BBC Cymru Wales

Mae pennaeth BBC Cymru wedi dweud bod y darlledwr yn gorfod gwneud “penderfyniadau anodd am flaenoriaethau” yn dilyn penderfyniad i ganslo bwletinau teledu brecwast ar BBC One Wales o ddydd Llun.

Ni fydd unrhyw un o genhedloedd a rhanbarthau’r DU yn darparu bwletinau teledu boreol yn ystod BBC Breakfast o 30 Mawrth.

Dywedwyd wrth wylwyr y bore 'ma ei fod yn “fesur dros dro” tra bod y BBC wedi addasu i “ofynion wrth ymdrin â Covid-19 a’i effeithiau ar ein bywydau i gyd”.

Wrth ymateb i feirniadaeth ar y cyfryngau cymdeithasol yn dilyn y cyhoeddiad, dywedodd cyfarwyddwr BBC Cymru, Rhodri Talfan Davies: “Mae lefelau staffio yn y BBC wedi cael eu heffeithio ledled y DU, ac mae’n rhaid i ni wneud penderfyniadau anodd am flaenoriaethau."

Twitter

Go brin fod unrhyw weithgaredd na diwydiant sydd heb gael ei effeithio mewn rhyw fodd gan coronafeirws.

Fyddai rhywun ddim yn meddwl, er enghraifft, y byddai'r feirws yn effeithio ar y diwydiant pysgota, gan fod y pysgotwyr allan ar y môr ar eu pen eu hun.

Mae Sion Williams yn pysgota o Borth Colmon ar Benrhyn Llŷn., dolen allanol

"Mae o wedi effeithio yn ddifrifol ofnadwy, mae'r marchnadoedd i gyd wedi cau, yn Ewrop, yn Asia a'r marchnadoedd adra," meddai.

Chwaraeon BBC Cymru

Ym myd y campau, mae trefnwyr y Tour De France yn ystyried cynnal y ras heb unrhyw gefnogwyr.

Y ras yw'r digwyddiad chwaraeon mwyaf poblogaidd yn y byd o ran y nifer sy'n ei wylio'n fyw, am ei fod yn pasio trwy gymaint o ardaloedd yn Ffrainc.

Fydd modd plismona pob ardal ar hyd llwybr y ras er mwyn sicrhau nad oes unrhyw un yn dod allan i'w gwylio? Cawn weld.

Y Cymro, Geraint Thomas oedd yn fuddugol yn 2018, ac fe ddaeth yn ail y llynedd hefyd.

BBC Radio Wales

Mae pennaeth Heddlu De Cymru wedi dweud ei fod yn hyderus bod pobl yn dilyn y canllawiau newydd ar pryd maen nhw'n cael gadael eu cartrefi.

Dywedodd y Prif Gwnstabl Matt Jukes wrth BBC Radio Wales y bore 'ma: "Wrth siarad â nifer o gydweithwyr ac edrych ar gamerâu CCTV ar draws Caerdydd, mae'n amlwg fod pobl yn dilyn y rheolau.

"Wrth gwrs, fe fyddwn ni ar y strydoedd ac yn gweithredu'r gyfraith, ond y man cychwyn ydy apelio ar bobl i aros adref er mwyn arbed y GIG ac achub bywydau."

Ychwanegodd Mr Jukes nad oedd o'r farn bod angen unrhyw fesurau pellach ar hyn o bryd, ond y bydd y llu yn parhau i atal pobl rhag casglu mewn mannau poblogaidd.

Mae waliau tref Conwy wedi cael eu cau i'r cyhoedd y bore 'ma, gydag arwydd yn dweud bod hynny oherwydd argyfwng coronafeirws.

BBC Wales News

Mae 15 o ASau Llafur o Gymru yn annog gweinidogion y DU i'w gwneud yn fwy amlwg pan fo mesurau i ddelio ag argyfwng coronafeirws mewn grym yn Lloegr yn unig.

Mae'r grŵp yn rhybuddio y gallai diffyg eglurder olygu bod pobl yn colli hyder yn eu gweithredoedd, ac yn gwrthod cydymffurfio a'u gorchmynion.

Mewn llythyr at y Prif Weinidog, Boris Johnson, mae'r ASau yn dweud bod "dryswch" am gynllun i ostwng cyfraddau busnes, oedd ddim yn nodi bod angen i weinidogion Cymru gyflwyno cynllun eu hunain.

Dywedodd Llywodraeth y DU mewn ymateb i'r llythyr ei fod yn cydweithio'n agos gyda gweinidogion Cymru.

Roedd clapio i'w glywed ar hyd a lled Prydain neithiwr, wrth i'r cyhoedd uno am 20:00 i ddangos eu cefnogaeth i staff y gwasanaeth iechyd.

Roedd y trefnwyr wedi gofyn i bawb gamu allan ar garreg yr aelwyd i ymuno yn y digwyddiad.

Dyma rai o'r golygfeydd ar draws Cymru.

BBC Sport Wales

Mae canolwr Cymru a'r Llewod, Jamie Roberts ar ei ffordd yn ôl o Dde Affrica, gan hedfan yn ôl oriau'n unig cyn i'r wlad osod gorchmynion llym ar bobl i aros yn eu cartrefi yn sgil coronafeirws.

Roedd Roberts wedi bwriadu aros yn Cape Town yn wreiddiol, cyn penderfynu y byddai'n well "bod adref yn y DU yn y cyfnod digynsail yma".

Fe wnaeth y canolwr ymuno â'r Stormers o Gaerfaddon ym mis Ionawr, ac roedd wedi chwarae 10 gêm dros ei glwb newydd cyn i gynghrair Super Rugby gael ei gohirio oherwydd Covid-19.

Ffynhonnell y llun, Getty Images

Huw Thomas
Gohebydd BBC Cymru

Bydd pob meddyg teulu yn gallu cynnig ymgynghoriadau fideo o fis Ebrill er mwyn trin cleifion yn ystod pandemig coronafeirws.

Mae cynllun peilot yn ardal Bwrdd Iechyd Aneurin Bevan yn cael ei ehangu yn gynt na'r disgwyl.

Meddygon fydd yn penderfynu os ydyn nhw am gynnig y gwasanaeth, wrth i lawer o feddygfeydd gyfyngu ar nifer y cleifion sy'n gallu gweld doctor wyneb yn wyneb.

Mae'r feirws wedi gorfodi newidiadau eraill, ac mae rhai meddygfeydd yn cynnig profion gwaed mewn meysydd parcio, tra bod fferyllfeydd hefyd wedi mabwysiadu technoleg fideo i roi cyngor i gleifion.

Mae modd darllen rhagor am y stori yma ar ein hafan.

Ffynhonnell y llun, Getty Images

BBC News

Yr Unol Daleithiau bellach yw'r wlad sydd â'r nifer fwyaf o achosion coronafeirws wedi'u cadarnhau, gyda dros 85,000 wedi cael prawf positif yno.

Yn ôl y ffigyrau diweddaraf a gasglwyd gan Brifysgol Johns Hopkins, mae'r UDA wedi pasio China (81,782 achos) a'r Eidal (80,589).

Ond mae llawer mwy wedi marw yn China (3,291) a'r Eidal (8,215) o'i gymharu â'r 1,300 o farwolaethau yn yr Unol Daleithiau.

Yn ôl yr Arlywydd Donald Trump, y ffaith fod cymaint yn cael eu profi am y feirws yno sy'n gyfrifol am y nifer uchel o achosion wedi'u cadarnhau.

Cylchgrawn, Cymru Fyw

Mae hi wedi bod yn gyfnod cythryblus yng Nghymru ers i'r achos cyntaf o coronafeirws gyrraedd yma ar 28 Chwefror.

Mae'r sefyllfa yn newid yn ddyddiol, gyda rheolau mewn lle bellach i atal pobl rhag gadael eu cartrefi os nad oes wir angen.

Mae Cylchgrawn Cymru Fyw wedi casglu rhai o luniau'r digwyddiadau dros y pythefnos diwethaf.

Mae modd gweld yr oriel yn llawn trwy glicio yma.

Ffynhonnell y llun, Paul Ellis

BBC Wales News

Mae'r bobl sy'n torri'r rheolau llym newydd ar aros yn eu cartrefi yn ystod argyfwng coronafeirws yn wynebu dirwy o £60.

Mae dirwyon yn codi i £120 ar gyfer rheiny sy'n anwybyddu'r gorchmynion fwy nag unwaith, ac mae fe all unigolion sy'n parhau i'w hanwybyddu gael eu harestio.

Ond tra bod dirwyon yn gallu codi mor uchel â £960 yn Lloegr, ni fydd hynny'n digwydd yng Nghymru.

Os ydy'r ddirwy yn cael ei thalu o fewn pythefnos, £30 fydd y ddirwy am y drosedd gyntaf yng Nghymru.

Ffynhonnell y llun, Getty Images

Mae pryder na fydd pobl hŷn, anabl neu fregus yng Nghymru yn gallu cael blaenoriaeth wrth gael bwyd wedi'i gludo i'w cartrefi yn ystod yr argyfwng coronafeirws.

Bellach mae archfarchnadoedd yn cael mynediad at fas data Llywodraeth y DU er mwyn blaenoriaethu cludo bwyd i bobl fregus sydd wedi cael gorchymyn i aros adref.

Ond mae hwnnw ond yn cynnwys gwybodaeth am bobl yn Lloegr, gan olygu nad yw pobl o Gymru, Yr Alban a Gogledd Iwerddon yn gallu cofrestru.

Dywedodd Llywodraeth Cymru y byddan nhw'n sicrhau bod modd i bobl fregus gael y bwyd, meddyginiaeth a nwyddau eraill sydd eu hangen arnynt.

Mae modd darllen mwy ar y stori yma ar ein hafan.

Ffynhonnell y llun, AFP

Post Cyntaf
BBC Radio Cymru

Bydd rhaglen Post Cyntaf Radio Cymru yn ymestyn eto bore 'ma tan 09:00 gyda chyfle i chi ffonio gyda'ch sylwadau neu gwestiynau.

Mae Dylan Jones yn barod i holi'r meddyg Dr Dai Lloyd a'r cyfrifydd Huw Roberts ar eich rhan.

Y rhif ffôn ydy 03703 500 500, neu e-bostiwch post.cyntaf@bbc.co.uk.

Bore da, a croeso i'r llif byw ar ddydd Gwener, 27 Mawrth.

Arhoswch gyda ni trwy gydol y dydd am y diweddaraf yng Nghymru a thu hwnt yn y frwydr yn erbyn coronafeirws.