BBC Cymru Fyw

Os nad yw'r mesur ar yr amserlen yn pasio, yna gallwn ni weld etholiad cyn diwedd y flwyddyn.

Dydy Boris Johnson ddim eisiau estyniad i gyfnod Brexit, gan fynnu ei fod eisiau gadael yr UE ar 31 Hydref.

Os ydy ASau yn gwrthod mesur y llywodraeth a bod oedi i Brexit, dywedodd y prif weinidog y byddai'n ceisio cael etholiad cyffredinol.

Mae'r gyfraith yn dweud bod rhaid cael o leia' pum wythnos rhwng galw etholiad a'i chynnal, ac felly fyddai hynny methu digwydd cyn 28 Tachwedd ar y cynharaf.

Ffynhonnell y llun, Getty Images

BBC Cymru Fyw

Nawr bod y llywodraeth wedi ennill y bleidlais gyntaf, mae'r sylw yn troi at amserlen Brexit.

Er bod mwyafrif wedi cefnogi'r cytundeb ychydig funudau'n ôl, y gred yw bod llawer o'r blaid Lafur yn anhapus gyda'r hyn maen nhw'n ei weld fel diffyg amser i graffu ar y cytundeb.

Mae'n debyg y bydd y bleidlais nesaf yn agosach fyth...

Catrin Haf Jones
Gohebydd Seneddol BBC Cymru

Canlyniad pwysig i'r llywodraeth, a'r tro cyntaf i aelodau ddod i fwyafrif ar Brexit mewn unrhyw ffurf.

BBC Cymru Fyw

Pleidleisiodd 329 o blaid y mesur, a 299 yn erbyn - felly mwyafrif o 30.

BBC Cymru Fyw

Mae ASau wedi cefnogi Mesur y Cytundeb Ymadael.

BBC Cymru Fyw

Mae'r torfeydd y tu allan i Dŷ'r Cyffredin unwaith eto heno, wrth i'r pleidleisiau hollbwysig ddigwydd y tu mewn.

Ffynhonnell y llun, Getty Images

BBC Cymru Fyw

Wrth i ASau bleidleisio yn San Steffan, mae ACau Llafur a Phlaid Cymru ym Mae Caerdydd eisoes wedi pleidleisio i wrthwynebu cytundeb Brexit Boris Johnson.

Mae'r Prif Weinidog, Mark Drakeford wedi galw ar yr Undeb Ewropeaidd i ganiatáu estyniad a gadael i'r llywodraethau datganoledig graffu ar y ddeddfwriaeth.

Ond mae'r Ceidwadwyr unwaith eto wedi cyhuddo'r pleidiau hynny o "fynd yn erbyn barn y bobl yng Nghymru ac yn anwybyddu canlyniad y refferendwm".

BBC Cymru Fyw

Mae aelodau nawr yn pleidleisio ar y Mesur Ymadael.

Bydd y canlyniad yn dod ymhen ychydig funudau.

Gareth Pennant
Gohebydd gwleidyddol BBC Cymru

BBC Cymru Fyw

Beth sy'n digwydd felly os yw ASau yn gwrthod y Mesur Ymadael, neu mae'n cael ei dynnu?

Fel mae'n sefyll ar hyn o bryd, os nad yw'r cytundeb yn cael ei basio yn San Steffan yna bydd y DU yn gadael yr UE heb gytundeb ar 31 Hydref.

Ond ddydd Sadwrn fe gollodd y llywodraeth bleidlais yn Nhŷ'r Cyffredin oedd yn golygu fod Mr Johnson wedi ei orfodi i ofyn am estyniad gan yr UE i osgoi Brexit heb gytundeb.

Os ydy'r UE yn caniatau'r estyniad hwnnw, felly, mae'n bosib na fydd Brexit yn digwydd ymhen ychydig dros wythnos wedi'r cyfan.

BBC Cymru Fyw

Mae'r llywodraeth eisiau gweld y mesur yn pasio drwy Dŷ'r Cyffredin mewn tridiau, er mwyn rhoi digon o amser i'r ddeddfwriaeth basio cyn 31 Hydref - y diwrnod mae'r DU i fod i adael yr Undeb Ewropeaidd.

Ond mae'r gwrthbleidiau wedi dweud nad yw hynny'n rhoi digon o amser i graffu ar ddeddfwriaeth hynod o bwysig, ac yn dweud y byddan nhw'n gwrthwynebu'r amserlen hwnnw.

Os yw hynny'n digwydd, mae'r llywodraeth wedi bygwth tynnu'r mesur yn ôl yn gyfan gwbl.

BBC Cymru Fyw

Beth sydd dan y chwyddwydr heno felly?

Mae'r llywodraeth wedi cyflwyno eu Mesur Ymadael, sef y cytundeb y daethon nhw iddo gyda'r Undeb Ewropeaidd yr wythnos diwethaf.

Un o'r prif wahaniaethau rhwng cytundeb Boris Johnson ac un ei ragflaenydd Theresa May ydy ei fod wedi cael gwared ar y backstop ar gyfer Gogledd Iwerddon.

Yn syml byddai cytundeb Mr Johnson yn gweld y DU yn gadael undeb dollau'r UE, ond byddai rhyw fath o ffin dollau yn cael ei sefydlu rhwng Gogledd Iwerddon a gweddill y DU er mwyn hwyluso pethau ar y ffin yn ynys Iwerddon.

BBC Cymru Fyw

Noswaith dda, a chroeso i'r llif byw heno yn dilyn yr hynt a helynt o Dŷ'r Cyffredin.

Mae Aelodau Seneddol wedi bod yn trafod mesur Brexit y llywodraeth yn ystod y prynhawn, ac fe fyddan nhw'n pleidleisio arno yn fuan.