Naidheachdan 11:00m

Taraifean

Dh'innis Rùnaire an Fhoghlaim, Bridget Phillipson, dhan BhBC gu bheil an Rìoghachd Aonaichte ann an deagh shuidheachadh bargan eaconomaiceach a dhèanamh leis na Stàitean Aonaichte fhad 's a tha dùthchannan air feadh an t-saoghail a' feitheamh fios mu na taraifean a bhios an Ceann-suidhe Trump a' foillseachadh a-nochd. Chan eil cinnt dè a' bhuaidh a bheir iad sin air Breatainn ach tha dragh ann mu leithid ghnìomhachas uisge-beatha na h-Alba agus gnìomhachas nan càraichean.

Gàsa

Tha Isreal an dùil leudachadh air an iomairt armaichte ann an Gàsa. Thuirt Ministear an Dìon, Israel Katz, gun gabh iad smachd air earrannan mòra den sgìre a bharrachd air na tha aca mu thràth. Tha aithrisean ann gun deach co-dhiù 15 duine a mharbhadh ann an ionnsaighean Isrealach a-raoir.

Heathrow

Thuirt ceannard Heathrow gu bheil e fìor dhuilich mun bhuaidh air luchd-siubhail nuair a bha am port-adhair dùinte le cion cumhachd bho chionn ghoirid. Bha Thomas Woldbye a' freagairt cheistean aig Comataidh Thaghte na Còmhdhail ann an Taigh nan Cumantan.

New Zealand

Thuirt poilis ann an New Zealand nach eil iad a' coimhead airson duine eile aig an ìre seo co-cheangailte ri bàs cupall Breatannach. Fhuair poilis na cuirp ann an dachaigh air iomall a' phrìomh-bhaile, Wellington. Tha e coltach gun do ghluais iad à Breatainn à New Zealand aig deireadh na bliadhna an-uiridh.

Myanmar

Thuirt an t-arm a tha a' riaghladh ann am Myanmar gun do dh'èirich àireamh nam marbh gu faisg air 2,900 an dèidh na crith-talmhainn an t-seachdain seo chaidh. Tha aithirisean ann, nach eil dearbhte, gu bheil an àireamh gu math nas motha na sin.

Oighreachd Cheann a Deas Shlèite

Bidh coinneamh phoblach ann an Slèite oidhche Luain a bhruidhinn air mar a chuir Urras Fearann Chlann Dòmhnaill an oighreachd air a' mhargaidh gun bruidhinn ri muinntir an àite. Chuala coinneamh a bha aig Comhairle Coimhearsneachd Shlèite a-raoir gun do chuir Urras Fearann Chlann Domhnaill fios air Urras Coimhearsneachd Shlèite an-dè a' tabhann coinneachadh riutha a bhruidhinn air a' chùis.