Dyna ddiwedd y Cwestiynau i'r Prif Weinidog.

Diolch am ddilyn - ymunwch â ni eto yr wythnos nesaf.

Bydd y Senedd yn cael ei goleuo unwaith eto yn lliwiau glas a melyn baner Wcráin heno, fel arwydd o undod â hwy.

Da boch chi.

Ffynhonnell y llun, Senedd Cymru

Mae Rhys ab Owen yn galw ar Lywodraeth Cymru i bwyso ar lywodraeth y DU i "ddarparu'r cyllid digonol" ar gyfer y rheilffordd o Fae Caerdydd i Lantrisant "a'r cyllid sydd ei angen i gynyddu lefel y gwasanaethau sydd eu hangen ym mhob gorsaf yng Nghaerdydd."

Dywed Lesley Griffiths bod "Llywodraeth Cymru wedi galw dro ar ôl tro ar lywodraeth y DU i fynd i'r afael â'r tanfuddsoddi hanesyddol mewn seilwaith rheilffyrdd ym mhob rhan o Gymru".

Mae'r AS Llafur John Griffiths yn galw ar Lywodraeth Cymru i ddatblygu gwasanaethau arbenigol meddygol ymhellach ar draws Cymru.

Meddai, "bythefnos yn ol, cyfarfûm ag un o'm hetholwyr iau, Elliot, a'i fam, Lucy. Mae y ddau yma yn y Senedd heddyw yn yr oriel gyhoeddus yn gwylio y trafodion. Mae Elliot yn bum mlwydd oed, ac yn dioddef o gyflwr prin o’r enw nychdod cyhyrol duchenne, anhwylder genetig a nodweddir gan golli cyhyr cynyddol. Fel rhan o’i driniaeth, mae Lucy yn awyddus iawn bod Elliot yn cael cyfle i gael mynediad i dreialon clinigol. Ar hyn o bryd, nid oes capasiti yng Nghymru i gynnal treialon clinigol o'r fath. Nid oes arbenigwr niwrogyhyrol yn ne Cymru".

Atebodd Lesley Griffiths, "os nad yw'r treialon ymchwil hyn ar gael yng Nghymru, gall Ymchwil Iechyd a Gofal Cymru hwyluso mynediad cleifion i dreialon mewn rhannau eraill o'r DU".

Mae Jenny Rathbone o'r Blaid Lafur yn galw ar Lywodraeth Cymru i gryfhau diogelwch bwyd yng Nghymru.

Mae Lesley Griffiths yn ateb, "mae'r system fwyd yn gweithredu ar sail y DU gyfan. Mae Llywodraeth Cymru felly'n gweithio gyda Llywodraeth y DU a'r gweinyddiaethau datganoledig i nodi risgiau ac yn ymgysylltu â rhanddeiliaid i'w rheoli. Yng Nghymru, rydym yn hyrwyddo diogelwch bwyd drwy fuddsoddi yn y diwydiant gweithgynhyrchu bwyd, cefnogi amaethyddiaeth, a darparu cefnogaeth sylweddol i amrywiaeth eang o brosiectau cymunedol."

Dywed Jenny Rathbone, "nid oes nesaf peth at ddim o'r bwyd sy'n dod i'r farchnad gyfanwerthu yn cael ei dyfu yng Nghymru. Nawr, rwy'n gwerthfawrogi'n llwyr y gwaith yr ydych chi, weinidog, wedi'i wneud fel y gweinidog materion gwledig i geisio ehangu'r sector garddwriaeth yng Nghymru, ond mewn gwirionedd nid yw'n ddigon".

Dywed arweinydd Plaid Cymru Adam Price, "A gaf innau, ar ran grŵp Plaid Cymru yn y Senedd, ond hefyd ar ran y blaid yn fwy eang, estyn ein cydymdeimladau dwysaf ni hefyd i'r prif weinidog ar ei golled. Mae'n ergyd y mae'n anodd amgyffred â hi, a dweud y gwir, ac rŷn ni eisiau gwneud yn sicr ei fod e'n ymwybodol faint o gefnogaeth rŷn ni eisiau dangos iddo fe yn y cyfnod anodd yma, ac mae hynny, fel sydd wedi cael ei ddweud eisoes, yn cael ei rannu mor eang. Mi oeddwn i yng nghynhadledd Melin Drafod ar y penwythnos, ac mi oedd pobl yno hefyd wedi teimlo yr ergyd o'r golled yma a'r ing y mae'r prif weinidog yn ei wynebu."

Wrth symud ymlaen at bwnc y GIG, dywed Mr Price bod "swyddi gweigion i fyny, cyfraddau salwch i fyny, gwariant ar asiantaethau i fyny, cyfraddau gadael i fyny. Yr unig beth sy'n mynd i lawr, Trefnydd, yw morâl y staff a'u hymddiriedaeth yn y llywodraeth Lafur hon. Beth yw eich cynllun i newid y sefyllfa hon?"

Atebodd Lesley Griffiths, "y ffigurau sydd gennyf o'm blaen ynghylch ystadegau gweithlu'r GIG - a staff a gyflogir yn uniongyrchol yw hyn - yw bod y gweithlu bellach ar y lefelau uchaf erioed. Mae gennym dros 105,000 o bobl, 90,943 o weithwyr cyfwerth ag amser llawn, a gyflogir yn uniongyrchol gan sefydliadau GIG Cymru."

Mae Andrew RT Davies, arweinydd y Ceidwadwyr Cymreig yn y Senedd, yn cyfeirio at gyhoeddiad llywodraeth y DU o derfyn amser chwe wythnos i ddatblygwyr arwyddo cytundeb llywodraeth i drwsio eu tyrau anniogel neu gael eu gwahardd o'r farchnad.

Meddai, “drwy Ddeddf Diogelwch Adeiladau 2022 sydd wedi’i phasio yn San Steffan, mae mesurau i wneud yn siŵr bod pobl sy’n byw mewn yr hyn a elwir yn adeiladau amddifad, sef adeiladau sydd wedi’u hadeiladu gan gwmnïau sydd wedi dymchwel unwaith y mae prosiect wedi'i orffen, yn gallu cael eu hadfer a'r rhwymedigaethau yn cael eu talu gan y cwmnïau. A wnewch chi, fel llywodraeth, godi'r mesurau hynny a'u hymgorffori yng nghyfraith Cymru yma, fel y gall trigolion sy'n canfod eu hunain mewn adeiladau tebyg gael yr amddiffyniadau hynny?"

Dywed Lesley Griffiths bod gweinidog newid hinsawdd Llywodraeth Cymru, Julie James, yn "gweithio'n agos gyda llywodraeth y DU i weld pa agweddau o'r ddeddfwriaeth y gallwn ni edrych arnyn nhw".

Ffynhonnell y llun, Getty Images

Wedi cyhoeddiad y strategaeth trais yn erbyn menywod, cam-drin domestig a thrais rhywiol y llynedd, dywed AS y Rhondda Buffy Williams bod achosion yn cynyddu ar ddiwrnodau gemau rygbi rhyngwladol.

Meddai, "Gyda dechrau'r chwe gwlad, rwy'n ymgyrchu, ym mis Chwefror, gyda phartneriaid, i godi ymwybyddiaeth o'r cymorth lleol a chenedlaethol sydd ar gael i ddioddefwyr a throseddwyr".

Dywed Lesley Griffiths fod "Llywodraeth Cymru yn parhau i ariannu cynghorwyr rhanbarthol a gwasanaethau arbenigol, gan gynnwys llinell gymorth Byw Heb Ofn 24/7".

Mae aelodau’r Senedd yn arsylwi munud o dawelwch i ddiweddar wraig Mark Drakeford, Clare.

Wrth gychwyn cyfarfod llawn cyntaf y Senedd ers ei marwolaeth, dywedodd y Llywydd Elin Jones fod y prif weinidog a’i deulu “yn ein calonnau a’n gweddïau”.

Meddai: "rydyn ni gyd yn boenus ymwybodol am golled sydyn y prif weinidog dros y penwythnos. Ac, ar ein rhan ni gyd, rydw i yn cydymdeimlo gyda fe a’i deulu".

Dywedodd y Trefnydd Lesley Griffiths y byddai Mr Drakeford yn ddiolchgar am gydymdeimlad yr Aelodau o'r Senedd.

Cyhoeddodd Llywodraeth Cymru ddydd Sadwrn fod Mrs Drakeford wedi marw'n sydyn, yn 71 oed.

Ffynhonnell y llun, PA Media

Prynhawn da, croeso i'n darllediad byw o'r Cwestiynau i'r Prif Weinidog.

Y Trefnydd Lesley Griffiths sy'n ateb y cwestiynau heddiw, yn dilyn y newyddion trist ddydd Sadwrn am farwolaeth sydyn Clare Drakeford, gwraig y prif weinidog,

Cynhelir y cyfarfod llawn ar ffurf hybrid, gyda rhai aelodau yn Siambr y Senedd ac eraill yn ymuno drwy gyswllt fideo.