Rhoi organau: 'Swn i'n gallu byrstio efo pa mor falch ydw i'

Mae dynes o Ynys Môn yn dweud ei bod hi'n "ofnadwy o proud" o'i diweddar bartner, ac mae gwybod fod "rhan fach ohono yn dal i fynd yn rhywle yn gysur mawr".

Bu farw Macauley Owen, 26, mewn damwain ar fferm ym mis Ionawr 2023, ond mae Delyth Owen yn dweud ei fod yn "dal i fyw ymlaen" wedi i'w organau gael eu rhoi i bedwar o bobl.

Dywedodd Delyth fod Macauley wedi achub pedwar bywyd, ond ei fod o hefyd wedi cael effaith enfawr ar deuluoedd y bobl hynny hefyd, "mae o’n rhywbeth arbennig" meddai.

Bellach, mae Delyth yn annog pobl eraill i drafod y mater gyda'u hanwyliaid, wrth i ffigyrau ddangos mai Cymru sydd â'r gyfradd isaf o wledydd y DU o ran pobl sydd wedi rhoi caniatâd i roi organau.