Mae Llywodraeth Cymru'n "gywir i flaenoriaethu iechyd cyhoeddus, ond mae cyfyngiadau newydd yn gam mawr yn ôl i fusnesau, yn arbennig busnesau lletygarwch" yn ôl Cyfarwyddwr Cymdeithas y Cyflogwyr (CBI) yng Nghymru, Ian Price.

"Drwy'r pandemig mae cwmnïau wedi gweithredu nifer o fesurau i gadw eu staff a chwsmeriaid yn ddiogel," dywedodd.

"Mae'n bositif bod y llywodraeth yn darparu cefnogaeth ariannol newydd i gynnal busnesau dros gyfnod anodd y gaeaf."

Mae Mr Price yn "erfyn ar bob busnes" i hybu'r ymgyrch brechu atgyfnerthu ymhlith aelodau staff fel bod mwy'n cael eu brechu.

"Bydd cymryd y camau hyn nawr yn sicrhau ein bod yn cadw ein heconomi ar agor fel y mae'n ddiogel i wneud hynny yn yr wythnosau nesaf."

Mae'n rhaid paratoi at don Omicron yng Nghymru, gyda disgwyl i'r niferoedd sydd wedi eu heintio newid yn "aruthrol o gyflym", meddai'r gweinidog iechyd.

Dywedodd Eluned Morgan ar Dros Frecwast y byddai'r niferoedd uchel yn debygol o roi straen ar ofal iechyd a gwasanaethau ehangach.

Ychwanegodd bod disgwyl i "gannoedd ar filoedd o bobl" ddal Omicron dros yr wythnosau nesaf.

Bydd "penderfyniadau pellach yn ystod yr wythnos nesa'" gan y llywodraeth, meddai.

Fe ofynnwyd i Mark Drakeford fore Gwener pam nad oedd tafarndai'n cael eu cau, fel sy'n digwydd i glybiau nos.

Wrth siarad ar BBC Today, atebodd: "Maen nhw'n dweud wrtha'i fod clybiau nos yn llefydd y mae pobl yn mynd i fod yn agos ac yn bersonol."

Dywedodd hefyd nad oedd yn diystyru cyflwyno mesurau llymach ar ôl y Nadolig, gan ddweud y bydd yn "dysgu llawer iawn mwy dros y 10 diwrnod nesaf".

Dywedodd nad oedd aelwydydd estynedig a'r rheol o chwech mewn bwytai a thafarndai yn cael eu diystyru, ac y byddai penderfyniad am ddigwyddiadau awyr agored mawr fel chwaraeon ddydd Llun.

Ychwanegodd fod Cymru mewn cyfnod o "lonyddwch cyn y storm".

Ffynhonnell y llun, Getty Images

Mae pobl eisoes yn canslo byrddau mewn bwytai, meddai Nia Rhys Jones o Gymdeithas Twristiaeth Môn, ac mae llawer iawn o fusnesau, sy'n dibynnu ar gyfnod prysur gwyliau'r Nadolig "ar eu gliniau erbyn hyn".

"Dwi'n siŵr bydd llawer yn meddwl 'ydy o werth i mi gario 'mlaen' [a] bydd 'na lawer i sgwrs yn y byd busnes ym cymryd lle dros y gwylia' rŵan," meddai ar raglen Dros Frecwast.

"Yn union fel llynedd ma'r llefydd ma' wedi prynu stoc, ma'r rota staff [wedi ei drefnu] - ma' popeth yn ei le ar gyfer y cyfnod prysura' a dyma ni eto.

"Drwy'r cyfnod coronafeirws ma' i gyd, ma'r diwydiant wedi parchu'r canllawia' a mi neith y diwydiant eto."

Ffynhonnell y llun, Getty Images

Serch y straen y mae hi'n ei ragweld dros yr wythnosau nesaf, dywedodd: "Mi ddown ni drwyddi.

"Mae'n ddiwydiant sy'n dod yn ôl dro ar ôl tro, ond ma' rhaid i rywun gydymdeimlo eto efo'r diwydiant lletygarwch sy'n ca'l yr hit yma, fel petae, ar gyfnod sy' mor hanfodol i'w cynllun busnes."

Mae Gwyndaf Jones yn berchennog ar glwb nos COPA a thafarn y Castell yng Nghaernarfon.

Mae'n dweud ei fod yn "siomedig iawn" gyda'r cyfyngiadau diweddaraf a'i fod yn poeni am ei staff.

"Mae ganddon ni dros 80 o bobl yn dal i weithio i ni a 'dyn nhw ddim yn gw'bod be' sy'n mynd i ddigwydd i'w gwaith nhw mewn wythnos," meddai.

"Be 'da ni fod i ddweud wrthyn nhw?

"'Da ni ddim wedi cael dim contact gan track and trace ers misoedd yn y ddau glwb nos sydd ganddon ni."

Ychwanegodd: "Dwi yn meddwl neith o effeithio ar dafarndai hefyd. Os ydy'r social distancing rule, 2 metre rule - neu rule of 6 yn dod i mewn - bydd hynny yn cau tafarndai hefyd.

"Mae pobl yn ofn mynd allan a 'dy o ddim yn rhoi cymorth i dafarndai. Mae'n cau ni lawr heb watchad ar ôl ni, a heb roi compensation iawn. Mae 'na lwyth o bobl yn mynd i golli gwaith."

Mae'r Prif Weinidog yn "cynghori pawb yn gryf" i wneud pum peth cyn y Nadolig er mwyn cadw'n ddiogel:

• Cael eich brechu - boed yn bigiad cyntaf, ail, neu frechlyn atgyfnerthu;
• Cymryd profion llif unffordd os yn mynd allan - fel i siopa neu weld rhywun;
• Cwrdd tu allan os yn bosib, ac awyru ystafelloedd os oes rhaid cwrdd dan do;
• Gadael o leiaf un diwrnod rhwng gwahanol ddigwyddiadau;
• Cofio am gadw pellter, gwisgo gorchudd wyneb a golchi eich dwylo yn gyson.

Bydd y rheoliadau'n cael eu newid hefyd i gynnwys gorchymyn i weithio adref ble fo hynny'n bosib.

Mae'r llywodraeth wedi cyhoeddi cynllun dau ran - y cyntaf yw cynghori pobl i fod yn fwy gofalus cyn y Nadolig, ac yna bydd cyfyngiadau newydd ddod i rym ar ôl Gŵyl San Steffan.

Bydd mesurau ychwanegol mewn lle i fusnesau i "ddiogelu cwsmeriaid a staff" fel systemau unffordd a rhoi rhwystrau mewn lle ble fo angen.

Bydd archfarchnadoedd yn dychwelyd i "uchafswm o bobl sy'n cael siopa" o 27 Rhagfyr.

Bydd rheolau'n dod i rym i orfodi pellhau cymdeithasol o ddau fetr mewn swyddfeydd hefyd, a bydd clybiau nos yn cau.

Dyma ni eto...

Bydd Mark Drakeford, Prif Weinidog, yn siarad gyda phobl Cymru am 12:15.

Mae disgwyl iddo fanylu ar y rheolau newydd fydd yn effeithio ar ein bywyd o ddydd i ddydd, yn sgil pryderon am yr amrywiolyn Omicron.

Cafodd llawer o'r newidiadau mawr eu cyhoeddi dros nos ond fe fydd Mr Drakeford yn ateb cwestiynau gan y wasg hefyd.

Arhoswch efo ni - mae'n braf cael eich cwmni.

Ffynhonnell y llun, Getty Images