Naidheachdan 11:00m

Taraifean

Tha an Ceann-Suidhe Trump a' cumail a mach gun toir poileasaidh nan taraifean aige fàs mòr air eaconomaidh nan Stàitean Aonaichte ged a thuit na billeanan Dolair far luach chompanaidhean Aimeirigeanach. Tha dragh air Buidheann Malairt na Cruinne gu bheil cogadh taraif air fàire agus tha droch bhuaidh air margaidhean ionmhais air feadh an t-saoghail an-diugh a-rithist. A dh'aindeoin sin dh'èirich luach an Dolair a-rithist, suas 1% air an Not.

Àrachas Nàiseanta

Tha na companaidhean Lush agus Kwik Fit am measg na thuirt gum feum iad prìsean a chur suas le buaidh an àrdachaidh san Àrachas Nàiseanta a thig gu bith an-earrar. Agus dh'innis companaidhean eile dhan BhBC gur dòcha gun tig orra cosnaidhean a ghearradh.

Mèinnean-talmhainn

Tha buidhnean chòraichean daonna ag iarraidh air dùthchannan Eòrpach fuireach sa chunnradh eadar-nàiseanta a tha a' casg mhèinnean-talmhainn. Tha a' Phòlainn agus an Fhionnlainn am measg nan dùthchannan a thuirt gu bheil iad am beachd tarrraing às ri linn bagairt na Ruis orra.

Cion Uisge

Tha cion uisge ann an cuid de sgìrean de dh'Alba a rèir Buidheann Dìon na h-Àrainneachd, SEPA, a tha ag iarraidh air luchd-gnothaich a bhith èifeachdach san dòigh sa bheil iad a' cleachdadh uisge. Tha pàirtean de Mhachaire Aonghais agus Fìobha fad deich mìosan le nas lugha uisge na bhiodh dùil. 'S e Sealtainn an aon sgìre san robh barrachd air an àbhaist de dh'uisge air a' mhìos a chaidh seachad.