Gobeithio am lwyddiant ym Mhencampwriaeth y Byd Dartiau

Mae'n cael ei ystyried yn un o'r cystadlaethau mwyaf ym myd dartiau, ac eleni mae 'na bedwar Cymro yn cystadlu ym mhencampwriaethau'r byd ym Mhalas Alexandra yn Llundain.

Yn eu plith mae Jonny Clayton o Bontyberem, enillodd Gwpan y Byd gyda'i gyd-Gymro Gerwyn Price yn gynharach eleni.

Dywedodd ei fod yn gobeithio cyrraedd rowndiau olaf y gystadleuaeth eleni, gan dargedu cyrraedd rownd yr wyth olaf o leiaf, ond mae'n dweud ei fod yn hyderus bod ganddo'r gallu i'w hennill.

"Fel'na rwy'n meddwl ar gyfer pob cystadleuaeth rwy'n ei wneud - mae'n rhaid i ti fynd gyda'r meddwl dy fod am ennill y gystadleuaeth," meddai.

"Os ydw i'n gwneud fy jobyn i yn iawn, mae gobaith."