Naidheachdan 11:00m
Seirbheisean slàinte
Bheir Rùnaire na Slàinte fiosrachadh seachad an-diugh mu phlanaichean airson a dhèanamh nas fhasa do dhaoine na seirbheisean slàinte a tha a dhìth orra fhaighinn. Tha dùil gun ainmich Niall Gray maoineachadh airson amannan feitheimh do dh'euslaintich a ghearradh agus comasan an NHS a leudachadh. Thuirt na Tòraidhean gu bheil riaghaltas an SNP a' fàiligeadh an NHS, agus tha na Làbaraich ag radh gu bheil an riaghaltas air ruith a-mach à beachdan.
Myanmar
Thuirt Buidheann Slàinte na Cruinne gu bheil gnìomh a dhìth sa bhad airson stad a chur air galaran leithid cholera bho bhith a' sgapadh ann am Myanmar, às dèidh na crìth-thalmhainn an sin Dihaoine. Chaidh co-dhiù 1,700 duine a mharbhadh san dùthaich. Tha oifigich ag ràdh gu bheil cùisean dùbhlanach dha-rìribh do dh'ospadalan a tha a' dèiligeadh ri àireamh mhòr de dh'euslaintich.
Seirbheisean aiseig Bharraigh
Tha luchd-iomairt ann am Barraigh a' ceasnachadh a bheil CalMac a' coileanadh an dleastanas laghail a th' orra leis an t-seirbheis aiseig aca gu tir-mòr. Bha an Isle of Mull a' frithealadh Bharraigh agus Uibhist a Deas ach cha robh aice ach 45 luchd-siubhail a ghiùlain. Thuirt CalMac gun robh an t-seirbheis a' dèiligeadh ris an iarrtas a bh' oirre, agus gun robh seòlaidhean a bharrachd thar Chaolas Bharraigh air dòigh eile a thoirt do dhaoine air faighinn gu tir-mòr. Tha an Isle of Lewis a-nis air tilleadh gu seirbheis Bhàgh a' Chaisteail, ach tha an Isle of Mull a' frithealadh Uibhist a Deas fhathast, gu meadhan a' Ghiblein.
Marine Le Pen
Chaidh tè-phoileataigs bhon fìor làimh dheis san Fhraing, Marine Le Pen, fhaighinn ciontach air casaidean foill le airgead. Bha ceannard partaidh an Rally Nàiseanta fo chasaid airgead bhon Aonadh Eòrpach a mhì-chleachdadh mar phàirt de sgeama obraichean fuadain. Tha luchd-casaid air iarraidh gun tèid binn prìosaon a chur oirre is gun tèid a casg bho bhith a' ruith airson oifis phoblach airson còig bliadhna. Dh'fhaodadh casg sam bith buaidh a thoirt air a cothrom ruith ann an taghadh a' chinn-suidhe an ceann dà bhliadhna.
Primark
Tha ceannard na companaidh bhùithtean, Primark, air a dhreuchd fhàgail, às dèidh do bhoireannach gearain mun dol a-mach aige ann an suidheachadh sòisealta. Dh'aidich Paul Marchant, a bha na àrd-oifigear air Primark bho 2009, nach robh na rinn e idir a-rèir inbhean na companaidh.