece, gohebydd gyda TV NZ, am y sefyllfa yn Seland Newydd.

Plaid Cymru

Mae Plaid Cymru wedi galw am gynyddu'r ddirwy ar gyfer pobl sy'n torri'r cyfyngiadau coronafeirws, er mwyn annog pobl o Loegr i beidio teithio i lefydd hardd yng Nghymru i fynd am dro.

Ar hyn o bryd mae'r heddlu'n gallu rhoi dirwy o £60 i bobl sy'n torri'r rheolau, gyda hynny'n dyblu i £120 ar gyfer unrhyw ddigwyddiadau pellach.

Ond mae Comisiynwyr Heddlu Dyfed Powys a'r Gogledd, Dafydd Llywelyn ac Arfon Jones, wedi galw am gynyddu hynny i £1,000 am y drosedd gyntaf a hyd at £3,200 i bobl sy'n parhau i wneud.

"Dydy'r ddirwy bresennol ddim yn ddigon uchel gan fod pobl yn dal i dorri'r canllawiau a theithio cannoedd o filltiroedd ar siwrneiau sydd ddim yn angenrheidiol," medden nhw mewn datganiad.

Dywedodd llefarydd ar ran Llywodraeth Cymru nad ydyn nhw'n bwriadu newid y dirwyon yng Nghymru ar hyn o bryd ond eu bod nhw'n "cadw'r mater dan ystyriaeth".

Mae Boris Johnson wedi disgrifio sefyllfa ble byddai rhywun o Loegr yn gyrru i Gymru i fynd am dro fel "sefyllfa ddamcaniaethol", wrth drafod y canllawiau coronafeirws newydd.

Cafodd Mr Johnson ei holi gan arweinydd Llafur y DU, Keir Starmer, a fyddai teithwyr o Loegr sydd bellach yn cael mynd y car i ymarfer corff yn gorfod "troi rownd" pan yn cyrraedd y ffin gyda Chymru.

Wnaeth y Prif Weinidog ddim pwysleisio nad yw hynny'n cael ei ganiatau yng Nghymru, gan ddweud yn hytrach y byddai pobl yn defnyddio "synnwyr cyffredin".

"Dwi'n meddwl bod pobl Prydain yn deall mai dyma'r adeg i'r holl wlad ddod at ei gilydd a dilyn y rheolau," meddai.

Ond mewn ymateb i gwestiwn wedyn gan Fay Jones, AS Ceidwadol Brycheiniog a Maesyfed, am bobl yn teithio i ail gartrefi, dywedodd Mr Johnson nad oedd am weld hynny'n digwydd yng Nghymru nac unrhyw le arall.

Yn gynharach heddiw fe bwysleisiodd Prif Weinidog Cymru, Mark Drakeford na ddylai pobl deithio i Gymru i wneud ymarfer corff ac y gallen nhw gael dirwy os ydyn nhw.

Twitter

Y diweddaraf o Gymru a thu hwnt gydag Alun Thomas:

Llywodraeth Cymru

Mae Llywodraeth Cymru wedi galw ar Ganghellor Llywodraeth y DU i gadw'r cynllun saib o'r gwaith yn ei le y tu hwnt i ddiwedd y mis.

Rhybuddiodd Gweinidog yr Economi, Ken Skates y gallai economi Cymru gael ei tharo'n ddifrifol os na chaiff y cynllun furlough - sy'n talu 80% o gyflogau gweithwyr - ei ymestyn y tu hwnt i 1 Mehefin.

Mae Mr Skates a'r Gweinidog Cyllid, Rebecca Evans wedi ysgrifennu at y Canghellor Rishi Sunak yn gofyn iddo ymestyn y cynllun, neu redeg y risg bod mwy o gwmnïau'n diswyddo staff.

Dywedodd fod Llywodraeth Cymru'n awyddus i'r cynllun barhau yn enwedig ar gyfer sectorau fel twristiaeth, y diwydiant awyr, a'r diwydiant dur.

Twitter

Mae Ceri Lois Owen wedi bod yn rhannu ei phrofiadau ar wefan Caernarfon360 am ei chyfnod yn gweithio i gwmni Walt Disney yn Orlando, cyn i bopeth ddod i stop o achos y pandemig coronafeirws.

Twitter

Daw'r cyhoeddiad wedi i'r wlad ymdopi'n hynod o lwyddiannus gyda'r pandemig, gyda rheolau cymdeithasol cadarn yn parhau i fod mewn grym.

Cyngor Ceredigion

Mae Cyngor Ceredigion wedi atgyfnerthu'r neges nad oes dim wedi newid yn sylweddol o ran y cyfyngiadau cymdeithasol yn y sir.

Dywed y cyngor fod y tair wythnos nesaf yn rhai "hanfodol" i'r ardal. Mewn datganiad, dywedodd llefaryd ddydd Llun:

"Ar hyn o bryd, rydym ar ein mwyaf bregus ac mae’r tair wythnos nesaf yn hanfodol i Geredigion. Mae gan Geredigion y ganran uchaf o boblogaeth hŷn yng Nghymru ac mae’n rhaid i ni barhau i weithio gyda’n gilydd i’w diogelu.

"Mae’r niferoedd isel yn ganlyniad i’r ymdrechion enfawr a wnaed gan drigolion Ceredigion. Fodd bynnag, oherwydd y niferoedd isel hyn, mae gennym wytnwch cyfyngedig, ac mae hyn yn ein gwneud ni i gyd yn agored i niwed."

Ychwanegodd y datganiad:

"Trwy gydnabod y cyfarwyddyd y bydd y cyfyngiadau symud yn parhau yng Nghymru, dros y tair wythnos nesaf, bydd Llyfrgelloedd a Safleoedd Gwastraff Cartref yng Ngheredigion yn parhau i fod ar gau.

"Os gallwn barhau i wneud beth rydym wedi’i wneud hyd yn hyn, rydym yn gobeithio y gallwn ddod trwy’r gwaethaf a pharhau i ddiogelu trigolion Ceredigion.

"Ond mae arnom angen help pawb i gyrraedd y fan hon. Diolch am aros adref ac am beidio â gadael eich cartref oni bai ei fod yn hanfodol. Bydd hyn yn sicrhau na fydd yr holl waith da yn cael ei ddad-wneud."

Mae aelod seneddol o Loegr wedi cythruddo sawl un ar y cyfryngau cymdeithasol wedi iddo ddweud nad oes modd i rai yn Lloegr fynd i'w traethau agosaf yng Nghymru.

Dywedodd Daniel Kawczynski, sy'n aelod seneddol dros Yr Amwythig ag Atcham ei fod wedi cael llond bol ar gyfyngiadau gwahanol mewn rhannau gwahanol o'r DU.

Galwodd am gael gwared o Senedd Cymru hefyd.

"Mae'r gagendor presennol sydd yn datblygu o ganlyniad i'r argyfwng yn arwain at y prif weinidog yn dweud wrth fy etholwyr eu bod yn cael mynd am dro i'r traeth, ond chewch chi ddim croesi'r ffin i gyrraedd eich arfordir agosaf."

Ychwanegodd fod angen refferendwm arall i gael gwared ar "Gynulliad Cymru", gan ddychwelyd i un drefn wleidyddol i Gymru a Lloegr.