Naidheachdan 11:00m
Taraifean - An Rìoghachd Aonaichte
Thuirt am Prìomhaire gun gabh an Riaghaltas air an socair mus freagair iad taraifean ùra Dhòmhnaill Trump. Chuir an Ceann-suidhe taraif 10% air a h-uile stuth a tha ga reic ris na Stàitean Aonaichte agus taraif nas motha air dùthchannan a tha a' gabhail brath, thuirt e, air Aimeireaga. Thuirt Sir Keir Starmer an-diugh gu bheil e fhathast ag amas air aonta malairt leis na Stàitean Aonaichte.
Taraifean - Sìona
Gheall Sìona dìoghaltas an dèidh dhan Cheann-Suidhe Trump taraif 54% a chur orrasan. Thuirt an t-Aonadh Eòrpach, air an tèid 20%, gun tug na Stàitean Aonaichte droch buaidh air eaconamaidh na Cruinne air fad.
Taraifean - Alba
Thuirt Leas-Phrìomh Mhinistear na h-Alba, Ceit Fhoirbeis, gun dèan na taraifean cron air gnìomhachasan Albannach dha bheil margaidh nan Stàitean Aonaichte gu math cudromach. Thuirt Comann an Uisge-Bheatha gur e briseadh-dùil a th' annta, ach thuirt Buidheann Bhradan na h-Alba, a dh'aindeoin nan taraifean, gu bheil iad gu math dòchasach gun seas a' mhargaidh Aimeireaganach dhaibh.
Taraifean - Na Margaidhean Ionmhais
Thuit luach nan earrannan air feadh an t-saoghail an dèidh aithris Mhgr Trump. Dh'fhosgail Clàr nan Ceud Earrainnean ann an Lunnainn sìos 1% agus bha an dearbh rud sna margaidhean Eòrpach agus Àisianach. Ach bha luach Not na Rìoghachd Aonaichte suas 1% mu choinneimh an Dolair.
Gàsa
Thuirt arm Israel gum bi iad a' rannsachadh ionnsaigh a thug na saighdearan aca air conbhoidh ambaileans ann an ceann a deas Ghàsa air an 23mh den Mhàrt. Chaidh 15 de luchd-obrach paramedic a mharbhadh. Tha an UN a' cumail a-mach gun robh na solais laiste air na carbadan ach tha Israel air a bhith a' dol às àicheadh sin.
Buidseat Comhairle Earra-Ghàidheal is Bhòid
Tha toll faisg air £29m ann am buidseat Comhairle Earra-Ghàidheal 's Bhòid airson an ath chòig bliadhna a rèir Choimisean nan Cunntasan. Tha an aithisg ag ràdh gun do rinn an t-ùghdarras ionadail sàbhalaidhean ach gum feum iad coimhead air dòighean nas èifeachdaiche iad sin a thoirt gu buil. Agus thuirt an aithisg gu bheil cuid de sheirbheisean mar sheirbheisean chloinne agus obair shòisealta na Comhairle air a bhith a' dol bhuaithe. Thuirt a' Chomhairle gu bheil iad a' gabhail ri molaidhean na h-aithisg agus gun dèan iad an dìcheall an toirt gu buil.