Llywodraeth Cymru

Dywed gweinidog iechyd Cymru nad oes yna arwydd fod Covid-19 yn cael ei drosglwyddo yn y cymunedau hynny ger ffatrïoedd prosesu bwyd lle bu achosion o'r haint yn ddiweddar.

Yn ystod cynhadledd ddyddiol Llywodraeth Cymru dywedodd Vaughan Gething fod 216 bellach wedi profi'n bositif ar gyfer safle ffatri 2 Sisters yn Llangefni - mae'r safle yn parhau ar gau.

"Mae 237 wedi profi'n bositif yn Rowan Foods yn Wrecsam gyda mwy na 1,100 wedi cael eu profi," meddai.

"Mae 130 o achosion coronafeirws wedi eu cadarnhau yn Kepak, Merthyr Tudful, ers Ebrill - gyda 101 achos wedi eu cadarnhau o'r 810 gafodd eu profi ddydd Sadwrn."

Dywedodd y bydd pobl yn poeni ond fod "lefel aruthrol o brofion wedi eu gwneud fel rhan o'r gwaith o ymchwilio ac o atal ymlediad".

"Rydym yn monitro ar gyfer unrhyw arwydd o ymlediad yn y gymuned - dyw'r cynnydd yn y niferoedd ddim y rhoi'r arwydd fod yna ymlediad y tu hwnt i'r rhai sy'n cael eu cyflogi yn y safleoedd," meddai.

Mae nifer yr achosion o Covid-19 yn ffatri Rowan Foods wedi cynyddu i 185, yn ôl Cyngor Wrecsam.

Mae hyn yn gynnydd o 19 o'r ffigyrau diwethaf i gael eu cyhoeddi.

Dywedodd yr aelod cabinet y Cynghorydd Hugh Jones bod 1,067 o weithwyr wedi'u profi hyd yma.

Mae Llywodraeth Cymru wedi cyhoeddi na ddylai unrhyw weithiwr gael ei gosbi'n ariannol os ydyn nhw'n hunan-ynysu, ond dywedodd undeb Unite nad yw gweithwyr wedi derbyn unrhyw sicrwydd y byddan nhw'n derbyn tâl llawn os ydyn nhw'n gwneud hynny.

Mae Covid-19 yn mynd i gael effaith hirdymor ar y diwydiant dillad - dyna farn un arbenigwr ffasiwn union wythnos ers i siopau dillad gael yr hawl i agor.

Er bod Llywodraeth Cymru wedi caniatáu i siopau ailagor wythnos yn ôl, nid pob un o'r canghennau mawrion sydd wedi agor eu drysau.

A gyda thymor ffasiwn yr haf fwy neu lai ar ben, mae rhai siopau yn wag ar hyn o bryd, heb unrhyw stoc.

Yn ôl yr arbenigwr ffasiwn, Helen Humphreys, dyw hynny ddim yn syndod.

Mae rhagor ar y stori hon ar ein hafan.

Cyngor Ynys Môn

Bydd Cyngor canolfan ailgylchu gwastraff cartref yng Ngwalchmai, Sir Fôn yn ailagor ddydd Iau.

Cafodd dwy ganolfan ailgylchu'r ynys eu cau ym mis Mawrth yn sgil y coronafeirws, gyda chanolfan Penhesgyn yn ailagor ar 2 Mehefin.

Bydd yn rhaid i drigolion archebu lle cyn cael ymweld â'r canolfannau.

Wrth i fesurau gael eu llacio yng Nghymru, mae 'na rybudd o'r Dwyrain Pell ei bod hi'n anodd iawn cael gwared ar Covid-19 yn llwyr.

Er i China lwyddo i ddod â'r feirws dan reolaeth, mae clwstwr newydd o achosion yn golygu bod cyfyngiadau wedi cael eu hailosod ar bron i 500,000 o bobl.

Ond yn ôl Karl Davies, sy'n byw yn ninas Foshan yn ne-ddwyrain y wlad, mae'n teimlo'n saffach yno nac y byddai yn ôl yng Nghymru ar hyn o bryd.

Swyddfa Ystadegau Gwladol

Fe wnaeth nifer y marwolaethau'n ymwneud â Covid-19 yng Nghymru ostwng i 39 yn yr wythnos hyd at 19 Mehefin, yn ôl ffigyrau'r Swyddfa Ystadegau Gwladol.

Mae hyn yn ostyngiad o'r ffigwr o 57 marwolaeth yn yr wythnos cyn hynny.

Doedd yr un farwolaeth yn ardal Bwrdd Iechyd Aneurin Bevan - oedd yn ganolbwynt cynnar i'r pandemig yng Nghymru.

Roedd dros hanner y marwolaethau - 21 - yn ardal Bwrdd Iechyd Betsi Cadwaladr, gydag wyth o'r rheiny yn Sir Conwy.

Ni chafodd yr un farwolaeth ei chofnodi mewn naw awdurdod lleol yng Nghymru.

Yn ôl y Swyddfa Ystadegau Gwladol roedd cyfanswm o 2,408 o bobl wedi marw â coronafeirws yng Nghymru hyd at 19 Mehefin.

Mae'r ffigwr 921 marwolaeth yn uwch na ffigyrau Iechyd Cyhoeddus Cymru ar yr un pryd, gan mai cleifion sydd wedi cael prawf positif yn unig sy'n cael eu cynnwys yn eu ffigyrau nhw.

Mae dinas Caerlŷr yng nghanolbarth Lloegr wedi gorfod ailgyflwyno rhai mesurau i atal coronafeirws yn dilyn twf yn nifer yr achosion yno.

Dyma'r lle cyntaf yn y DU i orfod ailgyflwyno cyfyngiadau.

Bydd siopau sydd ddim yn hanfodol yn cau o heddiw ymlaen a dim ond i blant gweithwyr allweddol y bydd ysgolion ar agor o ddydd Iau.

Yng ngweddill Lloegr bydd tafarndai, bwytai a siopa trin gwallt yn ailagor o ddydd Sadwrn, ond ni fydd hynny'n digwydd yn ardal Caerlŷr.

Mae cyngor y ddinas wedi dweud y bydd y mesurau mewn lle am "o leiaf pythefnos".

Ffynhonnell y llun, Getty Images

Post Cyntaf
BBC Radio Cymru

Mae arweinydd Plaid Cymru'n dweud bod camgymeriadau wedi'u gwneud yng Nghymru ar ddechrau'r pandemig, ond bod lle i gymeradwyo Llywodraeth Cymru am eu polisïau presennol.

Dywedodd Adam Price ar y Post Cyntaf bod bylchau mawr yn y system brofi yng Nghymru a Lloegr ar ddechrau'r cyfnod clo, nad oedd digon o PPE i weithwyr allweddol a bod camgymeriadau mawr wedi'u gwneud yn y sector gofal.

“Yn fwy diweddar mae Cymru wedi dilyn ei chwys ei hun fel y polisi i aros yn lleol," meddai.

"Rhaid canmol Llywodraeth Cymru am hynny - am gymryd agwedd mwy gofalus.

"Y peth diwethaf ni moyn yw gweld ail don yn dod.”

Mae Sefydliad Iechyd y Byd (WHO) wedi rhybuddio bod y gwaethaf eto i ddod o bosib gyda'r pandemig.

Rhybuddiodd pennaeth y corff, Tedros Adhanom Ghebreyesus y bydd y feirws yn heintio llawer mwy o bobl os nad yw llywodraethau yn dechrau rhoi'r polisïau cywir ar waith.

Dywedodd mai neges WHO ydy "Profi, Olrhain, Ynysu a Chwarantîn".

Mae dros 10 miliwn o achosion wedi'u cofnodi ledled y byd erbyn hyn, ac mae dros 500,000 wedi marw.

Ond mae'r feirws yn parhau i ledaenu yn sydyn yn ne a chanolbarth America, de Asia ac Affrica.

Ffynhonnell y llun, Reuters

Post Cyntaf
BBC Radio Cymru

Mae teulu o ardal Conwy sydd wedi bod yn hunan-ynysu ers mis Mawrth oherwydd cyflwr iechyd yn dweud eu bod wedi cael llythyron gan Lywodraeth y DU a Llywodraeth Cymru yn rhoi dyddiadau gwahanol ynglŷn â phryd y gallan nhw roi'r gorau i hunan ynysu.

Mae Imogen, 8, ac Annabelle, 4, yn byw gyda chyflwr ffeibrosis systig, ac mae'r ddwy ferch, a'u rhieni, David ac Alison, wedi bod yn hunan-ynysu ers dechrau'r cyfnod clo.

Mae'r teulu wedi derbyn llythyr gan Ysgrifennydd Iechyd Llywodraeth y DU, Matt Hancock yn dweud y gallan nhw stopio hunan-ynysu ar 1 Awst, ond mae'r llythyr gan Weinidog Iechyd Cymru, Vaughan Gething yn dweud y bydd angen iddyn nhw barhau i wneud hynny tan 16 Awst.

Mewn datganiad fe ddywedodd Llywodraeth Cymru, os ydy unrhyw un wedi cael llythyr gan Brif Swyddog Meddygol Cymru i warchod, yna fe ddylen nhw ddilyn y cyngor hwnnw.

Mae Llywodraeth San Steffan yn dweud os oes gan bobl unrhyw amheuon ynglŷn â gwarchod a chysgodi, yna fe ddylen nhw gysylltu â'u meddyg teulu.

Mae Cymru bellach wedi cyrraedd y garreg filltir o 100 o ddiwrnodau ers dechrau'r cyfnod clo mewn ymateb i'r pandemig coronafeirws.

Cafodd y cyfyngiadau eu cyhoeddi ar 23 Mawrth gan Brif Weinidog y DU, Boris Johnson, yn y lle cyntaf ac yna gan arweinwyr Cymru, Yr Alban a Gogledd Iwerddon.

Bu'n rhaid i fusnesau ac ysgolion gau, ac fe gafodd miliynau o bobl eu rhoi ar gyfnod seibiant o'r gwaith, ond roedd pwysau anferthol ar lawer o weithwyr hanfodol, yn arbennig gweithwyr iechyd a gofal ar reng flaen yr ymateb i'r argyfwng.

Mae pobl eraill oedd mewn sefyllfa i weithio o'u cartrefi, wedi parhau â'u dyletswyddau - llawer yn ceisio dysgu eu plant yn eu cartrefi yr un pryd.

Dyma olwg 'nôl ar rai o'r datblygiadau pwysicaf yn ystod 100 niwrnod cyntaf y cyfyngiadau.

Mae pobl sy'n agored i niwed yn cael eu targedu gan nifer o sgamiau'n ymwneud â coronafeirws yng Nghymru.

Ymhlith y galwadau ffug sydd wedi eu hadrodd i'r BBC, mae rhai gan bobl sy'n honni i fod yn rhan o system olrhain achosion Covid-19 - gan fynnu taliad am brawf am y feirws.

Dywedodd un dyn sydd wedi bod yn hunan-ynysu oherwydd ei iechyd iddo gael ei dargedu gan dair sgam yn ymwneud â'r feirws.

Mae'r heddlu yng Nghymru'n dweud bod twyllwyr yn honni i fod o gyrff fel Sefydliad Iechyd y Byd a Chyllid a Thollau EM, neu gwmnïau fel Amazon a Netflix er mwyn cymryd arian neu fanylion personol.

Mae mwy ar y stori hon ar ein hafan.

Bore da a chroeso i'n llif byw ar ddydd Mawrth, 30 Mehefin - y 100fed diwrnod ers i'r cyfnod clo ddod i rym.

Arhoswch gyda ni am y newyddion diweddaraf am coronafeirws yng Nghymru a thu hwnt trwy gydol y dydd.