Gwasanaethau Diwrnod y Cadoediad ar draws Cymru

Mae gorymdeithiau a gwasanaethau gosod torchau wedi cael eu cynnal ar draws Cymru i nodi Diwrnod y Cadoediad.

Mae dau funud o dawelwch am 11:00 bob blwyddyn ar 11 Tachwedd i nodi diwedd y Rhyfel Byd Cyntaf.

Bydd defodau tebyg yn cael eu cynnal ddydd Sul - Sul y Cofio - gan gynnwys Gwasanaeth Coffa Cenedlaethol Cymru yng Nghofeb Ryfel Genedlaethol Cymru ym Mharc Cathays, Caerdydd.

Mae nifer o adeiladau cyhoeddus yn cael eu goleuo'n goch dros y penwythnos er teyrnged i'r rhai a fu farw neu a gafodd eu hanafu mewn rhyfeloedd ar draws y byd.

Gwasanaeth Dydd y Cadoediad yng nghanolfan Blind Veterans Llandudno

Ymhlith y llefydd a noddodd Diwrnod y Cadoediad ddydd Sadwrn roedd Pen-y-bont ar Ogwr, Abertawe, Caerfyrddin, Conwy, Dinbych a'r Rhyl.

Cafodd seiren ymosodiad awyr ei seinio cyn dechrau'r ddau funud o dawelwch yng nghanol dinas Wrecsam ac fe gafodd digwyddiad yn Y Drenewydd ei ffrydio ar-lein.

Ym Mangor roedd yna wasanaeth wrth gofeb ryfel y ddinas, ond fe fydd gorymdaith yn cael ei chynnal ddydd Sul rhwng y gofeb a'r gadeirlan.

Ym Mhort Talbot fe wnaeth cannoedd o weithwyr dur, yn eu dillad gwaith, gynnal dau funud o dawelwch cyn gorymdeithio trwy'r dref fel rhan o'r ymdrech i geisio sicrhau dyfodol miloedd o swyddi yn safle Tata.

Y cyn-gorpral Tom Jones, sydd bellach yn 90 oed

Yn Llandudno roedd yna wasanaeth yng nghanolfan yr elusen Blind Veterans UK a chroeso i bobl leol ymuno â'r cyn aelodau o'r lluoedd arfog sy'n cael cefnogaeth yna.

Dywedodd y cyn-gorpral Tom Jones, 90: "Mae'n ddiwrnod i gofio ein ffrindiau a'r cydweithwyr a roddodd eu bywydau er i mi gael byw."

Er erchyllterau rhyfeloedd, dywedodd ei fod hefyd yn cofio'r "profiad a'r cyfeillgarwch a'r hwyl" y cafodd yng nghwmni ei gyd-filwyr.

Yr Uwchgapten Eirian Davies

Dywedodd yr Uwchgapten Eirian Davies, o gatrawd meddygol y fyddin yng Nghymru, ei bod yn cofio cyfraniad "cyn-deidiau a cyn-neiniau" ac "am yr hogia' gollodd eu bywydau ar yr operations dwi 'di bod ar".

Mae hi hefyd yn meddwl am "y rhai sy'n dod adra efo'r briwiau a'r anafiadau corfforol a meddyliol" sy'm "rhywbeth ma' nhw'n gorfod byw efo hyd eu bywyd".

Ychwanegodd: "'Dan ni'n gw'bod bob sowldiwr a pawb yn y lluoedd arfog yn rhoi eu bywyd ar y lein i'w wlad 'ma... er bod y rhan fwya' ddim isio cwffio ma' nhw'n goro 'neud eu dyletswydd i'r wlad."

Mae'r Sarjant Kevin Pritchard hefyd efo'r cartrawd meddygol erbyn hyn

"I fi'n bersonol, dwi'n cofio am comrades dwi 'di colli yn Afghanistan," dywedodd y Sarjant Kevin Pritchard sydd wedi gwasanaethu gyda'r fyddin ers 28 o flynyddoedd.

"Ond dim jyst cofio am y meirw ond cofio am rheiny sydd ar ôl, cofio am y teuluoedd a jyst cofio a diolch am y gwasanaeth ma' pobol 'di roid i'w gwlad."