Dyna ddiwedd y Cwestiynau i'r Prif Weinidog.

Diolch am ddilyn - ymunwch â ni eto yr wythnos nesaf.

Unwaith eto heno, mae'r Senedd yn cael ei goleuo yn lliwiau glas a melyn baner Wcráin fel arwydd o undod â hwy

Da boch chi.

Ffynhonnell y llun, Senedd Cymru

O ran darparu gwasanaethau acíwt a brys yn ardal Bwrdd Iechyd Prifysgol Hywel Dda yn y dyfodol, dywed y prif weinidog "nad oes unrhyw gynlluniau i gael gwared ar unrhyw wasanaethau o Lwynhelyg, gan gynnwys ei ddarpariaeth damweiniau ac achosion brys, cyn unrhyw newidiadau ehangach a allai gael eu gwneud i wasanaethau iechyd yn y rhan honno o Gymru."

Ychwanegodd, “Rwy’n annog unrhyw un sydd â diddordeb yn nyfodol y gwasanaethau hynny i ymgysylltu’n uniongyrchol â’r bwrdd iechyd, gyda’i glinigwyr sy’n gyfrifol am ddatblygu cynlluniau a fydd yn rhoi gwasanaethau iechyd yn y rhan honno o Gymru ar sylfaen gynaliadwy am yr 20 mlynedd nesaf.

"Mae cyfleoedd wedi mynd a dod yn ne-orllewin Cymru oherwydd bod ymlyniad pobl i'r status quo yn eu hatal rhag bod yn fodlon symud ymlaen gyda chynlluniau a fyddai wedi arwain at fuddsoddiad mawr yn y gwasanaethau hynny."

Dywed y prif weinidog fod Dydd Gŵyl Dewi yn darparu "llwyfan gwirioneddol i ni allu codi proffil ac ymwybyddiaeth o Gymru".

Dywed y bydd “digwyddiadau heddiw yn cael eu cynnal yn Tokyo, Dulyn, Llundain, Washington, Brwsel, Dubai, Beijing a Bangalore”.

Fel enghraifft, dywed y bore yma iddo ffurfioli’r cyfeillgarwch rhwng Cymru ac Oita - a sbardunwyd yn 2019 yn ystod Cwpan Rygbi'r Byd yn Japan - drwy arwyddo Memorandwm Cyd-ddealltwriaeth.

Ffynhonnell y llun, Llywodraeth Cymru

Mae arweinydd Plaid Cymru Adam Price yn tynnu sylw at y ffaith bod llongau sy’n cludo cargo o Rwsia yn dal i ddocio yng Nghymru, er gwaethaf galwadau gan Lywodraeth y DU i rwystro mynediad.

Mae'n dweud "ni ddylai un diferyn o olew o Rwsia gael ei ddadlwytho i Gymru trwy borthladd yng Nghymru tra bod gwaed diniwed yn cael ei dywallt yn Wcráin".

Mae'r Prif Weinidog Mark Drakeford yn ateb "rwy'n cytuno'n llwyr".

Ychwanegodd, “bydd angen i Lywodraeth y DU weithredu eto i wneud yn siŵr bod bwriad eu polisi, sef atal olew o Rwsia rhag cael ei ollwng ym mhorthladdoedd y DU—bod y polisi hwnnw’n effeithiol.

"A phan fo bylchau neu ffyrdd o gwmpas y rheolau, ac mae’n anochel y bydd eraill yn ceisio hynny, bod Llywodraeth y DU yn cael y wybodaeth honno cyn gynted â phosibl ac yna’n gallu gweithredu arni yr un mor gyflym.”

Ffynhonnell y llun, Getty Images

Mae Andrew RT Davies, arweinydd y Ceidwadwyr Cymreig yn y Senedd, yn rhoi cefnogaeth lawn ei blaid i ffoaduriaid o'r Wcráin i Gymru.

Mae’n awgrymu “fodel newydd yn gorfod dod i’r amlwg gan Lywodraeth Cymru ac, yn wir, gan Lywodraeth y Deyrnas Unedig, i ymdrin â maint yr hyn sy’n ein hwynebu, fel y gall pobl gael eu cefnogi’n wirioneddol yn eu hawydd naill ai i ymgartrefu yng Nghymru neu yng ngweddill y Deyrnas Unedig, neu, yn wir, ei defnyddio fel hafan dros dro tra gobeithio y gall pethau sefydlogi yn ôl yn Wcráin, ac Wcráin yn dod yn genedl sofran balch yr ydym ni ar draws y Siambr hon am ei gweld ar gyfandir Ewrop.”

Mae'r prif weinidog yn dweud bod "un o bob pedwar o bobl yn holl weithlu Cymru bellach yn cael eu cyflogi gan gyflogwr Amser i Newid.

“Felly, mae hynny’n golygu bod y cyflogwr wedi ymrwymo ei hun i’r camau y gallan nhw eu cymryd i wneud yn siŵr, os yw pobl yn wynebu anhawster o’r fath, nad yw stigma yn eu hatal rhag dod ymlaen i geisio’r cymorth sydd ei angen arnynt.”

Mae Amser i Newid Cymru yn gweithio i "roi terfyn ar y stigma a'r gwahaniaethu a wynebir gan bobl â phroblemau iechyd meddwl".

Mae’r cyfarfod llawn heddiw yn dechrau gyda Chwestiwn Brys, gyda Jack Sargeant, yr Aelod Seneddol Llafur dros Alun a Glannau Dyfrdwy, yn gofyn am ddatganiad "am effaith ymosodiad Rwsia ar Wcráin ar ddinasyddion a busnesau Cymru".

Dywed y Prif Weinidog Mark Drakeford "fel cenedl noddfa byddwn yn gwneud popeth o fewn ein gallu i gefnogi pobl Wcráin. Mae Cymru yn agored i roi croeso a diogelwch i'r rhai sy'n ffoi rhag rhyfel ac erledigaeth".

Mae'n cyhoeddi £4m o gymorth ariannol a dyngarol ar gyfer Wcráin.

Ychwanegodd y bydd Llywodraeth Cymru yfory yn cynnal trafodaethau brys gydag arweinwyr awdurdodau lleol i sicrhau bod paratoadau yn eu lle i dderbyn ffoaduriaid.

Wrth siarad â baner Wcráin yn cael ei harddangos yn y Siambr, dywedodd fod y GIG yng Nghymru hefyd yn edrych ar sicrhau bod cyflenwadau meddygol ar gael.

“Mae pobol Cymru wedi eu syfrdanu gan yr ymosodiad ar Wcráin,” meddai’r prif weinidog.

Mae baner Wcráin hefyd yn chwifio uwchben pencadlys Llywodraeth Cymru ym Mharc Cathays, Caerdydd, ddydd Mawrth.

Mae cyfyngiadau’r pandemig ar Senedd Cymru yn cael eu lleddfu heddiw, gyda phob un o'r 60 aelod yn cael mynychu os ydyn nhw'n dymuno.

Dyma'r tro cyntaf ers mis Mawrth 2020 i'r Senedd fedru cyfarfod yn llawn ym Mae Caerdydd.

Ond mae cyfraniadau o bell yn gallu parhau trwy Zoom.

Mae'r Senedd wedi cyfarfod ar-lein, neu mewn fformat hybrid, ers dechrau'r pandemig.

Mae cyfarfodydd "hybrid" presennol wedi gweld nifer fach o aelodau'r yn cyfarfod yn gorfforol a'r gweddill yn cymryd rhan trwy gynhadledd fideo.

Cyfarfodydd rhithwir y Senedd oedd y cyntaf o'u math yn y DU.

Daeth sesiynau hybrid yn Nhŷ'r Cyffredin i ben yr haf diwethaf.

Prynhawn da, croeso i'n darllediad byw o seithfed sesiwn Cwestiynau i'r Prif Weinidog yn 2022.

Oherwydd y sefyllfa yn Wcráin, ni fydd y digwyddiad i ddathlu Gŵyl Dewi yn mynd rhagddo yn y Senedd heddiw.