Cofio gyrfa liwgar prif leisydd The Alarm, Mike Peters
Mae'r canwr Mike Peters, prif leisydd The Alarm, wedi marw yn 66 oed.
Roedd wedi byw gyda chanser am 30 mlynedd, er sawl ysbaid rhag y cyflwr.
Yn enedigol o Brestatyn, bu'n byw yng ngogledd-ddwyrain Cymru am fwyafrif ei fywyd, ac yn ardal Dyserth yn benodol.
Roedd Peters - oedd wedi bod yn gweithio yn adran gyfrifiadurol archfarchnad Kwik Save - wedi cychwyn y band The Toilets yn Y Rhyl yn 1977, ar ôl gweld y Sex Pistols yn chwarae yng Nghaer.
Fe chwaraeodd The Alarm eu gig gyntaf ym Mhrestatyn yn 1981.
Aethant ymlaen i werthu tua phum miliwn o recordiau, a nhw oedd y cerddorion Cymreig cyntaf ers Tom Jones a Bonnie Tyler i gael llwyddiant yn yr Unol Daleithiau.