Dyna ddiwedd y Cwestiynau i'r Prif Weinidog.

Diolch am ddilyn - ymunwch â ni eto yr wythnos nesaf.

Bydd y Senedd yn cael ei goleuo unwaith eto yn lliwiau glas a melyn baner Wcráin heno, fel arwydd o undod â hwy.

Da boch chi.

Ffynhonnell y llun, Senedd Cymru

Pan holodd y Ceidwadwr Janet Finch-Saunders am nifer y cartrefi newydd a adeiladwyd yng Nghymru, mae'r prif weinidog yn dweud “yn y chwarter diwethaf, roedd nifer y tai a gwblhawyd yng Nghymru yn uwch na’r chwarter yn union cyn y pandemig”.

Fodd bynnag ychwanega, “mae nifer y tai a ddechreuwyd wedi gostwng yn y chwarter diwethaf; maent wedi gostwng mewn 10 o’r 12 gwlad a rhanbarth yn y DU, ac maent i lawr, meddai’r sefydliad adeiladwyr tai, oherwydd effaith y gyllideb fach drychinebus ym mis Medi, sydd wedi cynyddu costau morgais, wedi cynyddu costau llog ac wedi arwain, ar draws y Deyrnas Unedig gyfan, at leihad yn nifer y tai a ddechreuwyd."

Dywed Ms Finch-Saunders, "Mae'n amlwg i bawb fod y targed o adeiladu 12,000 o gartrefi'r flwyddyn yma yng Nghymru wedi'i fethu dro ar ôl tro ers blynyddoedd. Dim ond 5,273 o dai a ddarparwyd gan eich llywodraeth yn 2021-22; roedd 90,000 ar restrau aros tai cymdeithasol; a chafodd llai na 1,000 o gartrefi eu cwblhau rhwng mis Hydref a mis Rhagfyr y llynedd."

"Dydw i erioed wedi gweld bargen waeth i Gymru," meddai'r prif weinidog am gyllideb Llywodraeth y DU.

Mae'n dweud "ni ddarparodd y gyllideb unrhyw arian ychwanegol ar gyfer iechyd, gwasanaethau cymdeithasol na chyflogau'r sector cyhoeddus, ac roedd yn cynnig cymorth ychwanegol prin i bobl a busnesau. Roedd yn rhoi blaenoriaeth i betrol a thyllau yn y ffyrdd dros bobl a chyflogau. Mae degawd truenus y llywodraeth Dorïaidd yn dod i ben wrth iddi ddechrau, gydag esgeulustod cynhwysfawr o anghenion Cymru."

Atebodd y Ceidwadwr Peter Fox, "Roeddwn yn teimlo bod cyllideb yr wythnos diwethaf yn un o optimistiaeth ac uchelgais, ac yn ganolog iddi oedd amddiffyn a chefnogi cartrefi ledled Cymru, yn wir y DU gyfan."

Dywed arweinydd Plaid Cymru Adam Price ei fod wedi cyfarfod â grŵp Covid-19 Profedigaeth Teuluoedd er Cyfiawnder Cymru yn y Senedd heddiw, ac mae’n galw eto ar Lywodraeth Cymru i sefydlu ei hymchwiliad ei hun.

Mae'r prif weinidog yn ateb mai ymchwiliad y DU sydd yn y sefyllfa orau i ystyried y "rhyng-gysylltiad rhwng penderfyniadau a wnaed yng Nghymru ac mewn mannau eraill".

Ychwanegodd, "mae'r ymchwiliad yn ei gyfnod ffurfiannol. Mae'r Barnwr Hallett yn parhau i glywed gan bobl sy'n credu y dylid dilyn ei chylch gwaith mewn ffyrdd penodol, ac mae wedi bod yn glir ei bod yn parhau i ystyried yr holl safbwyntiau hynny a gyflwynir iddi."

Dywed Mr Drakeford wrth Adam Price hefyd y bydd yn ystyried cynigion ar gyfer pwyllgor dibenion arbennig ar Covid.

Mae Andrew RT Davies, arweinydd y Ceidwadwyr Cymreig yn y Senedd, yn cyfeirio at y cynlluniau a gyhoeddwyd gan y Canghellor Jeremy Hunt yn ei Gyllideb Wanwyn yr wythnos diwethaf, sef bod gofal plant am ddim i rieni sy’n gweithio yn Lloegr yn cael ei ehangu i gynnwys plant dan dair oed. Bydd y cynnig yn y pen draw yn cynnwys pob plentyn o naw mis oed ymlaen, meddai Mr Hunt.

Mae Mr Davies yn gofyn tair gwaith i Mr Drakeford a fydd cynnig Llywodraeth Cymru hefyd yn cynnwys gofal i blant o 9 mis oed fel yn Lloegr.

Ni ddywedodd Mr Drakeford ie neu na, ond dywedodd "rydym eisoes yn gwneud llawer mwy yng Nghymru nag y maent yn Lloegr".

Mae'n ymhelaethu, "ar gyfer plant tair a phedair oed, yma yng Nghymru, mae teuluoedd yn cael 30 awr o ofal plant am 48 wythnos o'r flwyddyn. Yn Lloegr, mae'n 38 wythnos y flwyddyn; 10 wythnos yn llai yn Lloegr nag a gewch chi yng Nghymru."

Ychwanegodd, "byddwn yn cyflwyno 2,500 o leoedd ychwanegol ar gyfer plant dwy oed yng Nghymru o fis Ebrill eleni ymlaen, a 4,500 o leoedd newydd eraill i blant dwy oed yng ngham 2 o fis Medi eleni ymlaen."

Mae'r Ceidwadwr Russell George yn dweud bod "mater gwirioneddol" o ran mynediad at feddygon teulu yn y canolbarth.

Mae'r prif weinidog yn ateb, "roeddwn yn gallu trafod recriwtio ym Mhowys gyda phrif weithredwr bwrdd iechyd prifysgol Powys ddoe.

"Dywedodd wrthyf mai dim ond un practis a reolir sydd gan Bowys, a bod gobaith realistig y bydd contractwyr newydd yn hapus i ddod i gymryd drosodd y practis hefyd, ac er bod recriwtio’n heriol, fel y mae ym mhobman, mae’n dal i fyny yn ardal bwrdd iechyd Powys gyda pheth recriwtio diweddar mewn rhannau o’u cyfrifoldeb.”

Mae Rhys ab Owen yn gofyn pa asesiad mae’r prif weinidog wedi'i wneud o’r effaith ar Gymru yn dilyn oedi o ddwy flynedd ar ddarn llinell rheilffordd HS2 rhwng Birmingham a Crewe.

Mae'r prif weinidog yn ateb "fe gafodd y penderfyniad i ohirio rhannau o'r llinell HS2 ei wneud heb gyfeirio o gwbl at Lywodraeth Cymru na Thrafnidiaeth Cymru. Mae hyn yn chwalu'r myth mai prosiect Cymru a Lloegr yw hwn".

Bu galwadau ers tro i HS2 gael ei ailddosbarthu fel prosiect i Loegr yn unig fel bod Cymru’n derbyn cyllid cymesurol.

Y llynedd tynnodd grŵp trawsbleidiol o ASau sylw at y ffaith bod dadansoddiad llywodraeth y DU ei hun wedi dod i’r casgliad y byddai’r prosiect rheilffyrdd yn creu “anfanteision economaidd i Gymru”.

Mae'r adroddiad yn dweud er bod Llywodraeth Cymru wedi derbyn "oddeutu £755m mewn symiau canlyniadol Barnett" rhwng 2015 a 2019 o ganlyniad i'r Adran Drafnidiaeth yn gwario arian ar HS2, ni fydd yn derbyn swm cymesur oherwydd ei fod wedi'i ddosbarthu gan y Trysorlys fel "prosiect Cymru a Lloegr".

Mae hyn wedi denu beirniadaeth gan yr ASau oherwydd bydd y rheilffordd yn Lloegr yn unig.

Mae cynllun HS2 wedi cael ei lethu gan oedi a chostau cynyddol - yn 2010, roedd disgwyl iddo gostio £33bn, ond mae'r ffigwr hwnnw bellach wedi codi i £71bn.

Ffynhonnell y llun, HS2

Prynhawn da, croeso i'n darllediad byw o'r Cwestiynau i'r Prif Weinidog.

Cynhelir y cyfarfod llawn ar ffurf hybrid, gyda rhai aelodau yn Siambr y Senedd ac eraill yn ymuno drwy gyswllt fideo.