Mae Rob Page wedi bod yn egluro ei benderfyniadau mewn cyfweliad gyda BBC Radio Wales.

"Y peth gwaethaf am y swydd yma ydy siomi'r rhieny sydd ddim yn y 26," meddai.

"Y gweddill, dydw i heb ffonio nhw yn dweud eu bod nhw mewn - roedd well gen i iddyn nhw ddarganfod yr un pryd â phawb arall.

"Mae hynny'n neis iddyn nhw'i weld, ond ar yr ochr arall mae rhywun wastad yn mynd i fod yn siomedig.

"Dwi wedi cael cwpl o sgyrsiau anghyfforddus - rhai oherwydd anafiadau, rhai oherwydd dewisiadau.

"Mae'n rhaid i ni symud 'mlaen nawr a dewis y garfan fydd yn gallu cystadlu ac ennill gemau i ni."

Ffynhonnell y llun, PA Media

Roedden ni eisoes yn gwybod na fyddai Rhys Norrington-Davies yn y garfan oherwydd anaf, ac mae'n debyg mai dyna'r rheswm pam fod Tyler Roberts yn absennol hefyd.

Yr enwau amlycaf eraill sy'n colli allan ydy Rabbi Matondo a Wes Burns.

Does dim lle chwaith i rai o'r enwau mwy anghyfarwydd oedd yn cael eu hystyried fel opsiynnau, fel Luke Harris, Joe Jacobson, Oli Cooper a Nathan Broadhead.

Ffynhonnell y llun, Getty Images

Mae Rob Page wedi dewis carfan cymharol brofiadol - dim ond pump o'r chwaraewyr sydd wedi ennill llai na 10 cap dros Gymru.

Mae 'na dri sydd wedi ennill dros 100 o gapiau - Chris Gunter, Gareth Bale a Wayne Hennessey.

Ac mae hyd yn oed rhai o aelodau ieuengach y garfan, fel Chris Mepham, Ethan Ampadu, Harry Wilson, Joe Morrell a Dan James, i gyd â dros 30 o gapiau er nad ydy'r un ohonyn nhw'n hŷn na 25 oed.

Mae llawer o'r bygythiad ymosodol yn dal i ddod gan Gareth Bale (40 gôl) ac Aaron Ramsey (20).

Ond ag eithrio'r golwyr, mae dros hanner y garfan wedi sgorio gôl ryngwladol dros Gymru.

Gareth Bale - Los Angeles FC, 108 cap, 40 gôl

Kieffer Moore - Bournemouth, 29 cap, 9 gôl

Mark Harris - Caerdydd, 5 cap

Brennan Johnson - Nottingham Forest, 15 cap, 2 gôl

Dan James - Fulham (ar fenthyg o Leeds), 38 cap, 5 gôl

Ffynhonnell y llun, Getty Images

Sorba Thomas - Huddersfield, 6 cap

Joe Allen - Abertawe, 72 cap, 2 gôl

Matthew Smith - Milton Keynes Dons, 19 cap

Dylan Levitt - Dundee United, 13 cap

Harry Wilson - Fulham, 38 cap, 5 gôl

Ffynhonnell y llun, Getty Images

Joe Morrell - Portsmouth, 30 cap

Jonny Williams - Swindon, 32 cap, 2 gôl

Aaron Ramsey - Nice, 75 cap, 20 gôl

Rubin Colwill - Caerdydd, 7 cap, 1 gôl

Ffynhonnell y llun, Getty Images

Ben Davies - Tottenham Hotspur, 74 cap, 1 gôl

Ben Cabango - Abertawe, 5 cap

Tom Lockyer - Luton, 14 cap

Joe Rodon - Rennes (ar fenthyg o Tottenham Hotspur), 30 cap

Chris Mepham - Bournemouth, 33 cap

Ffynhonnell y llun, Getty Images

Ethan Ampadu - Spezia (ar fenthyg o Chelsea), 37 cap

Chris Gunter - AFC Wimbledon, 109 cap

Neco Williams - Nottingham Forest, 23 cap, 2 gôl

Connor Roberts - Burnley, 41 cap, 3 gôl

Ffynhonnell y llun, Getty Images

Wayne Hennessey - Nottingham Forest, 106 cap

Danny Ward - Caerlŷr, 26 cap

Adam Davies - Sheffield United, 3 cap

Ffynhonnell y llun, Getty Images

Dy'n ni ar fin cael gwybod pwy fydd y chwaraewyr fydd yn cynrychioli Cymru mewn Cwpan y Byd am y tro cyntaf ers 1958.

Pwy fydd y 26 chwaraewr lwcus? Dy'n ni ar fin darganfod!

Yn ogystal â dilyn y cyhoeddiad ar ein llif byw, mae modd gwylio'r cyfan ar BBC One Wales, neu wrando ar y cyfan ar BBC Radio Cymru.

Neu fe allwch chi wrando ar Radio Cymru tra'n dilyn ein llif, trwy glicio ar yr eicon ar dop y dudalen o 19:00 ymlaen.

Gyda gemau Cwpan y Byd yn dechrau ar 20 Tachwedd, does dim rhaid i Gymru ddisgwyl yn hir ar gyfer eu blas cyntaf o Gwpan y Byd ers 64 o flynyddoedd.

Fe fydd Cymru'n chwarae ar ddydd Llun 21 Tachwedd, dydd Gwener 25 Tachwedd a dydd Mawrth 29 Tachwedd.

Mae Cymru wedi'u gosod yng ngrŵp B, gyda'r Unol Daleithiau, Iran a Lloegr, a bydd dau o'r grŵp yn camu ymlaen i rownd yr 16 olaf.

Bydd holl gemau grŵp Cymru yn cael eu chwarae yn Stadiwm Ahmad bin Ali, sydd hefyd yn cael ei adnabod fel Stadiwm Al-Rayyan.

26 o chwaraewyr fydd yn rhan o'r garfan ar gyfer Cwpan y Byd, ac mae'r mwyafrif llethol o'r rheiny yn benderfyniadau hawdd i Rob Page.

Ond pwy ydy'r chwaraewyr hynny sy'n fwy ansicr o'u lle ar yr awyren?

Dyw Rubin Colwill ddim wedi bod yn chwarae'n gyson i Gaerdydd yn ddiweddar oherwydd anaf, ac mae Tyler Roberts hefyd wedi bod yn absennol i QPR am yr un rheswm.

Ydy Rabbi Matondo wedi creu digon o argraff yn Ranger eleni i sicrhau ei le yn y garfan?

Un fydd yn bendant yn absennol oherwydd anaf ydy Rhys Norrington-Davies, felly a fydd hynny'n agor y drws i rhywun fel Wes Burns neu Tom Lockyer?

Enwau newydd i'r garfan ydy Luke Harris o Fulham a Joe Jacobson o Birmingham - a fydd lle iddyn nhw?

Neu a fydd rhywun yn cael eu cynnwys yn y garfan am y tro cyntaf, fel Nathan Broadhead o Wigan neu Oli Cooper o Abertawe?

Cawn ddarganfod yn ddigon buan!

Ffynhonnell y llun, Getty Images

Yr Unol Daleithiau, Iran a Lloegr fydd gwrthwynebwyr Cymru yng Ngrŵp B yng Nghwpan y Byd Qatar.

Ond gyda'r bencampwriaeth lai na phythefnos i ffwrdd, faint ydych chi'n ei wybod am y timau y bydd Cymru'n eu herio?

Ein gohebydd Iolo Cheung sy'n cyflwyno'r holl wybodaeth fydd ei angen arnoch chi cyn y gemau allweddol ar 21, 25 a 29 Tachwedd.

Yn gynharach heddiw, tra'n agor cyfleusterau 3G newydd yn Nhreherbert, fe gafodd ddisgyblion Ysgol Gynradd Penyrenglyn gyfle i holi ambell gwestiwn i Rob Page.

Un cwestiwn i reolwr Cymru oedd, pe bai'n gallu dewis unrhyw chwaraewr o wlad arall i gynrychioli Cymru, pwy fyddai hwnnw?

Ei ateb? Chwaraewr canol cae Manchester City a Gwlad Belg - Kevin De Bruyne.

Gyda Chymru wedi chwarae yn ei erbyn sawl gwaith dros y blynyddoedd diwethaf, ag yntau wedi sgorio deirgwaith yn y gemau hynny, dy'n ni'n deall pam!

Ffynhonnell y llun, Getty Images

Mae rheolwr Neuadd Les Tylorstown, Rebecca Sullivan, yn dweud bod y pentref cyfan mor falch o gael y cyhoeddiad yn digwydd fan hyn heno.

"Naethon nhw gysylltu rai misoedd yn ôl [i ofyn am ddefnyddio'r lle] felly mae e wedi bod dan fy het ers sbel!" meddai.

"Ond do'n ni ddim yn disgwyl cymaint o hype â hyn i fod yn onest.

"Naethon ni ond ddweud wrth y cyhoedd ryw wythnos yn ôl, ac fe wnaeth y tocynnau werthu mas o fewn yr awr.

"Ers 'ny mae wedi bod yn bonkers, pawb isie tocyn, yn gofyn 'c'mon, jyst fi yw e, gad fi mewn!' - gallen ni fod wedi gwerthu 1,000 o docynnau.

"Mae e'n wych i bobl leol ac mae pawb isie bod yn rhan ohono fe."

Un sy'n gobeithio bod yn ddigon iach i gael ei enwi yn y garfan heno ydy Joe Allen.

Dyw'r chwaraewr canol cae heb ymddangos i Abertawe ers iddo anafu llinyn y gar fis Medi.

Mae rheolwr yr Elyrch, Russell Martin wedi cadarnhau na fydd yn chwarae iddyn nhw cyn Cwpan y Byd, ond mae Cymru'n gobeithio y bydd ar gael i deithio fel rhan o'r garfan i Qatar.

Y cwestiwn mawr ydy a fydd yn barod ar gyfer y gêm gyntaf mewn 12 diwrnod, ac os ddim, a fydd yn cael ei ddewis os na fydd ar gael nes yn hwyrach yn y gystadleuaeth?

Llai nag awr i fynd nes y cyhoeddiad, ac mae Neuadd Les Tylorstown yn prysur lenwi!

Bore 'ma bu Rob Page yn Ysgol Gynradd Penyrenglyn yn Nhreherbert, ble roedd plant ysgolion lleol yn cymryd rhan mewn gŵyl bêl-droed.

Roedd yn cael ei gynnal ar y cyfleusterau 3G newydd sydd wedi cael eu hadeiladu yna - a rheolwr Cymru yno i'w agor yn swyddogol heddiw.

Yn ogystal â dilyn y llif byw, bydd hefyd cyfle i wrando ar yr holl ddadansoddi mewn rhaglen arbennig heno ar BBC Radio Cymru rhwng 19:00-19:30.

Dyma ohebydd chwaraeon BBC Cymru, Owain Llyr i egluro mwy.