Crynodeb

  • Y rheidrwydd i wisgo mygydau mewn siopau, bysiau a threnau yn dod i ben ddydd Llun

  • Angen eu gwisgo mewn ysbytai a chartrefi gofal o hyd

  • Y gyfraith ar hunan-ynysu i ddod i ben ddydd Llun hefyd

  • Ni fydd profion PCR ar gyfer y cyhoedd ar gael o ddydd Llun ymlaen chwaith

Y diweddaraf yn fyw

  1. 'Pwysig parhau gyda rhai cyfyngiadau'

    Dros Frecwast
    BBC Radio Cymru

    Ar Dros Frecwast fore heddiw dywedodd y Gweinidog Iechyd Eluned Morgan y byddai Llywodraeth Cymru wedi hoffi llacio mwy ar y rheolau ond nad oedd hynny'n bosib ar hyn o bryd oherwydd bod yr haint yn dal i ymledu.

    Erbyn hyn, meddai, mae'r haint yn effeithio ar un o bob 16 o'r boblogaeth yng Nghymru.

    "Mae coronafeirws dal i ymledu o fewn ein cymunedau ni ac mae hynny wrth gwrs yn achos gofid i ni," meddai.

    "Ond y gwahaniaeth nawr yw, achos fod gymaint o bobl wedi cael eu brechu ychydig iawn ohonyn nhw sy'n wirioneddol yn mynd yn sâl."

    Eluned Morgan ar raglen Dros Frecwast

  2. Pa gyfyngiadau sy'n parhau?

    Mae Llywodraeth Cymru wedi penderfynu peidio â chael gwared ar yr holl gyfreithiau Covid mewn ymateb i gyfraddau cynyddol o achosion.

    Fe fydd yn ofynnol o hyd i bobl wisgo mygydau mewn ysbytai a chartrefi gofal.

    Bydd y rheidrwydd ar gwmnïau i gymryd rhagofalon ac asesu risg coronafeirws ar eu heiddo yn parhau hefyd.

    Dywed gweinidogion fod achosion wedi codi'n sydyn yn ystod yr wythnosau diwethaf, wedi'u hysgogi gan yr is-amrywiolyn BA.2 o Omicron.

    Bydd yr adolygiad tair wythnos nesaf o'r rheoliadau yn cael ei gynnal erbyn 14 Ebrill, pan fydd y mesurau cyfreithiol sy'n weddill yn cael eu hadolygu.

    MwgwdGetty Images

  3. Pa reolau sy'n newid ddydd Llun?

    Ni fydd yn rhaid i bobl wisgo mygydau mewn siopau ac ar drafnidiaeth gyhoeddus o ddydd Llun ymlaen.

    Bydd y gyfraith hunan-ynysu hefyd yn dod i ben fel y cynlluniwyd.

    Ni fydd profion PCR ar gyfer y cyhoedd ar gael o ddydd Llun chwaith, ond mae Llywodraeth Cymru yn bwriadu cadw profion llif unffordd am ddim i bobl â symptomau tan fis Mehefin.

    Er y bydd y cyfreithiau'n cael eu diddymu, mae'r llywodraeth yn annog pobl i barhau i wisgo mygydau, a hunan-ynysu os oes ganddyn nhw symptomau.

    MwgwdGetty Images

  4. Croeso i'r llif byw

    Bore da, a chroeso i'n llif byw o gynhadledd Llywodraeth Cymru ar ddydd Gwener, 25 Mawrth.

    Y Prif Weinidog Mark Drakeford fydd yn cynnal y gynhadledd heddiw, a hynny am 12:15.

    Mae disgwyl iddo gadarnhau na fydd yn rhaid i bobl yng Nghymru wisgo gorchuddion wyneb mewn siopau, bysiau a threnau o ddydd Llun ymlaen.

    Bydd rhai rheolau mawr eraill, gan gynnwys y gyfraith ar hunan-ynysu, yn dod i ben hefyd.

    Arhoswch gyda ni am y diweddaraf.

    MDGetty Images