'Cynnwrf' yng Nghasnewydd cyn gêm enfawr Man Utd

Dydd Sul bydd Casnewydd yn wynebu un o gewri'r byd pêl-droed, Manchester United, ym mhedwaredd rownd Cwpan FA Lloegr ar Rodney Parade.

Yn ôl is-hyfforddwr Casnewydd Dafydd Williams mae 'na "gynnwrf" mawr yn y ddinas ac ymysg y garfan, gan ychwanegu y bydd gan y cefnogwyr ran bwysig i'w chwarae yn ystod y gêm.

Mae Casnewydd wedi achosi ambell i sioc yng Nghwpan yr FA dros y blynyddoedd diwethaf, gan guro clybiau fel Caerlŷr, Leeds a Middlesbrough, a chael gêm gyfartal yn erbyn Tottenham Hotspur.