Crynodeb

  • Y Prif Weinidog Mark Drakeford fu'n cynnal y gynhadledd am 12:15

  • Bu'n amlinellu'r camau nesaf i Gymru pan fydd y cyfnod clo yn dod i ben

  • "Rhaid i bawb leihau'r cysylltiadau â phobl eraill," meddai'r Prif Weinidog

  • Tlodi wedi cynyddu yng Nghymru oherwydd Covid, yn ôl adroddiad

  • Galw ar Lywodraeth Cymru i ystyried addoldai yn hanfodol

Y diweddaraf yn fyw

  1. Galw ar Lywodraeth Cymru i ystyried addoldai yn hanfodol

    Mae miloedd wedi arwyddo deiseb yn galw ar Lywodraeth Cymru i ystyried mannau addoli yn fannau hanfodol.

    Pryder y rhai sydd wedi llunio'r ddeiseb yw bod eglwysi wedi'u rhoi yn yr un dosbarth o ran pwysigrwydd â siopau manwerthu ac felly ni allant gynnal gwasanaethau yn ystod y cyfnod clo byr neu pan mae cyfyngiadau lleol mewn grym.

    Maen nhw'n dweud nad oes tystiolaeth bod eglwysi wedi cyfrannu at ledaeniad Covid-19.

    "Mae eglwysi wedi bod yn un o'r enghreifftiau gorau o amgylcheddau sy'n ddiogel o ran Covid-19, ac maent wedi dilyn canllawiau helaeth, afresymol bron, yn llym, i wneud eu rhan dros y genedl," meddai'r ddeiseb.

    "Er bod rhai wedi dadlau y gall eglwysi barhau i weithredu ar-lein, mae hyn ar draul yr ymdeimlad o gymuned."

    Dywedodd Llywodraeth Cymru bod y cyfnod clo byr hwn yn gyfle i atal lledaeniad y feirws a'u bod yn cydnabod gwaith pwysig arweinwyr crefyddol yn ystod y pandemig.

    Eglwys

  2. Angen 'eglurder ar frys' am yr hyn sydd i ddod

    Ceidwadwyr Cymreig

    Mae'r aelod Ceidwadol o'r Senedd, Darren Millar wedi galw am “eglurder” ar frys gan y prif weinidog am yr hyn fydd yn digwydd ar ôl y cyfnod clo presennol.

    “Dywedwyd wrthym y byddai’r wybodaeth yn cael ei rhannu â phobl yr wythnos diwethaf, ond ni chlywsom ni unrhyw beth,” meddai.

    Galwodd hefyd am “ddull mwy penodol o ymyrryd” er mwyn ymdopi gyda'r pandemig, yn hytrach na chyfnod clo cenedlaethol.

    “Rydyn ni wedi dweud o'r dechrau ein bod ni'n meddwl mai nid cyfnod clo ledled Cymru oedd y peth iawn i'w wneud. Roeddem yn credu hynny achos fod y cyfraddau mor amrywiol mewn gwahanol rannau o Gymru.”

    Dywedodd fod y Ceidwadwyr Cymreig yn sefyll wrth eu safiad yng Nghymru er gwaethaf penderfyniad Llywodraeth y DU i gyflwyno cyfnod clo newydd cenedlaethol yn Lloegr o ddydd Iau ymlaen.

    “Mae'r dystiolaeth sydd wedi'i rhannu â Cheidwadwyr Cymru gan Lywodraeth Cymru wedi bod yn annigonol yn ein barn ni ar gyfer cyfnod clo ledled Cymru," meddai.

    “Dydyn ni ddim yn credu bod y dull y mae Llywodraeth Cymru wedi’i gymryd wedi bod yn gymesur.”

  3. Y gynhadledd yn dechrau mewn 15 munud

    Nid yw’r post yma ar Twitter yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar Twitter.
    Nid yw'r BBC yn gyfrifol am gynnwys safleoedd allanol
    I osgoi neges twitter

    Caniatáu cynnwys Twitter?

    Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter a pholisi preifatrwydd cyn derbyn. Er mwyn gweld y cynnwys dewiswch ‘derbyn a pharhau’.

    Nid yw'r BBC yn gyfrifol am gynnwys safleoedd allanol

  4. Angen datgloi Cymru yn 'araf ac yn bwyllog'

    Plaid Cymru

    Dywed arweinydd Plaid Cymru, Adam Price, y dylai'r broses o ddatgloi Cymru fod yn "araf ac yn bwyllog" ac mae'n rhybuddio "y gallai dod allan o'r cyfnod cloi byr yn rhy fuan ddadwneud y budd sydd wedi'i gyflawni".

    "Ry'n wedi dysgu dwy wers bwysig, mor belled," meddai, "sef bod cael cyfnod clo yn rhy hwyr yn lledaenu'r feirws a bod dod allan yn rhy gynnar yn dadwneud unrhyw fudd. Felly rhaid i'r camau nesaf fod yn araf ac yn bwyllog."

    Ychwanegodd na ddylid codi'r cyfyngiadau teithio sy'n atal pobl rhag dod i Gymru o ardaloedd lle mae nifer uchel o achosion yn y DU a dywedodd "ein bod yn ymwybodol na fyddwn yn gwybod yn syth pa effaith y mae'r clo byr wedi'i gael ac felly tan hynny mae'n rhy gynnar i lacio'r cyfyngiadau yn llwyr".

    "Mi fyddai'n gwbl wrthgynhyrchiol llacio'r mesurau yn syth os yw'r rhif R yn uwch nag 1," meddai."Ry'n ni angen gwybod hefyd sut mae gweinidogion wedi gwella y system profi ac olrhain a sicrhau nad oes rhaid dibynnu ar rwydwaith labordai goleudy y DU."

    Adam PricePlaid Cymru

    Dywedodd Mr Price ymhellach y gallai cau y sector lletygarwch am 18:00 fod yn un dewis wrth ddod allan o'r cyfnod clo ond byddai'n rhaid i fusnesau gael cefnogaeth ariannol.

    Awgrymodd hefyd y gallai disgyblion hŷn fod yn dychwelyd i'r ysgol ar rota pythefnos a phwysleisiodd "bod rhaid wynebu y cyfnod nesaf gyda gofal er mwyn sicrhau iechyd cyhoeddus gwell a chael gwell sicrwydd i fusnesau gan osgoi y cylch parhaol o gyfnodau clo."

  5. 'Tlodi wedi cynyddu yng Nghymru oherwydd Covid'

    CaerdyddGetty Images

    Mae Cymru yn wynebu mwy o dlodi ac mae haint coronafeirws wedi gwaethygu'r sefyllfa, yn ôl adroddiad newydd gan Sefydliad Joseph Rowntree.

    Mae'r adroddiad yn nodi bod 700,000 o bobl yn wynebu tlodi gyda nifer yn cael cyflog isel, methu fforddio prynu cartref na thalu am ofal plant.

    Ymhlith y rhai sy'n wynebu tlodi mae 180,000 o blant - y mwyafrif yn byw mewn teuluoedd sydd eisoes yn derbyn budd-daliadau.

    Mae Llywodraeth Cymru yn dweud eu bod wedi buddsoddi £2bn - mwy nag erioed - mewn tai fforddiadwy.

  6. Bore da a chroeso

    Croeso i'r llif byw fydd yn dilyn yr holl ddatblygiadau o gynhadledd Llywodraeth Cymru i'r wasg heddiw.

    Y Prif Weinidog Mark Drakeford fydd yn arwain y gynhadledd, ac mae disgwyl y bydd yn amlinellu'r camau nesaf i Gymru pan fydd y cyfnod clo presennol yn dod i ben ar 9 Tachwedd.

    Mae disgwyl iddo nodi y bydd "y mesurau cenedlaethol newydd ond yn helpu i gadw rheolaeth ar coronafeirws os yw pawb yn addasu eu hymddygiad i'r argyfwng iechyd cyhoeddus parhaus".

    Mark DrakefordGetty Images