Naidheachdan 11:00m
Celtic Boys Club
Chaidh rèite a dhèanamh eadar a' chompanaidh dham buin Celtic agus fichead duine a thog cùis-lagha a' gearain gun deach droch dhìol feiseil a dhèanamh orra aig Cluba Bhalach Celtic anns na 70an, 80an agus 90an. Chaidh na h-uimhir de choidsichean a bha aig a' chluba aig na h-amannan sin a dhìteadh. Thuirt a' chompanaidh lagha Thompsons gun deach na cùisean a rèiteach airson suim de sheachd figearan le dùil ri aonta ann an cùisean eile fhathast.
Cosgaisean
Chaidh cosgaisean co-cheangailte ris an dachaigh suas an-diugh. Tha prìsean dealain, gas, uisge agus cìs-comhairle nas motha agus tha buidhnean carthannais ag ràdh gun cuir sin mòran dhaoine ann an cruadal. Thuirt am Prìomhaire Sir Keir Starmer an-diugh gu bheil tuarastal a' dol suas agus gun cùm an Riaghaltas ris a' ghealltanas gum bi daoine a' faireachdainn nas fheàrr dheth.
Taraifean
Innsidh Sir Keir Starmer dhan Chaibineat aige an-diugh gum buail taraifean ùra Aimeireaganach air an Rìoghachd Aonaichte. Ged a tha am Prìomhaire air a bhith a' bruidhinn ri Dòmhnall Trump cha tàinig iad gu aonta fo am biodh Breatainn a' seachnadh nan cìsean. Innsidh Mgr Trump a-màireach dè na dùthchannan air an tig na taraifean ùra agus dè an dreach a bhios orra.
Myanmar
Bha mionaid sàmhchair ann an Myanmar sa mhadainn a' comharrachadh toiseach còig là de chaoidh nàiseanta an dèidh na crith-talmhainn Dihaoine seo chaidh. Tha àireamh nam marbh aig còrr is 2,000, ach tha dùil gum bi sin gu math nas motha fhathast. Thuirt ceannard Prògram Leasachaidh nan Dùthchannan Aonaichte ann am Myanmar gu bheil cùisean fìor dhoirbh aig luchd-obrach cobhair ann an Mandalay, aon de na sgìrean as miosa a dh'fhuiling.
Slèite
Chàin Coimisean Fearainn na h-Alba mar a chuir Urras Fearainn Chlann Dòmhnaill an oighreachd ann an ceann a deas an Eilein Sgitheanaich air a' mhargaidh gun bruidhinn ri muinntir an àite. Tha an oighreachd sa bheil 20,000 acaire air a' mhargaidh air £6.8m, agus Caisteal Armadail. Tha Comhairle Coimhearsnachd Shlèite a' coinneachadh a-nochd a dheasbad na cùise.