ITV

Mae Mark Drakeford wedi dweud wrth ITV y byddai'n hoffi gweld plant blwyddyn 6 yn yr ysgol gynradd a phlant sydd yn wynebu arholiadau flwyddyn nesaf yn ôl yn yr ysgol, dolen allanol cyn dechrau'r gwyliau haf.

Gwnaeth ei sylwadau ar raglen Good Morning Britain bore ma.

Ar hyn o bryd dim ond plant sydd â rhieni yn weithwyr allweddol neu yn fregus sydd yn mynd i'r ysgol.

Ffynhonnell y llun, Getty Images

Heddlu Gogledd Cymru

Cafodd dyn o Wolverhampton ei arestio bore ma am deithio ar yr A496 i'r Bermo i nol ei feic dŵr.

Fe wnaeth yr heddlu ei stopio ac fe wnaeth fethu prawf cyffuriau.

Mae nawr yn y ddalfa yng Nghaernarfon.

Arhoswch adre!

Ddydd Llun bydd Neges flynyddol Ewyllys Da'r Urdd yn cael ei chyhoeddi. Bydd y neges yn adlewyrchu'r ffaith bod ein byd wedi newid ers y coronafeirws.

Swyddfa Ystadegau Gwladol

Roedd mwy nag un ym mhob pedwar o farwolaethau ddigwyddodd mewn cartrefi gofal yng Nghymru a Lloegr yn ymwneud â Covid-19.

Mae'r ffigyrau hyn ar gyfer y cyfnod rhwng 2 Mawrth a 1 Mai.

Bu 45,899 o farwolaethau pobl oedd yn byw mewn cartrefi gofal yn y cyfnod yma.

Roedd 27% o'r marwolaethau yn rhai lle'r oedd y feirws yn cael ei grybwyll ar y tystysgrif marwolaeth.

Dementia ac Alzheimer oedd y ddau brif afiechyd mwyaf cyffredin ymysg y rhai ble roedd Covid-19 yn ffactor yn y farwolaeth.

Ffynhonnell y llun, Swyddfa Ystadegau Gwladol

Cwnsler cyffredinol Cymru'n dweud y bydd mwy o blant yn dychwelyd i'r ysgol "pan fydd hynny'n saff".

Neithiwr fe gafodd pentref Portmeirion ei oleuo'n arbennig i ddiolch i weithwyr iechyd a gofalwyr am eu gwaith yn y cyfnod coronafeirws.

Dyma lun trawiadol o'r pentref o'r awyr...

Ffynhonnell y llun, Portmeirion

golwg360

Mae pobl sy'n byw yng nghanolbarth Cymru yn pryderu y bydd ymwelwyr dros y ffin yn dod i'r ardal medd cynghorydd lleol wrth Golwg360.

Yn ôl Elwyn Vaughan, Cynghorydd Cyngor Powys, mae'r tywydd braf yn golygu bod trigolion yn poeni. , dolen allanol

Mae'n dweud bod yna bobl wedi bod yn dod i lefydd fel Pennal a Llanbrynmair i fynd i'w tai haf ers i'r feirws ddechrau lledu ym Mhrydain.

Mae cwmni JCB wedi cyhoeddi bod hyd at 950 o swyddi yn y fantol wedi i'r galw am y peiriannau haneru o ganlyniad i'r argyfwng coronafeirws.

Mae'r cwmni wedi ysgrifennu at y staff yn eu 10 safle - gan gynnwys un yn Wrecsam - i ddweud y bydd cyfnod ymgynghori o 45 diwrnod ar 950 o swyddi yn dechrau ddydd Llun.

Ffynhonnell y llun, JCB

Rhybudd bydd rhai sy'n fyddar yn cael anawsterau cyfathrebu os bydd mwy o bobl yn gwisgo mygydau.

Mae'r Prif Weinidog, Mark Drakeford wedi apelio ar bobl o Lannau Mersi i beidio teithio i Gymru oherwydd cyfyngiadau coronafeirws.

Fe wnaeth hynny drwy siarad gyda'r Liverpool Echo...

BBC Wales News

Mae bachgen bach tair oed wedi bod yn helpu yn ystod yr argyfwng gan fynd â bwyd i'w gymdogion mewn tegan lori.

Penderfynodd Theo ei fod eisiau gwneud rhywbeth er mwyn gwneud i bobl wenu meddai ei fam.

"Roedd y chwerthin a'r gwenu gan y trigolion yn syfrdanol!" meddai Fran Jenkins o Lanelli.

I weld y fideo cliciwch yma.

Adroddiad yn darganfod bod prifysgolion Cymru o dan fygythiad difrifol oherwydd argyfwng Covid-19.

BBC Radio Cymru

Mae Cwnsler Cyffredinol Cymru, Jeremy Miles AS wedi dweud bod "angen cyfnod o baratoi ar gyfer ysgolion" cyn y bydd modd ei hailagor.

Wrth siarad ar y Post Cyntaf, fe ddwedodd Mr Miles y byddai'r llywodraeth yn "cynyddu nifer y plant sy'n mynd i'n hysgolion ni pan fydd hynny'n saff i'w wneud".

Yn ôl Mr Miles mae'r Gweinidog Addysg, Kirsty Williams "ar fîn cyhoeddi dogfen sy'n esbonio i bobol beth yw'r pethau sydd angen eu penderfynu" a bod y ddogfen honno yn sôn am "gydweithio gyda athrawon a rhieni a chynghorau lleol".

Mae ymgynghorydd gofal dwys yn ysbyty mwyaf Cymru wedi dweud wrth BBC Cymru eu bod o fewn wythnos i redeg allan o adnoddau i drin cleifion coronafeirws, pan oedd y gwasanaeth ar ei brysuraf.

Yn ôl Dr Chris Hingston, y rheswm na thorrodd Ysbyty Athrofaol Cymru yng Nghaerdydd ei gapasiti gofal dwys oedd parodrwydd y cyhoedd i wrando ar y cyngor i aros adref.

Fe gafodd BBC Cymru gyfle prin i dreulio amser yn uned gofal dwys yr ysbyty, sydd bellach yn paratoi ar gyfer ail don o achosion.

BBC Radio Cymru

Mae arweinydd y Ceidwadwyr yn y Senedd wedi dweud wrth y Post Cyntaf ei fod yn cefnogi cynyddu cosbau i bobl sy'n torri rheolau coronafeirws drwy deithio i ail gartref.

Dywedodd Paul Davies AS bod yr heddlu wedi bod yn gwneud "gwaith gwych" yn troi pobl i ffwrdd, ond mai nawr yw'r amser i gynyddu'r dirwyon.

Mae Comisiynwyr Heddlu a Throsedd Cymru wedi bod yn galw am hyn yn barod.

Mae'r Prif Weinidog, Mark Drakeford, wedi bod ar Sky News y bore 'ma yn egluro mwy am ei gyhoeddiad yn ddiweddarach am sut i godi'r cyfyngiadau yng Nghymru.

Dywedodd bod cadw llygad ar y ffigwr 'R' - sef faint o bobl sy'n cael eu heintio gan un person sydd gyda Covid-19 - yn allweddol.

Y ffigwr R yng Nghymru ar y funud yw 0.8 sy'n golygu y gallai 800 o bobl farw dros y tri mis nesaf yma, ond os fydd y ffigwr yn codi i 1.1 gallai 7,200 farw.

BBC Radio Wales

Mae Prif Gwnstabl Heddlu Gogledd Cymru, Carl Foulkes wedi bod yn siarad ar Radio Wales y bore 'ma am waith yr heddlu dros y dyddiau diwethaf ac wrth edrych ymlaen at y penwythnos.

Dywedodd: "Ry'n ni wedi gweld gwahaniaeth yn y ddeddfwriaeth rhwng Cymru a Lloegr.

"Ry'n ni wedi gweld cynnydd o tua 15% yn y traffig ar ein ffyrdd, ac mae llawer o hynny yn bobl sy'n dychwelyd i'r gwaith... er nad ydyn wedi gweld llwyth o bobl yn dod i mewn i'r ardal mae yna esiamplau o bobl yn teithio draw i'r gogledd.

"Ein nod yw sicrhau bod y neges yn glir iawn, iawn... fe fyddwn ni ac yn wir y pedwar llu yng Nghymru yn weledol iawn ar y ffyrdd dros y penwythnos o gwmpas ein safleoedd eiconig ac allweddol i wneud yn siwr bod y neges wedi'i deall."