Dyna ddiwedd y Cwestiynau i'r Prif Weinidog.

Diolch am ddilyn - ymunwch â ni eto yr wythnos nesaf.

Bydd y Senedd yn cael ei goleuo unwaith eto yn lliwiau glas a melyn baner Wcráin heno, fel arwydd o undod â hwy.

Da boch chi.

Ffynhonnell y llun, Senedd Cymru

Mae Peredur Owen Griffiths yn mynegi pryderon am "gostau annheg" sy'n wynebu pobl sy'n "brwydro i dalu dyled".

Meddai, "mae'n ymddangos nad yw'r system a fabwysiadwyd gan rai cwmnïau casglu dyledion yn ddim mwy na raced sy'n manteisio ar y rhai mwyaf agored i niwed yn ein cymunedau. Mae'n rhaid iddo ddod i ben. A all y llywodraeth gyhoeddi canllawiau i'r sector cyhoeddus a chwmnïau cyfleustodau fel eu bod dim ond gweithio gyda chwmnïau casglu dyledion sy'n gweithio ar y cyd â'r bwrdd ymddygiad gorfodi? Byddwn yn ddiolchgar pe gallech hefyd archwilio unrhyw ffyrdd o gwtogi ar weithrediadau twyllodrus yn y sector hwn er mwyn amddiffyn ein dinasyddion."

Atebodd Lesley Griffiths, "rydych yn codi pwynt pwysig iawn, a gwn fod y Gweinidog dros Gyfiawnder Cymdeithasol, yr wythnos nesaf, yn cyfarfod â chwmnïau gorfodi i gyflwyno'r union bwynt hwnnw a wnewch."

Mae Hefin David yn cyfeirio at ddwy farwolaeth wedi ymosodiadau gan gŵn yn ardal Caerffili mewn ychydig dros flwyddyn.

Y llynedd, cafodd dau berson eu carcharu ar ôl cyfaddef eu bod yn berchen ar gi peryglus neu â gofal am gi oedd allan o reolaeth yn dilyn marwolaeth Jack Lis, 10 oed, ym mis Tachwedd 2021.

Ac ym mis Rhagfyr, bu farw Shirley Patrick, 83, 17 diwrnod wedi ymosodiad gan gi. Cafodd pedwar o bobl eu harestio a'u rhyddhau dan ymchwiliad.

Dywed Hefin David, “mae rhaglen ddogfen Panorama gan y BBC yn ddiweddar wedi tynnu sylw at weithgareddau bridwyr cŵn diegwyddor, sy’n bridio cŵn ac sy’n cyfuno bridiau i fynd heibio i fylchau yn y gyfraith, ac mae’r cŵn hynny wedyn yn canfod eu ffordd i mewn i gymunedau fel Penyrheol ac eraill ar draws Cymru.

"Felly, wrth ddiweddaru Rheoliadau Lles Anifeiliaid (Bridio Cŵn) (Cymru) 2014, yr ydych wedi ymrwymo iddynt, a ellir ystyried y mater hwn, yn enwedig croesfridio?"

Atebodd Lesley Griffiths, "Rwy'n sicr yn hapus iawn i edrych ar eich awgrym. Fel y gwyddoch, gwnaethom ddiweddaru'r rheoliadau trwyddedu lles anifeiliaid, a gwnaethom gau bylchau yno yn ymwneud â gwerthu anifeiliaid anwes i geisio gwella gorfodi gan awdurdodau lleol."

Ychwanegodd, "Ond mae mwy y gallwn ei wneud. Rwyf wedi gofyn i swyddogion ddechrau edrych eto ar drwyddedu cŵn. Pan oeddwn yn ifanc, roedd yn rhaid i bobl gael trwydded cŵn, ac efallai mai dyma'r amser i edrych ar hynny. Rwyf wedi gofyn i'm prif swyddog milfeddygol dros dro wneud hynny i mi."

Ffynhonnell y llun, Llun teulu

"Pam gymerodd hi mor hir i chi ?" meddai arweinydd Plaid Cymru Adam Price ar ôl i Lywodraeth Cymru gynnig 3% yn ychwanegol i wyth undeb iechyd ar ben y £1,400 a addawyd eisoes.

Gohiriwyd streic gan staff GIG Cymru yn dilyn cynnig gwell gan weinidogion.

Mae’r Coleg Nyrsio Brenhinol, y Gymdeithas Siartredig Ffisiotherapi, Coleg Brenhinol y Bydwragedd a staff ambiwlans undeb y GMB wedi gohirio streiciau.

"Dyma'r gyllideb galetaf i mi fel gweinidog erioed" meddai Lesley Griffiths.

Mae Llywodraeth Cymru wedi cyflwyno cynnig newydd o 3% ychwanegol - wedi’i ôl-ddyddio i Ebrill 2022, gyda 1.5% ohono wedi’i gydgrynhoi.

Mae hyn yn golygu y byddan nhw'n derbyn 3% eleni a 1.5% o dâl ychwanegol y flwyddyn nesaf.

Mae Mr Price yn ailadrodd galwad Plaid Cymru am gynnydd 1c yn y bunt i bobl sy'n ennill dros £12,500, cynnydd o 2c ar gyflogau dros £50,000, a 3c ychwanegol i'r rhai sy'n ennill mwy na £150,000.

Dywed y gall yr arian ychwanegol fynd ar dâl y GIG a gofal cymdeithasol.

Atebodd Lesley Griffiths, “Mae ein safbwynt ar drethi yn glir iawn; mae unrhyw ddadansoddiad o’r ysgogiadau sydd ar gael i ni fel llywodraeth drwy gyfraddau treth incwm Cymru yn dangos na allwn godi digon, yn ddigon teg, i wneud iawn am y tyllau sydd wedi’u creu gan yr argyfwng economaidd, a sicrhau cyflogau uwch yn ein gwasanaethau cyhoeddus.

“Felly, dydw i ddim yn meddwl y byddai’n iawn mewn argyfwng costau byw i ofyn i unrhyw un sy’n talu’r gyfradd incwm sylfaenol dalu unrhyw arian ychwanegol”.

Mae Andrew RT Davies, arweinydd y Ceidwadwyr Cymreig yn y Senedd, yn gofyn pa gyfraniad y gall Cymru ei wneud fel rhan o’r ymdrech cymorth rhyngwladol yn ne Twrci a gogledd Syria yn dilyn daeargryn enfawr sydd wedi lladd mwy na 5,000 o bobol.

“Mae gan Gymru draddodiad balch o helpu mewn sefyllfaoedd fel hyn,” meddai.

Mae Lesley Griffiths yn ateb bod ei chydweithiwr yn y cabinet Jane Hutt wedi gofyn i swyddogion ddechrau trafodaethau gyda llywodraeth y DU ar y mater.

“Rwy’n siŵr bod yna bobl eisoes yn cael eu hadnabod i fynd i gefnogi’r ymgyrch achub,” ychwanega.

Yna mae Mr Davies yn cyfeirio at farn archwilydd cyffredinol Cymru bod Llywodraeth Cymru wedi gweithredu "ar frys y gellid fod wedi ei osgoi" i brynu fferm ym Mhowys at ddefnydd posib gŵyl gerddoriaeth y Dyn Gwyrdd.

Mae Mr Davies yn tynnu sylw at ddiffyg cofnodion o gyfarfodydd ynghylch prynu Fferm Gilestone am £4.25m, gan nodi chwe chyfarfod heb gofnodion rhwng gweision sifil a Gŵyl y Dyn Gwyrdd.

"Mae gwersi i'w dysgu bob amser," meddai Lesley Griffiths, gan ychwanegu bod "llawer o bethau cadarnhaol yn llythyr yr archwilydd cyffredinol".

Mae Janet Finch-Saunders, AS Aberconwy, yn gofyn pa asesiad y mae'r gweinidog wedi'i wneud o ddiogelwch adeiladau y mae Bwrdd iechyd Betsi Cadwaladr yn berchen arnynt.

Dim ond 62% o adeiladau'r bwrdd iechyd sy'n "weithredol yn ddiogel," mae adroddiad gan y bwrdd wedi datgelu.

Mae'r bwrdd yn berchen ar 238 eiddo ar draws gogledd Cymru.

Meddai'r adroddiad: "Mae yna risg y gallai methu â darparu amgylchedd adeiledig diogel sy'n cydymffurfio arwain at niwed y gellir ei osgoi i gleifion a staff."

Dywed Janet Finch-Saunders "yn syml, nid yw hyn yn sefyllfa dda i fwrdd iechyd sy'n gwyro o un argyfwng, neu un sgandal neu stori, o wythnos i wythnos".

Mae'r Trefnydd Lesley Griffiths yn ateb bod y bwrdd yn "gyfrifol am gyflwr ei ystâd ei hun. Gellir cyflwyno achosion busnes i Lywodraeth Cymru am arian cyfalaf ar gyfer blaenoriaethau asesedig y bwrdd iechyd, y mae'n rhaid eu hystyried yn erbyn cefndir o bwysau cyfalaf sylweddol ar draws GIG Cymru."

Mae Rhun ap Iorwerth, AS Ynys Môn, yn holi ynghylch ymateb Llywodraeth Cymru i ymgynghoriad y 2 Sisters Food Group ar gau ei safle yn Llangefni.

Byddai rhyw 730 o swyddi yn cael eu colli.

Dywed Lesley Griffiths bod Llywodraeth Cymru yn gwneud popeth o fewn ei gallu i roi ei chefnogaeth lawn i'r gweithwyr yr effeithir arnynt, ond mae'n rhaid iddi "baratoi ar gyfer y gwaethaf".

Dywed fod cyfarfod cyntaf tasglu wedi'i gynnal yr wythnos ddiwethaf.

Mae’n cynnwys uwch-swyddogion Llywodraeth Cymru, a chynrychiolwyr ar ran Cyngor Ynys Môn, Llywodraeth y DU, 2 Sisters Poultry Ltd ac Undeb Unite. Cytunodd y tasglu mai’r amcan pennaf oll yw ymchwilio i ffyrdd newydd o sicrhau dyfodol y ffatri a'r swyddi yn Llangefni.

Dywed Rhun ap Iorwerth os bydd y ffatri'n cau, "rhaid i'r ymateb fod yn sylweddol ac yn gyflym, a hynny gan lywodraethau Cymru a Phrydain", gyda "chefnogaeth ariannol sylweddol".

Atebodd Lesley Griffiths, “Rydym, unwaith eto, yn annog llywodraeth y DU i weithredu’n gyflym i gefnogi busnesau Cymru, ac, fel llywodraeth, byddwn yn parhau i wneud popeth o fewn ein gallu.”

Prynhawn da, croeso i'n darllediad byw o'r Cwestiynau i'r Prif Weinidog.

Y Trefnydd Lesley Griffiths sy'n ateb y cwestiynau heddiw, yn dilyn marwolaeth Clare Drakeford, gwraig y prif weinidog,

Cynhelir y cyfarfod llawn ar ffurf hybrid, gyda rhai aelodau yn Siambr y Senedd ac eraill yn ymuno drwy gyswllt fideo.

Ffynhonnell y llun, PA Media