A dyna ddiwedd ein llif byw o gynhadledd Llywodraeth Cymru lle wnaeth y Prif Weinidog gadarnhau y bydd Cymru yn parhau ar lefel rhybudd sero o ran cyfyngiadau'r pandemig.

Mae nifer yr achosion dal yn uchel, meddai, ond dywedodd eu bod nhw'n gostwng.

Cafwyd cadarnhad ei bod hi'n debygol y bydd holl fusnesau Cymru'n aros ar agor drwy'r hydref a'r gaeaf os ydi'r sefyllfa bresennol yn parhau.

Fe ddywedodd Mr Drakeford hefyd y bydd hi'n haws o heddiw ymlaen i ymweld ag anwyliaid mewn cartrefi gofal.

Bydd mwy o hyblygrwydd gan y cartrefi i ganiatáu i ymwelwyr wneud prawf yn y tŷ cyn treulio amser yn y cartref. Bydd cyfyngiadau ymbellhau cymdeithasol o fewn y cartrefi gofal hefyd yn cael eu llacio.

Mwynhewch eich penwythnos a chofiwch bod y straeon diweddaraf i'w gweld ar hafan Cymru Fyw.

Diolch am eich cwmni.

Ffynhonnell y llun, PA Media

Ceidwadwyr Cymreig

Croesawodd llefarydd iechyd y Ceidwadwyr Cymreig, Russell George, benderfyniad Llywodraeth Cymru i'w gwneud yn haws i ymweld â chartrefi gofal "fel bod pobl yn gallu ymweld â'u hanwyliaid".

Ond dywedodd bod yna "dal rhai anghysondebau" yng nghanllawiau coronafeirws Cymru.

"Es i angladd ddoe, roedd yn rhaid i bobl a oedd yn mynychu'r eglwys wisgo mwgwd, ond er hyn mae modd mynd i dafarn heb fwgwd," meddai.

Ychwanegodd bod yna "ychydig o ddryswch o ran y cynllun rheoli, oherwydd rydyn ni'n gwybod bod cynllun pwysau'r gaeaf ar gyfer y GIG yn dod allan ar 18 Hydref.

"Rhyddhawyd hwn fis yn gynt y llynedd, ac yn wreiddiol fe glywsom ni y byddai'r cynllun yma'n rhan o'r cynllun rheoli a gafodd ei gyhoeddi heddiw.

"Mae yna bach o ddryswch yma," ychwanegodd.

Plaid Cymru

Dywed llefarydd iechyd Plaid Cymru, Rhun ap Iorwerth, fod Cymru "yn parhau mewn sefyllfa ddifrifol wrth i nifer yr achosion fod yn uchel ond eu bod yn mynd i'r cyferiad iawn".

Wrth siarad ar Wales Today dywedodd ei bod yn bwysig bod y gwrthbleidiau yn "gofyn am gymaint o fanylion â phosib".

"Ry'n ni angen gwybod bod yna gynllun petai'r sefyllfa yn gwaethygu.

"Roedd yna naid yn y ffigyrau ddoe sydd, o bosib, yn gwneud rhai pobl yn nerfus.

"Ry'n ni angen gwybod bod y llywodraeth yn gallu gweithredu ar hynny a bod gan lywodraeth y DU gynlluniau ar gyfer ffyrlo, petai angen.

"Ry'n ni'n gobiethio na ddaw hi i hynny ond mae wastad angen mwy o fanylion."

Does dim rhaid talu am gael pàs Covid neu brawf llif unffordd ond mae rhai pobl yng Nghymru eisoes wedi cael eu twyllo.

Mae Llywodraeth Cymru a chynghorau sir wedi bod yn rhybuddio am dwyll cysylltiedig â phasys Covid.

Dywed Alison Farrar, prif swyddog Safonau Masnach Cymru: "Mae sgamwyr mor gyflym y diwrnodau yma wrth geisio twyllo bod rhywbeth yn ddilys.

"Am fod hwn mor newydd, does neb yn gwybod sut y mae'r un go iawn yn edrych ac os ydym yn cael neges destun yn ein hysbysu am sut mae cael pàs, mae'n anodd gwybod a yw'r neges yn un ffug."

Cadarnhaodd Ms Farrar fod pobl eisoes wedi cael eu twyllo i dalu swm o arian am bàs wedi iddynt dderbyn e-bost neu neges destun.

"Os ydych yn cael cais i roi manylion cerdyn banc er bod y neges yn dweud na fyddant yn eu defnyddio fe ddylai hynna fod yn rhybudd. Pam fyddent angen eich manylion banc?"

Fe anogodd pobl i "feddwl yn ofalus" cyn gwasgu dolen ac ymateb i negeseuon "brys" gan bobl nad ydynt yn eu hadnabod.

Llywodraeth Cymru

Dywedodd y Prif Weinidog Mark Drakeford y gallai profion llif unffordd yn lle profion PCR gael eu rhoi i bobl mewn grwpiau llai bregus os nad yw'r GIG yn gallu cynnig prawf PCR i bawb yn ystod y gaeaf.

Byddai profion PCR yn cael eu defnyddio "ar gyfer y poblogaethau mwyaf bregus, sydd yn y sefyllfaoedd mwyaf bregus" ond gallai y rhai mewn grwpiau llai bregus gael cynnig prawf llif unffordd yn gyntaf, meddai, ac "os ydyn nhw'n profi'n bositif, yna byddant yn gallu cymryd prawf PCR."

Ychwanegodd nad oedd unrhyw gynlluniau i orfodi pobl i dalu arian am brawf PCR.

Ond dywedodd y bydd llai o bwyslais ar "brofi ar raddfa fawr" yn y cynllun rheoli ar ôl y gaeaf,

BBC Radio Wales

"Byddai'n echrydus petaem yn wynebu yr un sefyllfa â llynedd - sef cael cyfnod clo byr ac un llawn cyn Nadolig," medd Sara Jones, Pennaeth Consortiwm Manwerthu Cymru wrth siarad ar Radio Wales.

"Rhaid i ni aros ar agor ond hefyd mae'n rhaid i fusnesau eraill aros ar agor hefyd.

"Mae lletygarwch a manwerthu yn mynd law yn llaw felly ry'n yn gobeithio y bydd holl fusnesau y stryd fawr yn aros ar agor wrth i ni symud tuag at gyfnod y Nadolig."

Dywed Neil Collier, Perchennog Colliers Photo Imaging yn Uplands Abertawe bod cyhoeddiad heddiw yn galonogol gan fod cyfnod clo sydyn adeg y Nadolig y llynedd wedi bod yn dipyn o ergyd ac "roedd nifer o gwsmeriaid wedi mynd i banic yn poeni am eu harchebion".

"Mae'r cyhoeddiad yn rhoi mwy o sicrwydd i fusnesau yn ystod misoedd y gaeaf - ein cyfnod prysuraf," ychwanegodd.

Ffynhonnell y llun, bbc

Llywodraeth Cymru

Dywedodd y Prif Weinidog Mark Drakeford ei fod yn "pryderu'n fawr" am gynlluniau Llywodraeth y DU i newid y rheolau profi ar gyfer pobl sy'n dychwelyd o wyliau tramor.

O ddiwedd mis Hydref, ni fydd pobl sydd wedi'u brechu'n llawn ac sy'n dod i Loegr yn gorfod cymryd prawf PCR ddeuddydd wedi cyrraedd. Yn hytrach, bydd modd iddynt gymryd prawf llif unffordd.

Dywedodd Mr Drakeford fod profion PCR yn galluogi olrhain amrywiolion ac "nad oedd yn sicr" fod LFTs yn gallu cael eu defnyddio yn yr un ffordd.

Dywedodd fod yna "risg ein bod yn gostwng ein hamddiffyniadau".

Ychwanegodd ei fod yn "anodd iawn" i Gymru beidio dilyn cynlluniau Llywodraeth y DU gan fod nifer o deithwyr yn defnyddio meysydd awyrennau yn Lloegr i deithio tramor.

Ffynhonnell y llun, Getty Images

Llywodraeth Cymru

Dywedodd y Prif Weinidog, Mark Drakeford, nad oedd hi'n bosib nodi'n benodol pryd y dylid penderfynu a ddylid gosod mwy o gyfyngiadau ai peidio.

"Mae'r gaeaf yma yn llawer mwy cymhleth na'r llynedd," meddai.

Tra bod y GIG yn delio gyda Covid, dywedodd: "Ar yr un pryd, mae'r gwasanaeth iechyd yn brysur iawn yn delio gyda'r holl bethau rydyn ni'n gofyn iddynt eu cyflawni.

"Bydd y penderfyniad yn dibynnu ar yr holl bethau mae'r gwasanaeth iechyd yn gorfod ymateb iddynt."

Ychwanegodd fod y ffigyrau brechu yn parhau i fod yn dda ond bod mwy i'w wneud.

Dywedodd y byddai'n hoffi gweld 80% o bobl yn eu 30au a'u 20au yn cael y brechlyn.

Bydd Nadolig 2021 yn "fwy tebyg i Nadolig y gorffennol os na fydd rhywbeth annisgwyl yn digwydd," medd y Prif Weinidog wrth ateb cwestiynau gan newyddiadurwyr.

Mae'n cynllun rheoli Covid yn dangos y bydd y cyfyngiadau presennol yn gallu parhau yn ystod yr hydref a'r gaeaf.

"Ond mae hyn yn ddibynnol arnom ni i gyd i wneud yr hyn sy'n ddiogel.

"Os nad oes rywbeth annisgwyl yn digwydd bydd modd cynllunio ar gyfer Nadolig tebyg i'r gorffennol."

Ffynhonnell y llun, Getty Images

BBC Radio Cymru

Mae 'na groeso gan y diwydiant teithio i'r cyhoeddiad y bydd nifer y gwledydd ar y rhestr goch pan yn teithio dramor yn gostwng o 54 i saith ddydd Llun.

Mae Llywodraeth Cymru wedi cadarnhau eu bod nhw'n dilyn trefn Lloegr - gan y byddai hi'n anymarferol i geisio gweithredu system wahanol.

Bydd Colombia, Gweriniaeth Dominica, Ecuador, Haiti, Panama, Periw a Venuzuela yn parhau ar y rhestr goch.

Gwledydd sy’n cael eu tynnu o’r rhestr goch - Affganistan, Angola, Yr Ariannin, Bolivia, Botswana, Brasil, Burundi, Cape Verde, Chile, Ciwba, Congo (Gweriniaeth Ddemocrataidd), Costa Rica, De Affrica, Eritrea, Eswatini, Ethiopia, Georgia, Guiana Ffrengig, Guyana, Gwlad Thai, Indonesia, Lesotho, Malawi, Mayotte, Mecsico, Mongolia, Montenegro, Mozambique, Myanmar, Namibia, Nepal, Paraguay, Réunion, Rwanda, Seychelles, Sierra Leone, Somalia, Sudan, Suriname, Tanzania, Trinidad a Tobago, Tunisia, Uganda, Uruguay, Ynysoedd Philippines, Zambia, Zimbabwe.

Ffynhonnell y llun, Getty Images

“Mae'n galonogol clywed newyddion da o'r diwedd," medd Nicki Collier, rheolwr y Bluebell Coffee and Kitchen yn Nhŷ-coch ar gyrion Abertawe wedi i'r Prif Weinidog ddweud ei fod yn awyddus i gadw Cymru "ar agor".

"Roedd cau yn sydyn dros nos y llynedd yn sioc. Roedd yn rhaid i ni ganslo nifer o archebion ac ad-dalu cwsmeriaid ac roedd hynna'n ddrud.

"Croesi bysedd nawr y bydd hwn yn newyddion da ar gyfer y Nadolig."

Llywodraeth Cymru

"Mae'n cyngor am brofi yn parhau yr un fath sef ewch am brawf PCR os oes gennych symptomau.

"Mae'r niferoedd sydd wedi bod yn cael prawf o'r fath wedi codi yn ddiweddar - i fyny hyd at 190,000 yr wythnos hyd at ddiwedd mis Medi.

"Os bydd y galw yn cynyddu bydd yn rhaid i ni wneud dewisiadau i gwrdd â'r gofyn. Ry'n yn gweithio gyda gweddill y DU i gyflwyno cynlluniau."

Iechyd Cyhoeddus Cymru

Llywodraeth Cymru

"Mae gwaith ymchwil gan Brifysgol Abertawe yn dangos bod nifer yr achosion yn uwch yn ystod y don hon o Covid na'r gaeaf diwethaf ond mae'n ymddangos ein bod wedi pasio brig y don," medd Mark Drakeford.

"Ond rhaid cofio nad yw'r pandemig ar ben. Mae ein arbenigwyr meddygol yn rhybuddio y gallai bod mwy o achosion o'r ffliw yn ystod gaeaf eleni ac o bosib heintiau anadlol eraill," ychwanega.

Llywodraeth Cymru

O heddiw ymlaen bydd hi'n haws ymweld ag anwyliaid mewn cartref gofal, medd y Prif Weinidog.

"Mae cartrefi gofal ac ymweld â chartrefi gofal wedi bod yn un o'r materion mwyaf heriol yn ystod y pandemig," meddai.

"Bydd hawl nawr gan reolwyr cartrefi ganiatáu i ymwelwyr gymryd prawf unffordd lft adref ac ni fydd rhaid iddyn nhw hunanynysu mewn ystafell preswylydd nag mewn ystafell ymweld benodol.

"Bydd cyfyngiadau cysylltiedig â rhoddion hefyd yn cael eu llacio gan gynnwys bwyd a diod."

Llywodraeth Cymru

Dywed y Prif Weinidog bod y broses o roi brechlyn atgyfnerthol i bobl yn mynd rhagddi a bod oddeutu 130,000 o bobl wedi ei dderbyn hyd yma.

"Mae mwy o rai rhwng 12 a 15 oed wedi cael eu brechu yr wythnos hon ac mae'r adborth ry'n yn ei gael gan ganolfannau brechu yn gadarnhaol.

"Dyw hi byth yn rhy hwyr i chi gael eich brechu," ychwanegodd Mr Drakeford, "ac mae modd trefnu mynd i ganolfan frechu a chael gwybodaeth oddi ar ein gwefan."

Llywodraeth Cymru

Mae'r Prif Weinidog yn cadarnhau bod Cymru, wedi i'r cabinet gael cyngor gan arbenigwyr gwyddonol a meddygol, yn parhau ar lefel sero.

"Fydd yna ddim newidiadau mawr yn ystod yr wythnosau nesaf ar wahân i'r hyn sydd wedi cael ei nodi eisoes," medd Mark Drakeford.

Mae'n cadarnhau y bydd pasys Covid yn dod i rym ddydd Llun ac y bydd hi'n ofynnol i unrhyw un dros 18 i gael pas neu brawf negyddol cyn mynd i glwb nos, digwyddiad tu mewn lle mae dros 500 o bobl yn sefyll, digwyddiad tu allan lle mae dros 4,000 o bobl yn sefyll neu unrhyw ddigwyddiad i dros 10,000 o bobl.

Llywodraeth Cymru

"Ry'n hefyd wedi gweld gostyngiad yn y niferoedd o bobl sydd â Covid mewn ysbytai.

"Ond mae'r GIG a'r gwasanaethau cymdeithasol yn parhau i wynebu pwysau mawr - pwysau sy'n deillio o achosion na sy'n gysylltiedig â'r haint, ac achosion brys,"

Ychwanegodd y Prif Weinidog nad mynd i uned brys yw'r ateb cyntaf ar gyfer pob problem iechyd.